4
Suŋŋuuŋ to mboŋ
Mbouŋ to David
Ŋeer tau imuuŋ pa mbouŋ na, aat isaav pa tamtamon to tirav gita ve timbou mbouŋ tane
O Maaron, yau nataŋ rarai ghom.
Lolom isaghatin ghau, ve ulooŋ suŋuuŋ tsiau.
Pasaa, pataŋani igham ghau ve leg eez mako. Upas ghau navot pa pataŋani tane.
Leso upaghazoŋai ghau ila tamtamon matazi ughe ŋgar tsiau iduduuŋ ila yo matam.
 
Oyai, yam tamtamon tau atatan ghau ve avaghamunia ezag na, ŋeez o apul ŋgar tsiam tana?
Yam aghur lolomim pa ŋgar soroksorok tau le anooŋa mako na, ve ataghon ŋgar karom. Ŋeez o apuli?
Yam awatagh: Yes tau lolozi isaghav Yoova ariaaŋ ve titaghon eez tooni na, i isiigh zi timin i tauu le wa.
Tauvene saawe tau yau nataŋ raraini, i aat ighur taliiŋa payau.
Aroi pa Maaron, ve agham sosor muul sov.
Saawe tau yam aleep ila niamim to ghenooŋ, aneneeŋ, ve matamim iŋgal taumim, ve agham ŋgar poi pa saveeŋ tane.
 
Anumeer Yoova ve agham watooŋrau pani toman lolomim.
Leso watooŋrau tsiam iduduuŋ ila i maata.
Tamtamon naol tipasawal tighe: “Oyai, ŋeez o tagham lepoogh poia!”
Eemon yau naghe: “Yoova, lolom poia payei, ve utotoi taum payei.”
 
Yo ugham ghau tintinig ve lolog poia kat,
iliiv yes tau aniiŋ ve vaen anooŋa katini tivotvot ila uum toozi. *
Tauvene yau ateg izi ve nazi nagheen le lolog iveegh.
Irau naroi mako.
Pasaa, Yoova, yo taum matam payau ve uŋgin ghau naleep poi.
* 4:7 Pil 3:8