26
Deibida Saulo ileboi labuina
Tomo tupwali silaomaya yanuwa Sip silaoma Saulo ana nume Gibeya koina yo siwaloba, “Deibida iyaele ikeno-wadam koya Akila bwaimwa yanuwa Yesimon manna mena.”
Mwa Saulo me ana tokaleyayao silau Deibida siloyaloyai. Ali nume palai sikatububu-nagili kamwasa papalina mena kabo Deibida ilaoma na ali kaba logogo ilobaili. Boniyai mena Deibida yo Abisai dedeine silusae yo Saulo yo Abina silobaili sikeno boita.
Tomna 2-7
Na Abisai iwalo Deibida koina iba, “Walo yawasosi, Yeoba kam tokalomagigili ipei nimam mena. Kuwalo na yatupa-yamate yayapatu bwatano mena ibomamo ana wamali koina. Mekaigedamo kani yasakona na iboita.”
Na Deibida iwaloba, “Nigele, nige sowana Yeoba ana yaoyaolo tomonna yaunui. Temga yabo iunui Yeoba kani tomone iunui.” Kabo Saulo ana wamali yo kana waila botolona tabe sikalai kabo silogabaen.
Tomna 9-12
Deibida ilau tupwana imamalawe kabo iyoga Abina koina iwaloba, “Gubesi na kin nige ugigite-kalatan namwanamwai? Ugitai ana wamali yo kana waila botolona tosiyaele?”
Tomna 13-16
Saulo Deibida kainana daguguna ikilala kabo ikatai mwa iwaloba, “Natugu Deibida, kainam bwaite yabenalan?” Deibida kainana iyamaisa iba, “O, besiele. Na tawae kaiwena kuyamuli kusuliyau? Tawae yagu pwanoli?”
Tomna 17-20
Kabo Saulo iba, “Kabona bwaite yawasigu kuleboi mwa nige sowana yatonan yoi tem yaunuiwo. Yagu paisowa nige idududulai yo mumugagu besiele tokabaleya.”
Tomna 21
Deibida kainana iyamaisa iba, “O kin, am wamali bwaite, am kilakai yabo kuyawasayama na ikalai. Kabona yamulolo koliwo mwa yawasim yalebo kabo yakawanoi Yeoba yawasigu ikawa-namwanamwayan yo ileboiyau yagu miyapolowe meuloili kolili.”
Tomna 22-24
25 Kabo Saulo iwalo Deibida koina iba, “Natugu Deibida, Yeoba iwalo-muloloiwo. Walo yawasosi, tawae uginauli kani inamwanamwa yo kowa kani kuyamala tomo kaikaiwena.” Imwawasi kabo Deibida ilau yo Saulo ipileyoi ana yanuwa.