94
Maaron iyatyat ŋgar saghati to tamtamon
1 O Yoova, yo Maaron tau uyatyat ŋgar saghati to tamtamon.
Utotoi ŋgar tsio duduuŋa ivot ighazooŋ, ve ughur atuya pa zeran sasaghati.
2 Pa yo ta ugagabiiz tamtamon tisov to taan ve ughurghur atuya pazi.
Tauvene uburig gha ughur atuya iŋarui yes tau tipapakur tauzi na.
Upamuul ŋgar toozi sasaghati imuul ila pa tauzi, o iduduuŋ.
3 O Yoova, zeran sasaghati tighamgham tinizi, ve lolozi poia pa ŋgar tau tighamghamu we.
Pale ŋeez o upasov ŋgar toozi tawe?
4 Yes tau tighamgham ŋgar saghati na, saveeŋ pakuruuŋ naol ivotvot ila avozi.
Aliŋazi izazaa, ve tipapait tauzi pa ŋgar toozi tighe yes tirao.
5 Yoova, ughita. Yes tighamgham saghatin tamtamon tsio.
Yes tau yo ugham zi timin lem na, zeran tawe tighamgham pataŋani tiina pazi.
6 Ve tiravrav zinaara ve yes parooŋa timatmaat.
Ve loomba tau tileep tomani ghei izi nugh tsiei ne, tirav zi paam.
7 Ve matazi veleghin ghom tighe: “Ah, Yoova ighit ghiit?
Ŋgar tau taghamghamu ne, Maaron to Yakop irau maata ila pani mako.”
8 Yam zeran sasaghatmim, lemim ŋgar mako imin borauŋa!
Pale ŋeez o ŋgar tsiam ivot ve aghilaal?
9 Maaron ta igharaat taliŋamim. Irau ilooŋ saveeŋ tsiam mako?
Ve i ta igharaat matamim. Irau ighit gham mako?
10 I ighurghur pataŋani pa tamtamon to nughmariŋ, leso ipaduduuŋ zi. Pale ighurghur gham?
Ve i ta ighamgham tamtamon lezi ŋgar. Mindai, aghe i le ŋgar mako?
11 Ŋgar naol tau igheen ila iit tamtamon loloon na, Yoova iwataghiir zi tisov.
Ve i iwatagh: Ŋgar toit katini, pale anooŋa mako.
Ene isov rekia mon imin yaghuraan tau ivotvot ila avoon.
12 Yoova, tamtamon tau ighe yo ughur pataŋani pani to upaduduuŋa,
ve upaghazoŋaini pa tutuuŋ tsio,
ene aat poia tsio tau izaa tooni, ve loolo poia kat.
13 Tamtamon tauvene, isaav ighe ileep ila pataŋani, yo pale uule.
Leso aate izi, ve isasaŋan le irau titai puura pa yes zeran sasaghati ve titap tizila.
14 Yoova irau ighur muuri pa tamtamon tooni ne mako.
Yes tau i igham zi timin le na, loolo iveghai zi mako.
15 Ve i pale ipaduduuŋ yes pooza, leso tigharaat pataŋani to tamtamon itaghon ŋgar duduuŋa.
Ve tamtamon tisov tau ŋgar duduuŋa igheen ariaaŋ ila lolozi na, yes pale tipalot ŋgar tauvene paam.
16 Isaav ighe tamtamon tigham saghatin ghau, sei pale iyooz payau ve iuul ghau?
Ve sei ta iponpoon ghau pa zeran sasaghatizi?
Ite paam mako. Yoova mon.
17 Imin ta Yoova iuul ghau mako, kanaŋ namaat rekia mon gha nala nugh tau le oroora mako na.
18 Yoova, saawe tau naghe pale natap pa ghuruuŋ ila tsiau,
ŋgar tsio tau lolom isaghav tamtamon tsio ariaaŋ ve uluul zi na, tauta ipalot ghau gha nayooz tuŋia.
19 Ve saawe tau lolog ipataŋan ve nagham ŋgar naol,
yo urav ateg, ve ugham lolog poia muul.
20 Yes pooza sasaghati tau tighurghur tutuuŋ naol to tivaghamunia tamtamon na,
yo irau upaak zi pa ŋgar toozi tawe mako.
21 Yes tilup zi ve timbu saveeŋ to tivaghamunia zeran duduŋazi.
Ve yes tau lezi sosor mako na, yes pooza tawe tighur saveeŋ tighe yes aat timaat.
22 Eemon Yoova, i imin didiiŋ ariaaŋa payau, leso nayooŋ ila.
Maaron tsiau iponpoon ghau imin maetaaz tau izala kat.
23 I pale ipamuul ŋgar sasaghati to zeran tawe imuul pa tauzi ve ivaghamun zi.
I pale ipasov zi tomania ŋgar toozi sasaghati tawe.
Yoova tau Maaron toit, pale ipasov zi le tisov kat.