10
An Jesús jalhixa'alay an lamakawt
(Mt. 19:1-12; Lc. 16:18)
1 Taxtulh an Jesús la'acha'an Capernaúm, alhcha xalakaat'un Judea chi an ixlitapiktutamcha ayxkan junkan Jordán, walh wanajcha lhilhuwi la'cha'ampalakalh, pus tsukulhcha jamasunipalay tacha ixlismanitacha.
2 Tala'cha'alh ali'in fariseojnin talhila'ts'intanuycha an Jesús, tajuniy li sna oxi li xamati lapanak kamakawlh ixt'iwi'.
3 Yucha ja'alhtaylh jajuniy:
―¿Tasicha tajunin an Moisés?
4 Yu'uncha tajuniy:
―An Moisés, makawnilhi an lapanak li layi kaxta'niya ixt'iwi la'atam jalhiki yu katalapumakawna', chi kamakawnacha.
5 Pus an Jesús jajuniy:
―Chunchacha lhinawlh an Moisés mu wa xliyu jant'u k'is ja'asmatnanat'it.
6 Pero an Dios akxni ilhtulh an lapanak “ilhtulhcha an lapanak chi ilhtulhcha an t'aku'”.
7 “Xliyu an lapanak, kamakawna ixpay chi ixnati, ixt'iwicha kat'atala'xt'o'a'.
8 An ixt'uyunk'an tachanu wa pumatamcha katajuna'”, jantucha ixt'uyunk'an, tachanu wa pumatamcha.
9 Yu Dioscha jamala'xto'lhi jantucha kajalamamakawnilhi an lapanak.
10 Laka cha'acha, a'tam talhisakmipalhi an ixt'alhtanan an Jesús yu yucha ixlakata.
11 Pus jajuniy:
―Wa tichicha yu makajun ixt'iwi chi t'atsukupalaycha pumatam t'aku, tala'alhincha ilhtuy.
12 Chi tam t'aku yu makajuni ixt'apapa chi t'atsukupalaycha pumatam lapanak, wachucha tala'alhini ilhtuy.
An Jesús tapayniniy an Dios li oxi katatsukulh an jas'at'an
(Mt. 19:13-15; Lc. 18:15-17)
13 Ixtalhicha'aniycha an jas'at'an an Jesús para li kajalaklakpach'apalh, pero an ixt'alhtanan talaj'aymastuklhi an yu ixtalhicha'aniy.
14 Walh akxni jala'ts'ilh an Jesús lhitalh'amalh chi jajuniy:
―Kachajcha tamilhi an jas'at'an, jant'u k'ajalaj'aymast'ukt'it, mu an ixlich'alhkat Dios ixnawink'an yu tacha yu'uncha.
15 Kit'in sawalhi an yu klajunaw li yu jantu la'a'iya an ixlich'alhkat Dios tacha pumatam jas'at'a, jantu katicha'alhi tan ch'alhkatnan Dios.
16 Chi jalakch'ix'ilhcha an jas'at'an, jalaklakpach'apalhcha, jalhisk'inilhcha an Dios li oxi katatsukulh.
Pumatam ts'alh yu jamatumin
(Mt. 19:16-30; Lc. 18:18-30)
17 Akxni ixti'ancho'oycha an Jesús, la'ats'alajcha'alh pumatam lapanak, chi tatso'ottanilhcha la ixlakapu', juniy:
―Oxi maestro, ¿tasicha aklhit'aalalh para li aklhitsukulh an yu jantu min'ojoy jatsukunti?
18 An Jesús juniy:
―¿T'asu li k'i'uniycha li oxi klapanaki? Jantu xamati yu oxi lapanak, wa pumatami yu chun, Dios.
19 K'ats'aycha an lhamap'a'sin: “Jant'u wa aya k'alat'i, jant'u k'ajama'nin, jant'u k'aja'alhawan, jant'u k'amaslak'at'in, jant'u k'aja'o'xch'o'on, oxi k'ala'ts'i mimpay chi minati.”
20 Pus an lapanak juniy:
―Maestro, chuxcha chuncha ik'ilhtu'ojoy wa kintats'alat.
21 Pus an Jesús sa'cha ixla'ts'in chi ixmapayniycha, juniy:
―Pero ts'an'aniyanka la'atami yu k'a'ilht'u, k'ast'a'o chux an yu lhit'a'un ch'i k'ajamala'p'its'inincha an tumin an jakilhpatinin, chuncha yu k'alhits'uk'uya'a laj'oxi mintanlhun an lakt'iyan, xli'astan k'at'ana'acha ak'inch'a'o'aya'acha k'axa'a'iya'acha mincruz yu lay kap'uma'nik'a.
22 Ancho'olhcha an lapanak, sawalhcha lhita'oxila'alhiya tacha an junikalh, mu lhuw ixtanlhuni ixlit'ajun.
23 Chi an Jesús jalaklakawanancha, jajuniy an ixt'alhtanan:
―¡Sawalhcha lhima'anxkayi katacha'ana an la ixlich'alhkat Dios an yu talhit'ajun lhuw ixtumink'an!
24 An ixt'alhtanan sawalhcha ixtalhi'a'niya tacha an jajunilh, pus an Jesús jajumpalay:
―Kints'alan, ¡sawalh lhima'anxkayi katatanuyanta la ixlich'alhkat Dios an yu tachanu tumin takiklaka'iy!
25 Palay wa lasi kastaala'pusli la ix'ista makskat la'atam camello, walh jantu li katanuchalh xamati jamatumin an la ixlich'alhkat Dios.
26 Pus palaycha ixtalhi'a'niy, ixtalajumpaxay:
―¿Pus tisiyuchacha lay kata'alhtaxtuya'a?
27 Pus an Jesús sa'cha jala'ts'in, jajuniy:
―Yu an lapanak jantu lay ilhtuy, an Dios yucha layi ilhtu'ojoy chux.
28 Xli'astan an Pedro tsukulhcha juniya an Jesús:
―Kitnan iklhimakaw'otawcha kintanlhunk'an, mu iklach'a'o'atawcha.
29 Pus an Jesús najun:
―Aklajunaw yu sawalh, masi yu lhimakajuntacha ixcha'a, u ixjat'ala'awnin, u ixjamatsanan, u ixpay, u ixnati, u ixt'iwi, u ixjas'at'an, u ixlakaat'un, kilakata chi ixlakata an laj'oxi chiwinti,
30 tam cientoj palayi kaxta'nikana ani lakamunulhpa: ixcha'a, ixjat'ala'awnin, ixjamatsanan, ixnatin, ixjas'at'an chi ixlakaat'un, masi ani lalhilhitama'chapukan. Atumpaja kaxta'nikana jatsukunti yu jantu a'tam min'ojoy, akxni kamina an yu tumpajcha lakamunulhpa'.
31 Pero ixluwk'ani yu p'ulhnaj chaway, yu'uncha astani katajuna', chi yu astan chaway p'ulhnaja katajuna'.
A'tam jajumpalayi an Jesús li katama'niya'
(Mt. 20:17-19; Lc. 18:31-34)
32 Ixtitatama'ast'a'ancha la'acha'an Jerusalén an Jesús ali an ixt'alhtanan, ixp'ulayi an Jesús, an ixt'alhtanan jantucha ixtalhimacha'xayi li an Jesús o'sliyani ixti'an an la'acha'an masi ixk'atsaycha li kaniya', chi an yu astan ixtamintachalh ixtalaktalhanancha. Pus an Jesús a'tam jalhi'ampalhi tan wa ixpu'akstuk'an an ixpumakawt'uyk'an ixt'alhtanan, tsukulhcha jajuniya tani kaputapasayacha, jajuniy:
33 ―Titama'ast'a'anawcha Jerusalén, tan kama'axta'kana an yu junlhi isTs'alh Lapanak. La xmaknik'an an xalaj'ajin sacerdotejnin, chi an xamaestrojnin lhamap'a'sini kama'axta'kana', chi yu'uncha katanawna li kama'nikalhcha. Katama'axt'a'a la xmaknik'an an yu jantu judiojnin.
34 Jantu tu'u katitalhiwilalh, katala'ana'maya, katala'achujwaya, chi katama'niya', walh ixlila'at'utu wilhchan kala'awcho'oya'.
An Jacobo chi an Juan tapiktutawlhputun an Jesús
(Mt. 20:20-28)
35 An Jacobo chi an Juan, ists'alan tichi lapanak junkan Zebedeo, waniycha tala'alh an Jesús, tajuniy:
―Maestro, klask'iniputunaw lamapaynin.
36 Yucha jajuniy:
―¿Tisunch'a lak'ask'inat akla'ilhtuniwi?
37 Pus tajuniy:
―Akilamakawniw li aklapiktutawlhcha'aw tapiktutamin t'an k'ap'ina'a ch'alhkatna', pumatam tan oxi mimpa'xti chi pumatam la milhijama'xi.
38 An Jesús jajuniy:
―Jant'u k'ats'ayat t'uch'ini sk'inatcha. ¿Layi k'alhit'ayaniya'it an ma'alh'ajnat yu akma'alh'ajnana', ch'i k'aniya'it'iti tacha akniya'?
39 Yu'uncha tajuniy:
―¡Chun, kalaya'!
Pus an Jesús jajuniy:
―K'ama'alh'ajnana'itcha tacha kit'in, chi k'aniya'itcha tacha kit'in.
40 Pero li akilalakpa'xtitawlaw jantu lay kit'in aktilamakawniw, mu ancha katatawla yu anchacha jalhisakxtukanta.
41 Akxni ta'asmatlhi an ixpumakawk'an ali'in ixt'alhtanan an Jesús, tat'alatalh'amajla'ts'ilhcha an Jacobo chi an Juan.
42 Pus an Jesús, jaxalalh jajuniy:
―Uxitnan k'ats'ayat'iti li an yu tajun xajamach'alhkatni an laj'ay la'acha'anaxni wa talhinajuncha, chi an yu palay xalaj'ajin, yu'uncha yu palaycha wa talhinajun.
43 Pero ani uxitnan, tam. Ani yu lhitapalay jumputun p'ulhnajcha kajatapatsanilhi an ali'in.
44 Chi yu palaycha tukan xa'ay jumputun yu uxitnan, mima'tsukuk'ani kajuna'.
45 Mu masi kit'in yu ikjunlhi isTs'alh Lapanak, jantu ikminta li wa akilak'ilhtunikalhcha an tapatsat, kit'in iklamintaw tapatsaninin, chi ikminta ma'axta'na an kijatsukunti para li lhuw lapanakni katata'alhtaxtulh.
Pumatam la'lhtuluw lapanak junkan Bartimeo malakawanikalh
(Mt. 20:29-34; Lc. 18:35-43)
46 Wachuncha la'acha'an Jericojcha tacha'alh. Chi akxni ixtitataxtucho'oycha an Jesús ali an ixt'alhtanan ts'ananacha ixjach'a'o'akanta. Walh pumatam la'lhtuluw lapanak junkan Bartimeo, ists'alh tichi lapanak junkan Timeo, an ixpiktu tiji sa' ixwilh, isk'in la'a'tayjun.
47 Pus akxni asmat'acha li yucha an Jesús yu jamacha'a Nazareti ix'antachalh, tsukulhcha t'asay, najun:
―¡Jesús, Ists'alh David, lamapaynin ak'ilhi'a't'ay'ut'i!
48 Pero an ali'in lapanakni tala'a'aymalh para li sa'cha kakilhulh. Pero yucha palay p'as ixt'asay:
―¡Ists'alh David lamapaynin ak'ilhi'a't'ay'ut'i!
49 Wachuncha an Jesús sa'cha tayalh, chi jajuniy an yu ixtat'a'anta li katat'asanilhcha an la'lhtuluw lapanak, pus tat'asanilhcha chi tajuniy:
―Jant'u t'ani k'anaw, k'at'aycha, t'asaniyani an Jesús.
50 Pus lht'ele' maj'alhi an ixpupula'axt'a'kan an la'lhtuluw lapanak, tayalhcha, la'alhcha an Jesús.
51 An Jesús juniy:
―¿Tasu ak'ilhtunch'a na'uni?
Pus an la'lhtuluw lapanak juniy:
―Maestro, ijkalakawanamputun.
52 An Jesús juniy:
―An mijakiklaka'inti p'ut'ak'uch'ut'icha, k'ap'inchicha.
Pus wa akxni jalakawanalhcha, chi ch'a'o'alhi'alhcha an Jesús an laka tij.