11
Tanuchalhcha la'acha'an Jerusalén an Jesús
(Mt. 21:1-11; Lc. 19:28-40; Jn. 12:12-19)
1 Akxni ixtacha'ant'ajuncha la'acha'an Jerusalén, wa niycha la'acha'an Betfagé chi wa niycha la'acha'an Betania, la ixlakapucha an a'stitawk'a junkan Laka Olivojnin, an Jesús jamala'achalhcha ixt'uyunk'an ixt'alhtanan.
2 Jajuniy:
―K'ap'inchi'it'it an tan tasuy la'acha'an, chi akxni k'ach'ip'ina'itcha k'ala'ch'ip'ina'it'it la'atam jas'at'a burro, ch'iyawkanta, jantuka' a'tam putawk'akan, k'ax'ot'iya'it, akilalhiminiyaw.
3 Li xamati talhisakmiyan t'uch'ini lhix'ot'iyatcha, k'a'una'it'it li yucha an jamach'alhkati ma'lhtask'iniy, li wa tukan kama'axta'cho'oya'.
4 Pus ta'alhcha, walh tala'cha'alhcha an burro, ixch'iyawkanta laka maticha lhilaka tij, pus tax'ot'ilhcha.
5 Walh tichi yu'uncha yu ancha ixtawilanalh tajuniy:
―¿Tasu li x'ot'iyatcha an burrojo?
6 Pus yu'uncha chunchacha tanajun tacha an ixjajunita an Jesús, pus jamakawnikalhcha.
7 Talhi'anilhcha an Jesús an burro chi an lapanakni talak'aymuk'anilhcha an burro yu ixtaputala'axt'a'ta yu'uncha, chi putawk'alhcha an Jesús.
8 An ali'in ixtalakmamaycha an yu ixtaputala'axt'a'a an tan ixpu'anta an Jesús, chi an ali'in ixtala't'e'emaniycha jach'itin.
9 An yu ixtap'ulanan chi an yu astan ixtamintachalh ixtalakt'asaycha, ixtalaknajun:
―¡K'ajama'alht'axt'uncha chaway! ¡Oxi ani lapanak yu Dios makmintalh!
10 ¡Oxi an minta lhich'alhkat, ixlich'alhkat kimpayk'an David! ¡Hosanna kanawkalhi an lakt'iyan!
11 Cha'alhcha Jerusalén an Jesús chi tanuchalhcha an laka xa'ay tajtan, sa'cha ixjalaklakawanan wa yu, mu tats'isiycha, ta'alhcha Betania ali an ixpumakawt'uyk'an ixt'alhtanan.
La'a'aymakalh xak'iw higo
(Mt. 21:18-19)
12 Xlila'atamcha wilhchan, akxni ixtitataxtucho'oycha Betania, chawanalhcha an Jesús.
13 Walh laka'an ma'at lanan, st'a'aj yachalh a'atam xak'iw higo, pus alh laka'ana li sna uk'anilhi xajatawk'at, walh cha'alh la'ts'in jantu tu'u uk'alh, wa si xax'oy mu jantu ixpaku'.
14 Pus an Jesús juniy an xak'iw higo:
―Jantu a'tam ka'unini xamati mijatawk'at. Walh ta'alha'asmatlhi an ixt'alhtanan.
Jatamakxtu'okalh yu ixtajast'anan laka tajtan
(Mt. 21:12-17; Lc. 19:45-48; Jn. 2:13-22)
15 Tacha'ampalhcha Jerusalén, walh an Jesús akxni tanuchalh an laka xa'ay tajtan, tsukulh jatamakxtuyi an yu ixtajast'anan chi an ixtajatamawnan ixpulakni tajtan. Jala'ma'atasp'itni'olhi an mesa an yu ixtamapaxay tumin chi an ixtants'ik'an an yu ixtast'ay paloma.
16 Jantucha ixmakawniya li xamati ali kat'atanuchalh tu'u'.
17 Tsukulhcha jamasuniy jajuniy:
―Mu ts'o'kanta an la ixchiwinti Dios tan najun: “Chux an lapanakni ta ixlijalhi'ay an lakamunulhpa an kincha'a katajuna putapaynin.” Walh uxitnan wa p'a'alhawnanatcha.
18 Pus ta'alha'asmat'acha an xamaestrojnin lhamap'a'sin chi an xalaj'ajin sacerdotejnin. Pus talhipuxkawnilhcha tani katalhima'nilhcha, mu ixtatalhamnicha chi, mu ta lhichux an lapanakni ixtalhi'a'niniycha an ixlamap'a'sin.
19 Pero an Jesús akxni tats'isilhcha taxtulhi an la'acha'an.
An yu la'a'aymakalh xak'iw higo xixli
(Mt. 21:20-22)
20 Tala'puspalhcha wats'isin an tan yalh xak'iw higo, xixtacha chux xajataxiyak.
21 Wachuncha an Pedro past'ak'ach'a, juniy:
―Maestro, jo'o k'ala'ts'i, an xak'iw higo an yu la'a'aymat'i xixtacha.
22 An Jesús alhtaylh juniy:
―K'ak'iklak'a'it'iti an Dios.
23 Mu wa tichicha yu kajunilh ani a'stitawk'a: “K'a'ost'i, an alamalhch'a k'at'a'uchi'”, li kiklaka'iya chux la ixjalhunut chi li lhiwilayi an yu najun li kajuna, kajuna sawalh.
24 Xliyu klalhijunaw, wat'uch'ich'a t'ap'aynisk'inat'it, k'ak'iklak'a'it'iti li k'axt'a'nik'ana'it'it sawalh, walh k'axt'a'nik'ana'it'it sawalh.
25 Ch'i akxni t'ap'ayniyat, k'amala'mixinit'iti xamati yu ta'ilhtuniyan tu'u tala'alhin, walh wachu katamala'mixiniyani mintala'alhink'an an mimPayk'an yu wilhchalh lakt'iyan. [
26 Pero li jant'u mala'mixiyat'it, wachu jantu katitamala'mixinini an mimPayk'an yu wilhchalh lakt'iyan.]
Ixlich'alhkat Jesús
(Mt. 21:23-27; Lc. 20:1-8)
27 Wachuncha ta'ampalhcha Jerusalén, walh akxni ix'aklat'ajuncha laka tajtan an Jesús, tala'cha'alhcha an xalaj'ajin sacerdotejnin chi an xamaestrojnin lhamap'a'sin chi an laktatanin.
28 Tajuniy:
―¿T'asu li ch'unch'ach'a layi, tisiyuchacha makawniyan li k'ajalakt'amakxt'u an tajast'anani?
29 An Jesús ja'alhtaylh jajuniy:
―Wachu aklalhisakmiyaw la'atam chiwinti. Li akilajunaw, wachu aklajunawi tuchini laycha chuncha iklhilak'ilhtuy ani tanlhun.
30 ¿An ixjama'paxanti Juan, Diosi ixlijuniy u wa ixjatapast'ak'atcha lapanak? Akilajuniw.
31 Pus wachuncha tsukulhcha talakchiwiniy talajuniy:
―Li kajunaw li Diosi ixlijuniy, akintajunan: “¿P'us ch'i li jant'uch'a k'iklak'a'it'iti?”
32 Chi li kajunaw li wa ixjatapast'ak'atcha lapanak, chux an lapanakni akintatayla'minan, mu yu'uncha tak'atsayi li an Juan ixchiwinti Dios sawalhi ixlichiwiniy.
33 Pus an Jesús ta'alhtaylh tajuniy:
―Jantu ijk'atsayaw.
Yucha wachu jajuniy:
―Wachu jantu aktilajuniwi tuchini chunchacha iklhi'ilhtuy.