3
Paulus iveveen yes Pilipaia pa tamtamon tau tiyaryaaŋ pa tutuuŋ to yes Yuda
Yam toŋvetaz, yau naghe nasavia saveeŋ tsiau rig tane, ve isov. Yam apaak Tiina toit Krisi ve aleep ila tooni. Tauvene lolomim poia le poia kat. *
Aliŋag tau muuŋ yau nasavia payam, tauta aazne nayoli muul. Irau tinig imum pa bodeeŋni mako. Pasaa, naghe napoon gham pa ŋgar siriv tau iduduuŋ mako na.
Matamim imomoos pa yes tau tiyaryaaŋ pa ravuuŋ tamtamon warozi tomania ŋgar siriv to yes Yuda. Zeran tauvene, yes timin ŋgavuun sagsag. *
Uraat saghati tau tighamghamu, ene iŋgalaaŋ ila Maaron maata mako. Ve ŋgar tau tisasavia, ene karom. Yes titotogh tamtamon ve tivaghamunia ulizi sorok. Tauvene ayamaan gham pazi. *
Alooŋ. Ŋgar tauu to ravuuŋ waar, ene gabua to loloon. Tauvene iit tamtamon to Krisi, ta tataghon duduŋai ŋgar tauu to ravuuŋ waar ve tamin Maaron tamtamon tooni. Ene nasavia iit tau tanumeer tauun tapiriin ve ŋgar toit mako, ve tabees pa Maaron itaghon pooz to Maaron Avuvu, ve tintiniin pa Yesu Krisi ve tapait i eeza. *
Muuŋ, Paulus itaghon duduŋai tutuuŋ tisov to yes Yuda
Zeran tawe tinumeer ŋgar tau tighamghamu ila tauzi tapirizi na, ve tipait tauzi pani. Eemon saa ŋgar tau yes tighamu, ene yau naghamu paam le naliiv zi. *
Pasaa, saawe tau tinaŋ ipoop ghau ve mboŋ imin liim ve tol, ra tirav warog. Yau tamtamon to Israel. Rumei tsiau, ene Benyamin. Tamaŋ ma tinaŋ, yesuru Hibrua duduuŋ ve aliŋazi Hibru. Ve yau paam Hibru duduuŋ ve nasaav Hibru. Ve zeran tutuuŋa, yau toozi ee. *
Muuŋ, yau nazuari ghau naghe le nataghon katin tutuuŋ to yes Yuda. Tauta ipazaagh ghau ve naghur pataŋani naol pa lupuuŋ to Krisi. Tutuuŋ to yes Yuda, yau nasapir pa eta mako. Nataghon zi le tisov. *
Paulus inumeer tauu muul mako. Inumeer Krisi mon
Muuŋ, yau nagham ŋgar naghe ŋgar naol tawe pale iuul ghau leso naduduuŋ ila Maaron maata. Eemon aazne, yau nawatagh Krisi ve namin i le wa. Tauta naghita naghe ŋgar isov tawe, ene gabua sorok tau ipoon ghau pa Krisi. Ve tane mon mako. Yau naghita naghe gabua popoiazi naol isov to taan paam, ene gabua sorok. Irau to iuul ghau mako. Ve gabua eemon geeg, ta naghita naghe ene gabua tauu, ve gabua poia kat tau iliiv gabua naol isov. Ene ŋgar to nawatagh katin Tiina tsiau Yesu Krisi. Onoon, i imin puughu pa napuliir gabua tsiau naol isov tileplez. Eemon matag ila pa gabua tawe muul mako. Yau naghit zi timin pen. Pasaa, ŋgar tsiau iyaryaaŋ naghe le nagham Krisi imin leg. *
Leso saawe to Mboŋ Murei, mako Maaron ighit ghau ighe yau tamtamon to Krisi. Tauvene ŋgar popoia naol tau nagham zi itaghon tutuuŋ ne, yau nanumeer eta to igham ghau naduduuŋ ila Maaron maata ne mako. Yau nanumeer Krisi mon. Isaav ighe naghur ila tooni, i pale igham ghau naduduuŋ ila Maaron maata. *
10 Tauvene yau naghe le nawatagh katin Krisi ve burigiiŋ tooni tapiri.
Ve naghe nayooz tomania Krisi pa badooŋ pataŋani, ve nataghon duduŋai Maaron ŋgar tooni le irau mateegh tsiau, imin Krisi. *
11 Isaav ighe nagham tauvene, saawe to Mboŋ Murei, Maaron aat ipaburigin ghau pa mateegh. *
Paulus izuari ghi pa taghoniiŋ Krisi ŋgar tooni
12 Yau nawatagh: Ŋgar to Krisi, yau nazaa pani soone. Tauta aazne, nazuari ghau pani. Pasaa, Yesu Krisi igham ghau namin le, leso nataghon ŋgar tauvene. *
13 Yam toŋvetaz to Krisi, yau nawatagh: Nakis suvinia ŋgar tane soone. Ve ŋgar eemon ta yau nataghoni, ene vene: Saa gabua tau muuŋ ivot na, matag ila pani muul mako. Yau nazuari ghau pa ghamuuŋ gabua tau igheen ila pa naghog. *
14 Aazne, ene imin yau naleep ila parlosaaŋ tiina. Tauvene tapirig pa landooŋ. Leso nala peria, ve nagham atuya tsiau. Ene lepoogh tomania Krisi izi nugh sambam. Iit tamtamon tau tapaak Krisi ve taleep ila tooni ne, Maaron ipoi ghiit tamin le, leso igham atuya tana pait. *
15 Iit tau tawatagh katin Maaron ŋgar tooni le ŋgar toit imatuugh, ene aat tagham ŋgar tauvene. Ve isaav ighe yam siriv ŋgar tsiam raraate imin yau mako, ene poia. Maaron tauu pale ipaghazoŋai ŋgar tsiam. 16 Eemon saa ŋgar poia tau iit taghazooŋ pani, iit aat mataan kisini, ve tataghon duduŋaini.
Tataghon yes tau titotoi ghiit pa ŋgar to Krisi
17 Yam toŋvetaz, ŋgar tau yau natotoia payam na, matamim kisini ve ataghoni. Ve yau mon mako. Tamtamon tisov tau laghooŋ toozi raraate imin yei ne, yes paam timin totoyaaŋ popoia payam. Tauvene aghit zi, ve ataghon zi pa ŋgar toozi. *
18 Pasaa, tamtamon katini, laghooŋ toozi tomania ŋgar toozi itotoi zi ighe yes tighur murizi pa Krisi, ve tighur koi pa ai pambarooŋ tooni. Saveeŋ tane, yau nasavia payam pai katini wa. Ve aazne, nayoli muul toman taŋiiz. 19 Tamtamon tauvene, taghon tala, ene pale tilalez. Pasaa, tibesbees pa ŋgar to ulizi imin maaron pazi, ve ŋgar toozi ilala pa gabua to taan mon. Ve ŋgar tau iit taghita taghe mayaŋa, ene yes tighita tighe ŋgar poia, ve tipakur zi pani. *
Sambam, ene nugh toit
20 Eemon iit nugh toit, ene sambam. Tauta taghurghur mataan pa Tiina toit Yesu Krisi, ve tasasaŋan saawe tau i pale ipul sambam, ve imuul izilam to igham mulin ghiit. *
21 Krisi, i tapiri tiina kat. I irau igham gabua naol isov to sambam ve taan tileep ila i saamba. Tauvene saawe to Mboŋ Murei ivot, i pale itoor anoŋaan to taan tau tisasaghat rekia na. Leso timin i tauu anooŋa tau poia kat, ve tisul toman mbonarizi tiina. *
* 3:1 2Kor 13:11+; 1Tes 5:16 * 3:2 Yes Yuda matazi veleghin ŋgavuun. Yes tighita tighe ŋgavuun, ene gabua tau iŋgalaaŋ ila Maaron maata mako. Pasaa, ŋgavuun tighanghan gabua mbuzazi. Ve tipaleel pa yes tau Yuda mako na tighe yes ŋgavuun. Eemon Paulus isavia saveeŋ ite muul. Pasaa, i isaav tauvene: Yes tau tiyaryaaŋ pa tutuuŋ to yes Yuda ve ravuuŋ tamtamon warozi, ta tiŋgalaaŋ ila Maaron maata mako imin ŋgavuun. * 3:2 Ga 5:2, 6 * 3:3 Ro 2:28+; Kol 2:11 * 3:4 2Kor 11:18, 21 * 3:5 Mbaŋ 22:3, 23:6; Ro 11:1; 2Kor 11:22 * 3:6 Mbaŋ 8:3, 9:1+; Ga 1:13+ * 3:8 Lu 9:24; Yo 17:3 * 3:9 Ro 1:17, 3:21, 10:3+ 3:10 Saawe tau Maaron ipaburigin Krisi pa mateegh, i itotoi tapiri tiina. Ve aazne, Krisi ireirei tapiri tawe pait pasaa, i iburig pa mateegh wa. * 3:10 Ro 8:17; 2Kor 4:10+; 1Pe 4:13 * 3:11 Yo 11:24; Ro 6:5 * 3:12 1Tim 6:12 * 3:13 Lu 9:62 * 3:14 1Kor 9:24+; 2Tim 4:7+; Hib 12:1 * 3:17 1Kor 4:16, 11:1; 1Pe 5:3 * 3:19 Ro 8:5, 16:18; 2Pe 2:1+ * 3:20 Ep 2:19; 1Tes 4:16+; Hib 12:22 * 3:21 Ro 8:29+; 1Kor 15:43+