5
Suŋuuŋ to mboŋoozo: Taghason Maaron to iuul ghiit
Mbouŋ to David
O Yoova, ughur taliŋam pa aliŋag,
ve ulooŋ taŋiiz tsiau tane.
 
Yo kinik tsiau ve Maaron tsiau.
Saawe isov, suŋuuŋ tsiau iŋaŋarui ghom.
Tauvene ughur taliŋam pa taŋiiz tsiau tane ve uul ghau.
 
Yoova, mboŋoozo ta naol ne, yo uloŋlooŋ avog lutluutu.
Ighe nughizau, yau naghurghur ghasoniiŋ tsiau iŋarui ghom, ve naghur matag payo to uul ghau. *
 
Maaron, yo lolom pa ŋgar saghati mako kat.
Zeran sasaghatizi irau tileep tomani ghom mako.
 
Ve zeran pakuruuŋa irau tiyooz ila yo naghom mako.
Pasaa, yo ughurghur koi pa tamtamon tisov tau tighamgham ŋgar saghati. *
 
Yes tau avozi karom na, yo ureu zi tilalez.
Ve zeran tombanooŋa ve yes tau tiliŋliŋ siŋ pa tamtamon na, yo lolom pazi rigta mako kat. *
Eemon yo lolom isaghav ghau ariaaŋ ve uluul ghau itaghon saveeŋ mbuaaŋ tsio. Tauta yau irau naloŋ nalat rumei tsio.
Yau naroron payo, ve naput agheg payo ila rumei tsio patabuyaaŋ.
O Yoova, ŋgar tsio, ene iduduuŋ mon.
Ugham pooz payau, ve upaghazoŋai ghau pa eez tsio, leso nataghon duduŋaini.
Pa koiagŋa tighe tivaghamun ghau.
Saveeŋ onoon eta irau ivot ila avozi ne mako.
Lolozi isaghav ŋgar saghati mon to tivaghamun tamtamon.
Yamazi itortoor saveeŋ. Avozi imin naal tau aavo ikakaak.
Tisasavia saveeŋ ŋgoreeŋ naol to titombaan tamtamon ve tivaghamun zi. *
10 O Maaron, uvotia sosor toozi ivot ighazooŋ, ve ughur atuya pazi.
Ŋgar sasaghati tau tighamghamu na, upamuule ila pa tauzi ve ivaghamun zi.
Saawe isov, yes timamalaaŋ pa tutuuŋ tsio. Tauvene uziir zi tilalez.
Pa yes tizorzoor ghom, ve tighamgham taliiŋzizi.
11 Eemon tamtamon tisov tau tiyooŋ ilat tsio, ene aat tintinizi.
Yes pale timbou toman lolozi poia irau saawe.
Yes tau lolozi igheen tsio na, uvool toozi ve upoon zi.
Leso lolozi poia kat ve tipait ghom.
12 O Yoova, poia tsio izazaa to yes tau titaghon duduŋai saveeŋ tsio.
Yo lolom pazi ve poia tsio imin sigheu pazi.
* 5:3 Mbo 57:9, 88:13 * 5:5 Ro 1:18 * 5:6 Syg 21:8 * 5:9 Mbo 12:1+; Ro 3:13