80
Yes Israela tighason Maaron to iuul zi, leso tileep poia muul
Mbouŋ to Asap
1 O Maaron, yo ŋginiiŋ to yei Israela, ve yei sipsip tsio.
Yo ta umuŋmuuŋ pa yei paaghu to Yosep. Ughur taliŋam pa suŋuuŋ tsiei tane.
Yo uleep ila niam to ghamuuŋ pooz tau igheen izala aŋela ariaŋazi avarazi na.
Utotoi mbonarim ivot ighazooŋ payei.
2 Yo saksakim ve ariaŋam.
Uburig ve utotoi tapirim ila Epraim, Benyamin, ve Manase paaghu toozi matazi.
Ulam uul ghei.
3 O Maaron, uul ghei ve upalot ghei.
Lolom poia payei, ve ugham poghani ghei. Leso nileep poia muul.
4 O Yoova, yo Maaron saksakim ve uŋgin gabua naol isov.
Yei tamtamon tsio. Eemon atem yavyav payei, ve ulooŋ suŋuuŋ tsiei mako.
Pale ŋeez o aatyavyav tsio isov?
5 Yo ugham ghei nibaad pataŋani tiina le isooŋ katin ghei.
Tauvene nitaŋ tiina, ve nighun matamai suuru imin lemai yaa.
6 Yo ughur murim payei. Tauvene nugh nugh tau tileep tigharau ghei ne, tivazorai zi pa taan tsiei tighe tighamu imin lezi.
Ve koiamaiŋa tivevelegh ghei, ve tiŋiŋiŋ payei.
7 Yo Maaron saksakim ve uŋgin gabua naol isov. Uul ghei ve upalot ghei.
Lolom poia payei, ve ugham poghani ghei. Leso nileep poia muul.
8 Muuŋ, ai vaen ee iyooz ila taan to yes Isipa.
Yo usuru, ve ughamu ilam ta sene, ve uziir nugh tane tamtamona tighau, ve uvazoghi ila taan toozi.
9 Ve uzavaan puughu, leso itum poi.
Tauvene waria izila taan loolo kat, ve booga titum tila mamalau, le titav taan tane isov.
10 Ai vaen tane itum izaa izaa, le itav loloz to nugh tane, ve imin yavyaav pazi.
Ve ai mezepur tintiina tiyooz ila saamba paam.
11 Booga siriv tiraraav zi tila le tivot nari to te Mediterenian.
Ve siriv tiraraav zi tila le peria yaa tiina Euprates.
12 Mindai ta aazne ureu didiiŋ tau muuŋ ilivutin uum vaen tsio na?
Ughita. Tamtamon tau tilaghlaagh sorok na, tisov tilam tiloŋ tila ve tiyumyum anooŋa.
13 Ve ŋgai sagsag tisusus puughu ve tivavaghaaza,
ve gabua naol to su tighanghan anooŋa.
14-15 O Maaron, yo saksakim ve uŋgin gabua naol isov. Matam imuul ilam payei.
Uleep sambam ve matam izilam ughita ai vaen tau nimam tapir ivazoghi na. Isaghat wa!
Tauvene ulam ugharaata! Leso itum poi muul.
16 Aazne, koiamŋa tiŋgor ai vaen tsio izi, ve tisuruuva izala yav.
Ughit zi ve uyaon zi, ve upasov zi gha tilalez!
17 Eemon tamtamon tsio tau ileep ila nimam tapir na, uŋgin poghania ila nimam saamba.
Kinik tsiei tau yo taum usiigho ve ughuru pa uraat na, matam pani ve upaloti, leso igham uraat payo.
18 Ighe ugham tauvene, ene yei aat irau nighur murimai payo muul mako.
Tauvene uul ghei nileep poia muul. Leso nibees payo ve nipait ezam.
19 O Yoova, yo Maaron saksakim ve uŋgin gabua naol isov. Uul ghei ve upalot ghei.
Lolom poia payei, ve ugham poghani ghei. Leso nileep poia muul.