33
Maaron isaav ighe i irau ila tomania yes Israela muul mako
1 Ra Yoova isaav muul pa Mose ighe: “Yo yamŋa yes Israela tau ugham zi tipul Isip ve alam na, aburig apul nugh tane, ve alaagh muul ala pa taan Kanaan. Pa muuŋ, yau nambu saveeŋ tomania Abaram, Isak, ve Yakop, ve napariaaŋa le iyaryaaŋ kat naghe yau aat nagham taan tawe pa paaghu toozi.
2 Yau aat nambaaŋ aŋela tsiau ee imuuŋ payam, to iziir taan tawe tamtamona tighau. Ene yes Kanaana, Amora, Hita, Peresa, Hivia, ve Yebusa.
3 Leso agham taan toozi imin lemim, ve aleep pani. Taan tawe ŋgoreeŋa tiina, ve gabua naol titum poi pani. Eemon yau taug irau itiŋa tala mako. Pasaa, yam matamim zoraaŋ saveeŋ. Isaav ighe itiŋa tala ve agham ŋgar saghati ite paam izi eez livuugha, ene pale apas ateg, mako napasov gham asov ta sewe.”
4 Eval tiina tilooŋ saveeŋ ariaaŋa tane, le lolozi ipataŋan kat ve titaŋ tiina. Titiik tauzi muul mako. Tipul tauzi imin timoŋ.
5 Pasaa, Yoova isaav pa Mose ighe: “Usaav pa yes Israela tauvene: ‘Yam matamim zoraaŋ saveeŋ. Irau itiŋa tala mako. Pa ighe naleep tomani gham pa sooso ŋgiira rigta mon, ve apas ateg muul, ene aat napasov gham. Tauvene gabua tsiam popoia naol tau atiik taumim pani na, azuzuum zi tisov tizi, o matag iŋgal saa ŋgar ta pale nagham payam.’ ”
6 Tauvene saawe tau yes Israela tipul loloz Sinai, ve ilam, yes titiik tauzi pa gabua popoia muul mako.
Balbaal to tilup zi tomania Yoova
7 Saawe tau yes Israela tilaghlaagh izi nugh ŋginaaŋa, ve ighe timariau izi eez livuugha, mako Mose ipayooz balbaal ee ila soghan pa balbaal siriv. Balbaal tawe, tiwaato tighe ‘Balbaal to lupuuŋ.’ Tamtamon tisov tau tighe tighason Yoova pa gabua eta na, tilala ta sewe, ve tighurghur aliŋazi ila to Mose leso aana isavia ila to Yoova.
8-9 Saawe isov tau Mose ighe ilaagh ila pa balbaal tana, eval tiina tisov tiburig, tiyooz irau balbaal toz toz naghozi, ve matazi itaghoni le iloŋ ila balbaal loolo. Mako taitai izuur izilam gha ipoon balbaal naagho, ve Mose yesuru Yoova tisavsaav.
10 Saawe tau eval tiina tighita taitai tawe izilam gha ipoon balbaal naagho, tiput aghezi, ve tisuŋ irau balbaal toz toz.
11 Ve Yoova yesuru Mose tivaghito zi, ve tisavsaav imin tamtamon ru avozi ibesbees. Tisavsaav le isov, mako Mose ivot, ve imuul ila pa Israela niazi to lepoogh. Eemon Yosua tau Nun naatu na, ipulpul balbaal tana mako. Iŋginŋgini irau saawe. Yosua, i ŋeer paaghu ve imin uleeŋa to Mose.
Mose ighason Maaron to itotoi tauu pani
12 Tilepleep le saawe ee, ra Mose isaav pa Yoova ighe: “Laak, yo usaav payau ughe nagherev eval tiina tane gha yeŋa nila pa taan Kanaan. Ve ughe tinim irav ilam tsiau ve ugham ghau namin etam duduuŋ. Eemon sei tau yo ughe umbaaŋo ilam tomani ghau to iuul ghau, ene yo upaghazoŋai ghau pani soone.
13 Isaav ighe onoon tinim irav ilam tsiau, na upaduduuŋ ghau pa ŋgar tomania eez tsio. Leso nawatagh katin ghom, ve laghooŋ tsiau poia ila yo matam. Aa Yoova, matam iŋgal eval tiina tawe paam. Pa yes tamtamon tsio. Yo taum usiigh zi timin lem.”
14 Yoova iyol aliiŋa ighe: “Ugham ŋgar naol sov. Yau taug pale nalat tomani ghom, leso nagham ghom atem izi ve umariau.”
15 Mose ilooŋ saveeŋ tane, ve isaav pani ighe: “Ene poia to ulam tomani ghei. Pa ighe yo taum ulam tomani ghei mako, yei irau nipul nugh tane mako. Aat nileep mon ta sene.
16 Pa ighe ulam tomani ghei mako, ene pale saa gabua igham tamtamon tighilaal tighe yo lolom payei, ve poia tsio ighengheen tomani ghei? Mako. Eemon isaav ighe ulam tomani ghei, ene pale yes tiwatagh tighe yo usiigh ghei nimin lem, ve yo taum upet ghei nivot soghan pa nughmariŋ to taan.”
17 Tauvene Yoova isaav pa Mose ighe: “Poia. Gabua tau yo ughason ghau pani na, yau aat naghamu. Pasaa, tinig irav ilat tsio, ve nagham ghom umin etag duduuŋ.”
18 Mose ilooŋ saveeŋ tane, ve ighason Maaron muul ighe: “Aa Yoova, ighe tauvene, na utotoi taum tomania tapirim ve poia tsio payau, ve naghit katin ghom!”
19 Yoova iyol aliiŋa ighe: “Yau aat natotoi suvinia poia tsiau payo, ve navotia ezag Yoova tomania gabuag ila naghom. Isaav ighe lolog poia pa tamtamon eta ve naghe nagham poghania, ene aat nagham poghania. Ve isaav ighe lolog isaghatin tamtamon eta ve lolog pa uleeŋni, ene aat nauule.
20 Eemon yo irau ughita naghog mako. Pa ighe tamtamon eta ighit katin ghau, i irau ileep mako. Pale imaat.
21 Ughita nugh ee ta igheen zigeg ne. Ulam uyooz izala maet paavo tane.
22 Saawe tau nalam ve naghe natotoi taug tomania tapirig ve poia tsiau payo, ene pale naghur ghom uloŋ ula maet puura tane, ve napoon ghom pa nimag, le irau nasal payo gha nala.
23 Mako nimag ighau, ve ughita ndumeg. Eemon naghog, tamtamon eta irau ighita mako.”