95
Mbouŋ to poiŋ tamtamon pa suŋuuŋ
1 Alam tambou ve tapakur Yoova.
Tintiniin, ve tayoor eeza.
Pa i Uleeŋa toit ariaaŋa tau iponpoon ghiit pa koiaanŋa imin maet tiina.
2 Alam tala tayooz ila naagho, ve tapakuru pa poia tooni.
Aliŋaan izaa, ve tambou toman tintiniin, ve tapaiti.
3 Pasaa, Yoova, i Maaron tiina.
I kinik tiina kat tau iliiv zimaronŋa tisov.
4 Gabua naol isov to taan tigheen ila i niima.
Taan puughu ta siiŋa we, le izala loloz daaba paam, ene i iŋginiir zi tisov.
5 Te tomania taan, ene gabua tooni mon.
Pasaa, i niima ta ighur zi.
6 Yam alam talup ghiit ve tasuŋ pa Yoova.
Tatud pani ve taput agheen ve tapakuru. Pasaa, i ta ighur ghiit.
7 I Maaron toit, ve iit sipsip tooni.
I iŋginŋgin ghiit ve maata pait.
Taleep ila i niima, ve i tauu ipanpan ghiit.
Aazne, ighe yam alooŋ Yoova aliiŋa ve ataghoni, o poia.
8 I isaav payam ighe: “Apoon lolomim payau ve agham taliiŋzizi imin muuŋ timbumimŋa tighamu izi nugh ŋginaaŋa to Meriba ve Masa na sov.
9 Saawe tana, yau nagham uraat tintiina ila sosozi, ve tighita pa tauzi matazi wa.
Eemon tighur ilam tsiau mako. Ve tinoknok tovaaŋ ghau.
10 Tauta lolog pazi mako kat irau ndaman tamoot ru.
Ve nasaav naghe: ‘Zeran tawe, lolozi pa titaghon ŋgar tsiau mako. Monmon tisosor pa eez tsiau.’
11 Tauta nasaav ariaaŋ pazi toman ateg yavyav, ve napariaaŋ saveeŋ tsiau naghe:
‘Onoon kat. Nugh to mariaoŋ tau yau naghuru pazi na, yes irau tiloŋ tila mako le mako kat!’ ”