96
Yoova ye kinik tiina
1 Ambou mbouŋ paghu pa Yoova!
Yam tamtoghon to aneep irau taan, ambou pa Yoova. Mbo 98:1; Syg 5:9
2 Ambou pani, ve apait iza pa poia toni.
Uraat tintina to ye ighamgham di pa iuul ghiit, asasavia di irau sawa isob.
3 Avotia iza tiina toman tapiri ve poia toni irau ndug tisob.
Ve uraat toni gharatooŋadi to ite kat, asavia di irau ndug ndug. Mt 28:19
4 Pasa, Yoova, ye iza tiina kat.
Tovenen iit irau tapait varu le tapaiti kat, ve tamatughez pani ilib pa ndimaronŋa tisob.
5 Pasa, ndimaronŋa tisob to ndug ndug timbesmbees padi, nene maaron kaaromŋa moghon.
Ve Yoova, ye Maaron tau to ighur sambam toman mbeb tisob to tineep ila. Mbnp 1:1; 1Kor 8:4+
6 Ye iza tiina kat, ve ŋguruba iluvuti.
Tapiri ve poia toni ipavonin rumai toni lolo, ve ipambooda le paghuna kat.
7 Tovenen yam tamtoghon to ndug ndug, ŋgar tiam ivot, ve aghilaal Yoova!
Ŋgar tiam pakia ve apaiti. Pasa, ye le iza, ve tapiri tiina.
8 Iza tiina le tiina kat. Tovenen yam apaiti, ghoro deŋia.
Anim toman paitooŋ tiam, ve alooŋ ala sirsiir to rumai toni lolo.
9 Yoova ipambood tau pa ŋgar toni patabuaŋ. Tovenen aput aghemim pani ve apaiti.
Yam tamtoghon to taan, asob amatughez pani, ve atatan taumim ila mata.
10 Asaav pa ndug tisob aghaze: “Yoova, ye kinik tiina to iŋgin mbeb tisob!
Muuŋ, ye ighur taan le pughu tuŋia. Tauto mbeb eta irau induura maau.
Pale iŋgabiiz ndug ndug, ve ighur atia padi.
Ve gabizooŋ toni, nene deŋia moghon.”
11 Yam mbeb to sambam ve taan, lolomim poia ve tinimim iza.
Ve te toman mbeb tisob to tineep ila lolo ne paam, aliŋamim iza tiina ve apait Yoova.
12 Ve uum to naol ne, toman mbeb tisob to titub ila lolodi, lolomim poia ve tinimim iza.
Ve ai toman mbeb tisob to su lolo paam, aliŋamim iza, ve alool ve apaiti Yoova iza.
13 Pasa, ye ighaze inim. Leso iŋgabiiz tamtoghon tisob to taan, ve ighur atia padi.
Ye pale iŋgin tamtoghon tisob to taan, ve iŋgabiiz di.
Ve gabizooŋ toni, nene deŋia ve onoon moghon. Mbaŋ 17:31