25
Deibida yo Nabal yo Abigaili
1 Na Samuela iboita kabo Isileli meuloili silogogo yo sivalam ana boita kaiwena. Yona sipului ana yanuwa esana Lama. Imwawasi kabo Deibida ilau yo imiyamiya ule bwagabwaga mena yanuwa Maon salina mena.
Tomo yabo esana Nabal ana yanuwa Maon iya bwatano lalakina tanuwagana yanuwa Kameli salina mena. Ana sipi yo gouti sibaibaiwa. Sauga yabo Deibida ibenalan Nabal yo ana topaisowao sipi wiyaliyao sitomtomli. Sauganane koina tomo meuloili siyaliyaya yo sikekakekan. Kabo Deibida ana kilakaiwo yoli sanaulu (10) iyawasali Nabal koina na tem isaguili siba, “Tauna kona mumugamai inamwanamwa ami sipi togite-kalatanwo kolili. Sauga bwaite sauga yaliyaya kabo gubesi, tem sowasowana kusaguimai kan ana dedei koina?” Na iyamo Nabal isikote yo Deibida esana ikawa-naenaeyan. Saugana kilakaiwone Nabal kainanane siwalowen Deibida koina imunamunai kabo me ana kilakaiwo yoli powa andeledi silau Nabal koina yakato siunui ana walo naenaena kaiwena.
Tomna 2-13
Nabal wainena Abigaili ibenalan tawae wainena iwalowen Deibida ana kilakaiwo kolili. Kabo kan lalakina ikatububun ipei donki pwatali mena yo topaisowa tupwali iyawasa-bagunayagili kabo mulili mena iya tabe ilau. Kamwasa mena Deibida me ana kilakaiwo silobai. Siya silalaoma yakato wainena Nabal siunui. Kabo tutulina italu-sakonayan Deibida manna mena yo iba, “Tabu Nabal ana walone kaiwena kunuwanuwatu, kaiwena kulukuluna iyauyaule. Yeoba ikausiwo na tabu kam gum kuyayai tem tomo yabo iboita. Walo yawasosi, Yeoba kani ikabi-yakaiweo kuyamala kin yo am susu dagelam mena kani siyamala kin besiele kowa.” Deibida Abigaili ana walo kaiwena iyaliyaya kabo sinene ana mulolo kan ikalaili.
Tomna 14-35
Saugana Abigaili ipileyoi nume mena Nabal inuma yauyaulesosi yo ikenokeno mwa nige walo yabo iwawalowen koina. Yanuwa ilayan ana keno imwawasi kabo Abigaili Nabal ana wasa iwolena. Kabo sauganane koina Nabal kasiebwa lalakina ilobai yo ibeku. Kaliyate sanaulu imwawasi Yeoba Nabal yawasina ikele-gabaen ana sauga imwawasi. Saugana wasanane ibenalan Deibida iwaloba, “Yeoba tatobalan kaiwena ginauli naenaena koina ikausiyau yo Nabal ana walo kaiwena iyamaisa.” Muli mena kabo walo iyawasa Abigaili koina na iyamala wainena. Kabo me ana yaliyaya italam yo ilau koina ikasolanan. Na baguna Deibida Ainowami ikasolanan. Na Saulo natuna Mikali, Deibida wainena, tamana iwolena tomo uloina koina ikasolanan.
Tomna 36-44