10
Ŋeer ee ighason Yoova to ighur atuya iŋarui koiŋa
1 O Yoova, mindai ta uyooz soghan payau ve uul ghau mako?
Mindai ta naleep ila pataŋani loolo, ve uyooŋ payau ne?
2 Zeran sasaghati tipapait tauzi, ve tinanaan yes mbolaaŋa tau tirau gabua eta mako na.
Eemon ŋgar toozi saghati tau matazi iŋgali na, ene pale imuul pa tauzi ve ivaghamun zi.
3 Zeran sasaghati tipakur zi pa ŋgar saghati tau tighamghamu.
Monmon tighamgham ŋgar to tigham lezi gabua katini, ve tisiksik saveeŋ sosor pa Yoova, ve tiveleghi.
4 Zeran sasaghati tawe, tipakur tauzi pa ŋgar toozi. Tauta lolozi pa tiwatagh Maaron mako.
Ŋgar toozi iyaryaaŋ tighe: “Maaron irau ighur pataŋani payau mako. Pa Maaron eta ileep mako.”
5 Ve saawe isov, uraat toozi ilaan poia mon.
Tauta tinizi izaa, ve tigham ŋgar pa saawe tau Maaron pale igabiiz zi ve ighur atuya pazi ne mako.
Ve matazi veleghin koiazŋa kat.
6 Ve matazi iŋgal tighe: “Gabua eta irau igham ghei nirur ne mako.
Ve pataŋani eta irau ivot payei paam mako. Yei aat nileep poia mon taghon taghon gha ila.”
7 Saveeŋ sasaghati naol, tomania karom, ve paroiŋ ivotvot ila avozi irau saawe.
Saawe tau tisavia ŋgar sasaghati ve pataŋani tau tighe tigham pa tamtamon, ene igham zi lolozi poia kat imin tighan aniiŋ poia.
8 Yes tiyoŋyooŋ ila nugh ziige, ve tisasaŋan pa tamtamon popoiazi.
Tiŋgooz tauzi ve matazi inesnes pa yes tau tirau malmal mako na.
Leso tisaghav zi, ve tirav zi timaat.
9 Yes tiyoŋyooŋ ve tisasaŋan imin laion tau ileep ila su loolo ve maata ivotvot.
Tisasaŋan, leso tisaghav yes tau tirau malmal mako na.
Ighe tisaghav zi ila puugh toozi, ene tikis zi ve tigherev zi tila.
10 Tauvene tineneeŋ ve tisasaŋan pa saghavuuŋ zi. Saawe tau ighe eta peria, mako tisaghavu.
11 Ve matazi iŋgal tighe: “Maaron maata ilam payei mako.
Ŋgar tau yei nighamu, ene i irau ighita mako, ve iwataghi mako.”
12 Oyai, Yoova, uburig utotoi tapirim pazi lak!
Maaron tsiei, yes tau tinumeer ghom ve tibadbaad pataŋani na, lolom iveegh pazi sov.
13 Maaron, mindai ta yo upul zeran sasaghati tivelegh ghom?
Yes tisavsaav ila lolozi tighe: “Ŋgar tau yei nighamu ne, Maaron irau ipayooz ghei pa savsaveeŋ mako.”
14 Eemon Maaron, yo ughita gabua isov tau tighamu na.
Ŋgar sasaghati ve pataŋani maata maata tau yes tigham pa tamtamon na, yo uwatagh zi tisov ve igheen ila yo nimam.
Pasaa, yes mbolaaŋa tau tirau gabua eta mako na, tighur tauzi ila yo nimam ve tinumeer ghom.
Yo taum ta umin uleeŋa pa yes parooŋa.
15 Ve zeran sasaghati tau tighamgham taliiŋzizi na, urav matin tapirizi.
Uyat ŋgar toozi sasaghati. Leso ivot muul sov.
16 Yoova, i kinik tiina tau ighamgham pooz ta aazne, ve taghon taghon gha ila.
Nugh nugh tau tiwataghi mako ve tileep ila taan tooni na, i pale ipasov zi le tisov kat.
17 O Yoova, yes tau tinumeer ghom ve tibadbaad pataŋani na, yo uwatagh lolozi wa.
Yo aat ughur taliŋam pa taŋiiz toozi, ve upalot zi.
18 Yes parooŋa ve yes tau koiazŋa tighur pataŋani pazi na, yo taum uyooz pazi ve uul zi, ve ughur atuya pa koiazŋa.
Leso tamtamon sorok to taan tiparoi nugh muul sov.