4
Ol Israel i redi long pait
1 Long dispela taim olgeta manmeri bilong Israel i stap long Judia, ol i harim pinis nius long olgeta samting Holofernes, bikman bilong ami bilong Nebukatnesar, i bin mekim long ol arapela lain pipel. Ol i harim nius olsem, em i stilim ol samting bilong ol haus lotu na bihain em i bagarapim ol olgeta.
2 Olsem na ol i pret tru long em. Ol i guria na ol i wari planti long Jerusalem na long tempel bilong God, Bikpela bilong ol.
3 Long wanem, i no longtaim ol Israel i bin lusim ol kantri ol i bin i stap kalabus long en na kam bek long graun bilong ol. Nau tasol olgeta Israel i bin kam bek na sindaun gut gen long Judia. Na nau tasol ol i bin bihainim pasin bilong mekim tempel na alta na ol kap samting bilong lotu i kamap holi gen. Ol dispela samting ol birua i bin mekim doti long ai bilong God.
4 Ol Judia i pret long Holofernes, olsem na ol i salim tok i go long olgeta hap nabaut, em long ol taun bilong Samaria na long taun Kona na Bethoron na Belmain na Jeriko na Koba na Aisora na long ples daun bilong Salem.
5 Orait ol i putim ol wasman i stap antap long ol maunten na ol i strongim banis bilong olgeta ples i stap long ol dispela maunten. Ol i bungim ol kaikai bai ol i redi long taim bilong pait. Nau tasol ol dispela kaikai i mau na ol i bin kisim long gaden.
6 Joakim, em hetpris bilong Jerusalem long dispela taim, em i raitim pas i go long ol manmeri bilong tupela taun Betulia na Betomestaim. Betomestaim i lukluk i go long stretpela ples bilong Jesril, klostu long taun Dotan.
7 Em i tokim ol long was gut long ol rot i kam antap long ol maunten. Long wanem, husat i laik kam long Judia i save bihainim ol dispela rot tasol. Ol dispela rot inap long tupela man tasol i ken wokabaut sait sait. Olsem na i no hat tumas long pasim ol man i wokabaut i kam long en.
8 Ol Israel i bihainim ol dispela oda i kam long Hetpris Joakim wantaim kaunsil bilong olgeta Israel i kibung i stap long Jerusalem.
Ol Israel i singaut long God long marimari long ol
9 Ol Israel i singaut strong tru long God na ol i daunim ol yet long ai bilong em.
10 Ol manmeri na ol pikinini na ol bulmakau na ol ausaitman i sindaun wantaim ol, na ol wokman na ol wokboi nating, olgeta ol i pasim klos bilong sori.
11 Na olgeta Israel i stap long Jerusalem, olgeta man na meri na pikinini wantaim, ol i go klostu long dua bilong tempel bilong God na ol i putim sit bilong paia long het bilong ol na ol i slip long graun. Na ol i kisim ol klos bilong sori na lainim long ai bilong Bikpela.
12 Ol i kisim laplap bilong sori na hangamapim long alta, na olgeta manmeri wantaim i singaut strong long God bilong Israel. Ol i prea bai em i no ken larim ol meri na pikinini bilong ol i go kalabus, na em i no ken larim ol taun bilong ol tumbuna i bagarap, na em i no ken larim ol haiden i amamas long mekim pasin nogut long haus bilong em.
13 Na God i harim ol prea na em i sori long hevi bilong ol, long wanem, God I Gat Olgeta Strong i lukim ol manmeri bilong olgeta hap bilong Judia na Jerusalem i sanap i stap klostu long tempel bilong em na ol i tambu long kaikai inap planti de.
14 Hetpris Joakim na olgeta pris i save sanap long ai bilong Bikpela na mekim lotu long em, ol i pasim klos bilong sori. Na ol i mekim olgeta kain ofa, em ol ofa bilong paia i kukim olgeta na ol ofa ol manmeri i promis long givim long Bikpela na ol ofa ol i bringim long laik bilong ol yet.
15 Ol i putim sit bilong paia antap long laplap i karamapim het bilong ol, na ol i singaut strong moa yet long Bikpela, bai em i ken sori na marimari long ol Israel.