Sepinien xa diamu te
3 Sion
?Visi iaxa tetis uvei ak?
Eloheoh Sion Sepeti tetis uvei ak sangas ni melele xa tetis 2 Sion e huram 90 AD (huram xil tetutou ni poten na Iesu).
?Visi iaxa tevuli uvei ak tetiamu?
Sion tetis uvei ak mi Nggeas xa tehe moletin hos tei na Hi e sias tei e tan xa mahulong te hal Esia. E uvei ak, Sion di misepin usil moletin tol: Nggeas, Diotrefes, e Demitrias.
?Sion tetis uvei ak veneh?
Sion ien tehei tengan vapet rat Nggeas xal Demitrias - Sion telonge xa Nggeas tehur pilei Kristin tei, tave ti neta xa tehur longpangasien ven. Tesak ni, Sion temesi ve sexien hos xil xa tepisen ni. E Sion tesel xat Kristin xil tengan lihur pilei Demitrias xa meulien nan tehusil xat reitinen na Hi.
Sion ien tehei tengan vasel xat vat tei xa di po xi ni nenemien nan - Sion tesel xat moletin xil tengan linahusil ti mun Diotrefes, vat tei te sias ak, vengan xa di tesin rae na Sion e di tepo xi ni nenemien nan.
Nenemien tei xa eilep te uvei ak de 3 Sion 1:11
Tuxoli, onahusil ti neta xa misa. E uhusil kes ni neta xa bos. Ngan xil xa sexien nae bos, xil labe na Hi. E ngan xil xa sexien nae misa, xil di lapisen ni xa latakil ti Hi vari.
?Naha iaxa di e uvei ak?
1. Sion tepet rat moletin tei xa tehur nenemien te tutouen. (1:1-8)
2. Sion tesel xat moletin tei xa di po xi ni nenemien nan. (1:9-15)
1
Sepkilaen na Sion usil uvei ak
1 Inou, xa lakes nou ni Elda, iaxa di nadis uvei ak.
Di nadisi ba mi Nggeas, tua hos navan e reitinen xa eheien navan di en.
2 Tuxoli, natelongeong ni xa neketen nam di meul bos, e di nasis mi Hi tengan tenbom e holesok sav xil mun te meulien nam ihos.
3 Namaal pupu melele xa rut Kristin xil latemei visal nou e latesep usil kakaoen nam minou. Latehit rati xa tetep iaxa di onggusil pispisien te reitinen e meulien nam.
4 Neta tovuol vasak ni nou namaal mak mu vali melele xa natelongeong ni xa horamue navan xil e neketen di langgusil suse te reitinen e meulien nae.
Sion memes Nggeas ve tutouen xa tesa ni mi mosav xil
5 Tuxoli, namesuk ve polien hos xa di opol ni mi tua nar xil xa di langgusil suse nae tengan lava lavithiten longeongen hos usil Iesu mi moletin xil. Tave ti neta xa otakil ti xil, e di omaen xil tengan lati vuteili visaluk.
6 Eheien xa di opisen ni mi xil, rute xil latesep usili mi Kristin xil inggak. Ihos pupu xosxa xouk utit ni ngan taxa ti ututou ni xil e uling rilomun ni xil e suse nae ixo sexien xa isak ni Hi ilonge ihos ven.
7 Ihos tengan utit ni ngan taxa ututou ni xil vengan xil di lakakao ve polien na Iesu Kristo e latahur tutouen ti vaxo ngan xil xa latake reitin ti e Hi.
8 Mak, ma bos pupu xa xir Kristin xil ti ritutou ni hisit moletin xil xa lamak. Isak ni, ripol vituei e polien nae ve reitinen.
Selxatien usil Diotrefes e Demitrias
9 Tetiamu, natetis uvei tei tehat mi moletin xil te sias nam. E Diotrefes, xa ien bei vapo rat xi mei vahe vat te sias, xi tesin rae navan.
10 Misak ni, melele xa nihat, nihit rat holesok xil vus xa xi di pol ni tengan valuvos moletin xil vahit xamem di mapol ni sexien xil xa tamal ti, e ngan ak tave reitin ti. E del xat rin ak, xi tahur pilei Kristin xil ti xa di lapol ni polien na Suv. Di, xi di misikoe xol ngan xil te sias mun xa iexil bei tengan lavur pilei xil. !E di misil rerat xil mun ra sias vari!
11 Tuxoli, onahusil ti neta xa misa. E uhusil kes ni neta xa bos. Ngan xil xa sexien nae bos, xil labe na Hi. E ngan xil xa sexien nae misa, xil di lapisen ni xa latakil ti Hi vari.
12 E rin na Demitrias xa di nasila bat mi xouk, ihos xa uhur pilei. Moletin xil vus lapet rat hisen e meulien nan nggusil reitinen e di pisen ni xa xi be moletin hos tei. E xamem mun mabiteni xa xi be moletin hos tei e xouk okila xa naha xa di mabit rati be reitin.
Sepinien kor
13 Holesok xil holu di xa nakila namiteni minuk, e ieok ti tavei tengan natisi vahe uvei tei.
14 Ieok bei mak mu tengan nihat nisao ni xouk nave nousav ti tengan ralipus ralu e ti ralisepin vituei.
15 Nasis tengan tomat na Hi iti minuk. Tua nam xil inggak di labit bos makoe nae bat minuk. Uhit bos makoe namem iha mi tua nar xil kekes xa ladi inggaxai.