32
Yes Israela tigharaat makau anunu imin maaron pazi
1 Mose ileep malau izi loloz Sinai daaba. Tauvene yes Israela tisaŋani le mako, ra tila tilivut Aron, ve tisaav pani tighe: “Aron, ugharaat leen maaron eta! Leso imuuŋ pait ve iŋgin ghiit. Pa ŋeer tau igham gherev pait gha tapul taan to yes Isipa ve talam na, yei nikankaan pani. Gabua eta aat ivot pani wa.”
2 Aron ilooŋ saveeŋ toozi, ve isaav pazi ighe: “Poia. Yam ala agoog padood to azuwamimŋa ve natumimŋa tau tigharaat zi pa gol na, ve agham zi tilam.”
3 Tauvene eval tiina tizugh padood toozi pa taliŋazi, ve tigham zi ila to Aron.
4 Ra i igham gol toozi tawe, ve igharaata imin makau anunu. Eval tiina tighita makau anunu tawe, ve tisaav tighe: “A yam Israela, aghita. Ene maaron toit tau igham ghiit tapul Isip ve talam.”
5 Aron ighita ŋgar toozi tawe, ve igharaat artaal ee ila gabua tawe naagho, ve isaav pazi ighe: “Bogzo, aat talup ghiit pa suŋuuŋ, ve tapait Yoova!”
6 Mboŋ le nughizau, ra eval tiina tiburig, ve tiyau gabua toozi siriv tila, leso tigham watooŋrau pa maaron toozi tawe. Watooŋrau siriv, yav ighan dodolin zi. Ve tigham siriv, leso yesŋa maaron toozi tawe tivalupu zi timin eemon. Ra mbolezi izi pa ghanghaniiŋ. Tighanghan ma tighunghun, ve malau mako tipaburigin narogho, ve mogheraaŋ tomania ŋgar sasaghati naol ivot.
Maaron aate yavyav kat pa yes Israela
7-8 Tighamgham tauvene, ve Yoova isaav pa Mose ighe: “Ai, rekia mon uzila! Pa tamtamon tsio tau ugham zi tipul Isip ve yamŋa alam na, ŋgar toozi isaghat ve tivaghamgham. Eez tau avog iyaryaaŋ pazi naghe titaghoni, ene tipuli wa. Ulooŋ. Tigharaat lezi makau anunu, ve tiput aghezi pani, ve tigham watooŋrau pani. Ve tisavsaav tighe: ‘Yam Israela, aghita. Maaron toit tau igham ghiit tapul Isip ve talam, tauta ene!’
9 Zeran tawe, yau nawatagh zi wa. Matazi zoraaŋ saveeŋ kat.
10 Tauvene ateg yavyav pazi kat, ve aazne naghe napasov zi tilalez. Ve yo uŋgalsekin ghau sov. Pa naghe naghur yo tomania paaghu tsio agham niazi. Yau aat nagham gham amasa amin naol, ve ezamim tintiina.”
11 Eemon Mose itoova to irav Maaron tooni Yoova aate. Ighe: “Aa Yoova, puughu mindai ta atem yavyav kat pa tamtamon tsio? Yo taum ta utotoi tapirim ve ugham gabua ŋgeretazi tintiina, tauta ugham zi tipul Isip ve tilam.
12 Isaav ighe yo uvaghamun zi, ene pale yes Isipa tisaav tighe: ‘Laak, Maaron to yes Israela ighe ivaghamun zi ve ipasov zi pa taan. Tauta itombaan zi, ve igham zi tipul ghiit, ve tila nugh tau bide loloza, leso iravuur zi ta sewe.’ Tauvene uvaghamun zi sov. Onoon, atem yavyav kat. Eemon utatan atem, ve utoor ŋgar tsio. Lolom imuul pa tamtamon tsio, ve ukari zi sov.
13 “Matam iŋgal besooŋa tsio Abaram, Isak, ve Yakop. Muuŋ, yo umbu saveeŋ tomani zi, ve upariaaŋa le iyaryaaŋ kat ughe: Yo aat ugham paaghu toozi timasa timin naol imin pitum to sambam saamba. Ve ugham taan Kanaan isov imin lezi motot, leso tileep pani taghon taghon gha ila.”
14 Onoon, Yoova ŋgar tooni iyaryaaŋ ighe ivaghamunia yes Israela. Eemon Mose isuŋ ariaaŋ, tauta Yoova itatan aate, ve itoor ŋgar tooni gha irav tamtamon tooni mako.
15-16 Ra Mose igham maet babaaŋa ru tau Maaron iŋgeret tutuuŋ tooni ila na, ve imuul izila to yes Israela. Maet ru tawe, Maaron tauu igharaat zi, ve iŋgeret tutuuŋ tooni ila. Ve bodeeŋ igheen ila zigezi ru. Tutuuŋ tawe, ene to ipariaaŋ yes Israela, leso matazi kisin saveeŋ tau yesŋa Maaron timbua na, ve titaghon eez tooni.
17 Yosua tau uleeŋa to Mose na, isasaŋani izi loloz livuugha. Mose izila ivot tooni, ve yesuru malmalizi tizila. Tigharau nugh tau eval tiina tilepleep pani na, ra Yosua ilooŋ oroor tiina. Tauvene isaav pa Mose ighe: “Wai, ewe aat malmal eta?”
18 Eemon Mose isaav pani ighe: “Mako. Oroor tawe imin pakuruuŋ to yes zaaba tau tiliiv malmal ne mako. Ve imin taŋiiz to zaaba tau koiazŋa tiliiv zi na mako paam. Mbouŋ tau nalooŋa we, tamtamon aat tintinizi pa gabua eta.”
19 Mose ivot toozi ta loloz puughu we, ve ighit zi titortor livutin makau anunu, le aate yavyav kat ve isik maet babaaŋa ru tau ikiskis zi na, tizi taan, le tivavaal ŋgiira ŋgiira.
20 Ra ila igham makau anunu tana, ve isiki izala yav ighani, ve itutu ila le imbiriis imin avav. Ra, itiri izila yaa, ve isaav ariaaŋ pa yes Israela gha tighunu.
21 Ra iyaon Aron ighe: “Laak, zeran tane tigham mindai payo, ta ulooŋ zi, ve ugherev zi gha tigham sosor tiina tane?”
22 Aron iyol aliiŋa ighe: “Wai, tiina tsiau, atem yavyav payau sov. Yo uwatagh: Zeran tane, monmon lolozi ipapazaagh zi pa ghamuuŋ ŋgar sasaghati naol.
23 Yes tisaav payau tighe: ‘Ugharaat leen maaron eta lak! Leso imuuŋ pait ve iŋgin ghiit. Pa ŋeer tau igham gherev pait gha tapul taan to yes Isipa ve talam ne, yei nikankaan pani. Gabua eta aat ivot pani wa.’
24 Yes tisaav payau tauvene, tauta nasaav pazi naghe: ‘Poia. Sei tau ighe ipabood tauu pa gol na, izughu, ve ighamu ilam.’ Tauvene yes tila tiyauur gol toozi ilam tsiau, ve nasuruuv zi tizala yav, ve rekia mon makau anunu ivot!”
25 Mose ighita ighe Aron iŋgin poghania yes Israela mako, ve ipul zi tivaghamgham, tauta tigham ŋgar sasaghati naol. Tauvene iroi: Isaav ighe koiazŋa tilam ve tighit zi, ene pale tivelegh zi ve tiŋiŋ pazi.
26 Tauta ila iyooz ila eez maata, ve iboob ighe: “Alooŋ! Sei tau ighe itaghon Yoova, na ilam tsiau!” Tauvene yes to rumei Levi tisov tila tilup zi ila Mose naagho,
27 ve Mose isaav pazi ighe: “Yoova tau Maaron to iit Israela, aliiŋa ilat payam ighe agham mbuzaagh tsiam, ve alaagh taghon nugh loolo, ve arav yes tau tiput aghezi pa gabua tana, le tisov timataar. Ighe toŋvetaz tsiam, ma zeetmimŋa, ma yes tau tileep tigharau gham na, aghurghur zi sov. Mbuzaagh ighaniir zi mon.”
28 Tauvene yes Levia titaghon Mose aliiŋa, ve saawe tana tirav zitamoot irau ndiŋndiŋ ndiŋndiŋ tol (3,000) pa mbuzaagh gha timataar.
29 Ra Mose isaav pazi ighe: “Yam rumei to Levi, alooŋ. Onoon, ene ipataŋan pa yam arav natumimŋa ve toŋvetaz tsiam timaat. Eemon yam aghurghur zi mako, ve ataghon duduŋai Yoova aliiŋa. Tauta aazne, i igham gham amin uraata tooni, ve ighur poia tooni izaa tsiam.”
30 Mboŋ nughizau, ra Mose isaav pa eval tiina ighe: “Alooŋ! Sosor tau yam aghamu na, ene tiina le tiina kat. Eemon yau aat namuul nazala to Yoova, ve natoova to nagharaat saveeŋ tomania, ve naghita: Pale irau ilooŋ ghau, ve ipul sosor tsiam tane, ma mako?”
31 Tauvene Mose imuul izala to Yoova, ve isaav pani ighe: “O Yoova, eval tiina tawe tigham sosor tiina kat payo. Pasaa, tigharaat lezi maaron karom pa gol.
32 Eemon aazne, naghason ghom to lolom isaghatin zi, ve upul sosor toozi. Ighe mako, o yau ezag tau uboode ila rau tsio na, umusu ighau paam.”
33 Yoova iyol aliiŋa ighe: “Ena aat mako. Tamtamon tau ighe izoor ghau ve igham sosor payau, i tana ta pale namus eeza ighau pa rau tsiau.
34 Tauvene uburig umuul uzila toozi, ve ugham zi gha yamŋa ala pa nugh tau muuŋ nasavia payam na. Aŋela tsiau pale imuuŋ payam, ve yamŋa ala. Eemon murei, yau aat naghur atuya pazi pa sosor toozi.”
35 Tauta murei, Yoova igham moroghooŋ saghati ivot pazi, ve iyat ŋgar toozi tau tizoornugh pa Aron gha igharaat lezi makau anunu imin maaron karom.