11
Saawe tau ŋgar isov isaghat
Mbouŋ to David
1 Yau nanumeer Yoova ve nayooŋ ila tooni.
Mindai ta asaav saveeŋ to borauŋa payau aghe:
“Ughau uzala pa loloz, imin man tau iroi ve ighau izala na.
2 Ughita! Zeran sasaghati tiyooŋ ila ndoroom loolo,
ve tiyool paneegh toozi, tighur paneegh naatu ila ool,
ve tisasaŋan tighe tivanegh yes tau ŋgar duduuŋa igheen ariaaŋ ila lolozi na.”
3 Oyai, ŋgar ve tutuuŋ naol tau timin puughu pa lepoogh poia na, aazne tamtamon tivaghamunia le isaghat wa.
Tauvene ŋeer duduuŋa pale igham mindai?
4 Eemon Yoova, i ileep iloŋ ila rumei tooni patabuyaaŋ.
I kinik to sambam tau ileep ila niia to ghamuuŋ pooz.
Ve maata ighita tamtamon tisov, ve igagabiiz ŋgar toozi.
5 Yoova igagabiiz tamtamon duduŋazi ve yes sasaghatizi paam. Leso iwatagh ŋgar toozi.
Yes tau lolozi pa ŋgar to ravuuŋ tamtamon na, i loolo pazi rigta mako.
Ighur koi pazi.
6 Tauvene i pale igham yav ŋgilaaŋi tomania maet salfa tuntunu tau vaazi saghati na titap tizi, ve tivaghamunia zeran sasaghatizi.
Ve igham yaghur tuntunu kat ilam, leso ivaghamun zi. Ene atuya toozi.
7 Pasaa, Yoova itataghon ŋgar duduuŋa mon.
Tauvene i loolo pa yes tau tighamgham ŋgar duduuŋa.
Yes tau titaghon ŋgar poia na, ene pale tileep tomania, ve tighita naagho.