95
Mbouŋ to poiŋ tamtoghon pa suŋuuŋ
1 Anim, tambou ve tapait Yoova. Tiniid iza, ve talool.
Pasa, ye Volaaŋa toit ariaŋa to iponpoon ghiit pa koiaad inimale yaam tiina.
2 Anim tala tayoon ila nagho, ve tapaiti pa poia toni.
Aliŋaad iza, ve tambou toman tiniid iza, ve tapaiti. Ep 5:19
3 Pasa, Yoova, ye Maaron tiina.
Ye kinik tiina kat to ilib pa ndimaronŋa tisob. Mbo 47:2, 48:1
4 Mbeb to taan tisob tineep ila nima.
Taan pughu to sila we, le izala lolooz daba paam, ye iŋgin di tisob.
5 Te toman taan, mbeb toni moghon.
Pasa, ye nima to ighur di.
6 Yam anim talup ghiit, ve tasuŋ pa Yoova.
Tatud pani ve taput agheed, ve tapaiti. Pasa, ye to ighur ghiit. Pil 2:10
7 Ye Maaron toit, ve iit sipsip toni.
Ye iŋgin ghiit ve mata pait.
Taneep ila ye nima, ve tau ipanpan ghiit. Mbo 23:1
Aazne, ighaze yam alooŋ Yoova aliŋa ve ataghoni, ghoro poia.
8 Ye isaav payam ighaze: “Apoon lolomim payou, ve azoor ghou inimale muuŋ nditimbumim tighami izi ndug balim to Meriba ve Masa ne malep. Igham 17:7; Hib 4:7
9 Sawa tonenen, you nagham uraat tintina ila lolodi, ve tighita pa taudi matadi.
Eemoghon tighur inim tiou maau. Ve tinoknok tovaaŋ ghou. 1Kor 10:9
10 Tauto lolog padi maau kat irau ndaman tamoot ru.
Ve nasaav naghaze: ‘Ndiran tonowen, lolodi pa titaghon ŋgar tiou maau. Moghon moghon tiyel pa ataam tiou.’
11 Tauto nasaav ariaŋa padi toman ateg yabyab, ve napariaaŋ saveeŋ tiou naghaze:
‘Onoon kat. Ndug to naghaze atedi izi pani, yes irau tilooŋ tila maau. Maau le maau kat!’ ” Nam 14:21-35; Hib 3:7+,18