Buk bilong
Judit
Tok i go pas
Buk bilong Judit i stori long ol lain Juda klostu i laik lus olgeta na klostu ol i laik painim bikpela bagarap long han bilong ol lain birua. Tasol wanpela gutpela meri i stap, nem bilong en Judit, na em i save strong moa long bihainim olgeta lo bilong God. Na em i bilip strong olsem, God inap sambai long ol manmeri bilong em, na kisim ol bek long han bilong ol birua. Orait Judit yet i prea long God, bai God i strongim em long winim ol birua.
Dispela buk em wanpela stori bilong skulim ol manmeri.
Ol Juda klostu i laik lus olgeta
1
(Sapta 1-7)
Nebukatnesar i pait long King Arpaksat
1 Long namba 12 yia Nebukatnesar i stap king na i sindaun long biktaun Ninive na i bosim ol Asiria, King Arpaksat i stap long biktaun Ekbatana na i bosim ol Midia.
2 King Arpaksat i wokim wanpela banis ston i raunim taun Ekbatana. Ol i katim ol ston na sais bilong ol wan wan ston em i 3 mita na wan mita na hap. Dispela banis ston i go antap inap 35 mita na bikpela bilong en inap 25 mita.
3 Long sampela hap bilong banis ol i wokim ol taua. Na long wan wan taua i gat bikdua. Wan wan taua i go antap inap 50 mita na as bilong taua em inap 30 mita.
4 Wan wan bikdua i go antap inap 35 mita, na op bilong ol inap 20 mita, bai planti lain soldia i ken wokabaut mas i go ausait wantaim.
5 Orait long dispela taim King Nebukatnesar i kirapim pait long King Arpaksat long stretpela ples long hap bilong taun Rages.
6 Planti lain pipel i go helpim ami bilong King Arpaksat, em olgeta pipel bilong ples maunten na ol pipel i stap long arere bilong tripela wara Taigris na Yufretis na Hidaspes na tu ol pipel i stap long dispela stretpela ples King Ariok bilong kantri Elam i bosim. Planti lain pipel tru i bung wantaim bilong helpim ol ami bilong ol Kaldia.
7 Orait nau Nebukatnesar, king bilong ol Asiria, i salim tok i go long ol Persia na long ol lain pipel i stap long hap san i go daun. Dispela tok i go long ol lain bilong distrik Silisia na Damaskus na Lebanon na Antilebanon na long ol man bilong nambis
8 na long ol man bilong hap bilong maunten Karmel na long ol man bilong distrik Gileat na Galili Antap na bilong bikpela ples daun bilong Jesril.
9 Wankain tok tu i go long ol pipel bilong ol taun bilong hap bilong Samaria na long ol pipel i stap long hapsait bilong wara Jordan, i go inap long taun Jerusalem na Betani na Kelus na Kades. Na tok i go tu inap long wara bilong Isip, na long taun Tapanes na Rameses na long ol arapela hap bilong distrik Gosen.
10 Dispela tok i go moa yet inap long taun Tanis na Memfis na long olgeta man bilong kantri Isip inap long mak bilong kantri Itiopia.
11 Tasol olgeta pipel bilong ol dispela hap i sakim tok bilong Nebukatnesar na ol i no laik i go helpim em long pait. Ol i no pret long em, long wanem, ol i ting em wanpela tasol i stap na em i no inap win. Olsem na ol i rabisim ol man bilong bringim tok na ol i salim ol i go bek nating.
12 Nebukatnesar i kros nogut tru long ol man bilong dispela hap. Em i tok olsem, “Mi bikman tru, na tru antap long pawa bilong mi yet bai mi mekim save tru long ol man bilong dispela hap. Bai mi bagarapim tru olgeta hap bilong distrik Silisia na Damaskus na Siria na kilim i dai olgeta manmeri bilong kantri Moap na Amon na Juda na Isip, i go inap long arere bilong tupela solwara.”
13 Orait long namba 17 yia bilong Nebukatnesar i stap king, em i kirapim pait long King Arpaksat. Na em i winim na pinisim tru olgeta ami bilong Arpaksat wantaim olgeta soldia i save sindaun long hos na pait na olgeta soldia i save ran long karis.
14 Nebukatnesar i kisim olgeta taun bilong kantri bilong King Arpaksat. Em i go kamap long biktaun Ekbatana na i kisim ol taua bilong dispela taun na em i stilim ol samting i stap long ol maket. Na em i bagarapim dispela taun olgeta, na dispela taun em i kamap rabis stret.
15 Nebukatnesar i holimpasim King Arpaksat long ples maunten i stap klostu long taun Rages. Na Nebukatnesar i kisim ol longpela spia bilong en na sutim Arpaksat na kilim em i dai, na em i pinisim pawa bilong Arpaksat olgeta.
16 Orait nau Nebukatnesar wantaim bikpela lain soldia bilong em ol i go bek long biktaun Ninive. Na ol i malolo na amamas na pati i stap inap long 120 de.