79
Taŋiiz to yes Israela iŋarui Maaron pasaa, koiazŋa tireu Yerusalem
Mbouŋ to Asap
O Maaron, aazne nugh nugh tau tiwatagh ghom mako na, tilam taan tsio tane, ve tighe tighamu imin lezi.
Yes tivaghamunia rumei tsio patabuyaaŋ le isaghat,
ve tireu mbirisai nugh tiina Yerusalem.
 
Yes tirav besooŋa tsio timatmaat, ve tipul patazi tivaghengheen taghon taan paavo, leso man tighan zi.
Tamtamon tsio tau lolozi isaghav ghom ariaaŋ ve titaghon eez tsio, tauta mizazi imin gabua sagsagŋa lezi to tighani.
 
Koiamaiŋa tirav tamtamon tsiei katini, ve siŋ toozi ireer imin yaa irau Yerusalem loolo.
Ve tsiei eta ileep to itavi zi mako.
 
Tauvene nugh nugh tau tileep tigharau ghei ne, tighit ghei, ve tighamgham ŋalalaŋ payei.
Yes tiŋiŋiŋ payei, ve tivevelegh ghei kat.
O Yoova, pale ŋeez o lolom imuul ilam payei?
Pale uriuriu ghei, ve aatyavyav tsio ighanghan ghei imin yav irau saawe?
Pale aatyavyav tsio izazaa tsiei tauvene taghon taghon gha ila?
Ugham aatyavyav tsio izaa to nugh nugh tau tiwatagh ghom mako na, ve tiyamaan katini.
Ughur atuya iŋarui yes tau tisuŋsuŋ payo mako na, o poia.
 
Pasaa, yei tau Yakop paaghu tooni na, tiravuur ghei nisov.
Ve tivaghamunia taan tane, le nugh tsiei ŋginaaŋa.
Sosor tau muuŋ timbumaiŋa tighamgham zi na, ughur atuya izaa tsiei sov.
Lolom isaghatin ghei, ve rekia ulam uul ghei.
Pa aazne, saghatiiŋ tiina ivot payei gha nisaghat wa.
 
O Maaron, yo ta Uleeŋa tsiei. Uul ghei lak!
Leso eval tipait ezam pa tapirim ve poia tsio.
Upas ghei nivot pa pataŋani tane, ve ureu sosor tsiei. Pasaa, gabuam tauvene. Tauta tamtamon tipapait ezam.
 
10 Maaron, isaav ighe uul ghei mako, ene pale nugh nugh tisavia saveeŋ veleghiiŋ payei tighe:
“Laak, Maaron tsiam ileep sindei?”
Maaron, yes tau tiliŋliŋ siŋ pa besooŋa tsio na, uyat ŋgar toozi tawe, ve nighita.
Leso nugh nugh tiwatagh tighe yo ughurghur atuya pa ŋgar saghati.
11 Ulooŋ taŋiiz to yes tau tileep ila koiazŋa nimazi na.
Yes tau koiazŋa tighe tirav zi timaat na, ugham mulin zi. Pa yo tapirim tiina kat.
 
12 O Maaron, nugh nugh tisiksik saveeŋ veleghiiŋ payo.
Ŋgar toozi tawe, uyatu le uyat katini.
 
13 Ighe ugham tauvene, ene pale yei tamtamon tsio lolomai poia payo, ve nipait ezam pa poia tsio irau saawe.
Pale nisinai uraat tsio taghon taghon gha ila.
Pasaa, yei sipsip tsio, ve yo ŋginiiŋ tsiei.