Sepinien xa diamu te
2 Sion
?Visi iaxa tetis uvei ak?
Eloheoh Sion Sepeti tetis uvei ak tetutou ni melele xa tetis uvei xa tetiamu xa rakesi ni 1 Sion sangas ni huram 90 AD (huram xil tetutou ni poten na Iesu).
?Visi iaxa tevuli uvei ak tetiamu?
Sion tehiteni tehit tetis uvei ak teha mi sias tei xa tekes xuxus ni ni ‘atou xa Hi tehosei tehe nan e mi horamue nan xil.’ E melele nen ak, moletin xil holu di latepol ni texeih teha xat Kristin xil ve neketen nae. Ve rin ak, Sion ien ti tenavei vahit rat his moletin xil, ma di tesoson sepinien nan e uvei ak.
?Sion tetis uvei ak veneh?
Sion ien tehei vasel xat Kristin xil tengan iexil ihei xil mun - Sion tetis holu usil eheien xa momal tengan Kristin xil ti lipisen ni mi Kristin sav xil.
Sion ien tehei tengan vasel xat Kristin xil tengan linahusil ti titsa te luvosen xil - Sion tehiteni xa ngan xil xa latake reitin ti xa Iesu Kristo temei tehe moletin reitin xa tenben teta, xil latave Kristin reitin ti. Misak ni, moletin xil na Hi linahur pilei titsa te luvosen xil ti e linake reitin ti e pispisien nae xil.
Nenemien tei xa eilep te uvei ak de 2 Sion 1:9
Ngan xil xa di lasorin ni neta ngan mun ba xat pispisien xil na Iesu Kristo, xil latavisti ti vatel Hi. E ngan xil xa di langgusil xat pispisien xil na Iesu, xil di labisti del Hi e del Natneli.
?Naha iaxa di e uvei ak?
1. Selxatien tengan Kristin xil ti lihusil xat kuh rae te eheien xa Hi tesa ni. (1:1-6)
2. Selxatien tengan Kristin xil linahusil ti ngan xil xa pispisien nae usil Iesu Kristo tahusil reitinen ti. (1:7-13)
1
Sepkilaen na Sion usil uvei ak
1 Inou, xa lakes nou ni Elda, iaxa di nadis uvei ak.
Nadisi ba mi Atou xa Hi tehosei tehe nan e ba mi horamue nan xil: ieok bei xamim reitin, e tave nou ti kestang, ngan xil mun xa lakil reitinen iexil bei xamim.
2 Vengan xa reitinen ak di e xir, iti e xir vehakut.
3 Nasis tengan Hi Tata e Natneli, Iesu Kristo, lalisa eheien hos, esaeen e tomat nalu mi xir. Xatel latiti e meulien nar e melele xa di iexir bei xir e di ranggusil xat reitinen.
Selxatien tengan rihusil sexien te eheien e pispisien te reitinen
4 Di nabesi nou holu pupu melele xa natehur longeongen xa rut horamue nam xil di langgusil reitinen nggoni ngan xa Tata tesemae ni.
5 Navan xil li, bos xa taxeak ti iexir ihei xir. Naha xa di nadisi bat mi xamim tave sepinien hu ti. E‑e, be sepinien tei xa ratehuri ngamu e melele xa rateneket rohon.
6 Di rapisen eheien xa be reitin melele xa kakaoen nar di nggusil xat rae xil na Hi. E rae xa mutelonge tetiamu, e melele xa muteneket rohon temak: kakaoen namim ti ihusil xat sexien te eheien.
7 Moletin te luvosen xil holu di lakapis e ut etan, ngan xil ak latake reitin ti xa Iesu Kristo temei tehe moletin xa tenben teta. Hisit moletin xa mak be vat luvosen tei e be elu mi Iesu Kristo.
8 Mak, ma muketeh kuhi tengan huit neketen xa di rapol vituei ven nakesae ti ra xamim. Io, musoh ixeih tengan muhur sen huit neketen namim.
9 Ngan xil xa di lasorin ni neta ngan mun ba xat pispisien xil na Iesu Kristo, xil latavisti ti vatel Hi. E ngan xil xa di langgusil xat pispisien xil na Iesu, xil di labisti del Hi e del Natneli.
10 Mak, ma xosxa moletin tova bemei mi xamim xa pispisien nan tahusil reitinen ti, ma munakesi ti munahit xi be tuemim tei te neketen, e munahur pilei ti namei e tim samim.
11 Mupol ni imak vengan xa ngan xa di nggur pilei hisit moletin xa mak nggoni ngan xa be tuneli, xi pisen ni xa di bisti del moletin ak e sexien tesa xil xa xi di pol ni.
Sepinien kor
12 Holesok xil holu di xa nakila namiteni mi xamim, e ieok ti tavei tengan matisi vahe uvei tei. Ieok bei mak mu tengan nihat nisao ni xamim tengan ripus xir e ti risepin vituei. Imak, ma xir vus rihesi xir mak mu.
13 Inggak, horamue xil na Tumahin, ngan xil xa Hi tehosei xil, xil di labit bos makoe nae minuk.