10
Gwo jin Rumu Ap̱o/ Mii jin Luŋu Tomp̱inycon mo
Aha/ ŋap̱a um mo mmomish mo mo iwaḵ mo, ki ibabam bana ’baar mo ’kokin mo e bwaŋ’kwariny ma raḵ mo dhali uni ’baar mo pekin isi bwaman yi’deŋ ḵumma/ mo. Dhali uni ’baar mo ’kokunu mo mmocuc̱ mo ki mii ma Musa mo eya raḵ mo dhali ki ḵumma/ yi’de/ mo be. Dhali uni ’baar mo shwaki tonṯen ṯal ’de/ mo jin ta to gi shi/in mo dhali uni ’baar mo p̱iki tomp̱in ṯal ’de/ mo jin ta ki ji gi shi/in mo. Haali/ uni p̱ikin ’peni to gi shi/in yan jin ta wosh mo jin baṯẖki uni nsho’k mo dhali Wosh yan mo tani a’di ta’da Ḵrisṯẖos mo be. Bahili unin tiya ka woho/ mo tani Arumgimis dina bwa ki ’bor mo gom uni mo haali/ uni ṯa’kkunu mo e bwam ma sho mo be.
Dhali to gwansan uni ta gwo kun rumu gom ana mo ki ana mina bwa ’koki o mo mmomii tonthus mo me’d uni mo be. Dhalku/ ki luŋ tomp̱inycon mo me’d unin tiya mo me’d gwo jin ’kwarkunu mo ki: ’Kwani gwansan uni ’koki ’pena ’cesh mo mmoshwa to mo dhali mmop̱i to mo dhali mmocu mis mo mmosa mo be. Ana mina mii ’koki dhal is bana bway mo e mo jin miinu miinyc̱al mo me’d kun tiya mo kun miikin kan mo dhali ’kwani kun tana alaap̱i iss* ’kwanimpa ’de/ i’ce’dka kwara mo kun ṯa’kki jwa mo me’d ḵurkun ka tente/ mo. Ana mina mii dhalku/ Tap̱a ki mii pal mo me’d jin miikina kun tiya mo dhali uni ’ce’dkunu sho’k mo ki tasha/ kun shi/ ma ṯi’d ki shi/ mo. 10 Walla ana mina mii dhalku/ ki miiya gumgum mo me’d kun tiya kun miikin mo dhali uni ’ce’dkunu sho’k ka Man’ce’d uni Sho’k mo be. 11 Dhali mii gwansan miiki uni mo mmota to kun rumu uni mo. Hili uni ’kwarkunu mo gom mo jin minu ye’th sho’k bana mo, ap̱o/ ana kun ’kona ki she/ yil yan jin midi di ’kup̱ jin midi p̱u’du/ mo be. 12 Wakan ba/ dhalki a’din ’de/ yin jin kulum gwo ibwa mo ki a’di mishi dosh mo tani dhalki a’di hil miim piti i e ki ’bore/ mo isi ciki/ a’di midi la kum ’twa/a ’cesh mo. 13 Mompaluŋ kamu/ yisa di’da jin midi bu’th /e mo jin diki pal wathi/ en’thiŋ kamu/ mo. Hili Arumgimis a’di ta ji gi isiŋ gana/ mo dhali a’di midi diki dhal /e ki /e minu pal mo mmo’ce’d mom’bi’th pini ap̱o/ mo. Hili ki mompal mo tani a’di si’da/ midi ḵwa/ /e bway mo mmoye mo jin mina /e mish a’di ’dim ’kup̱ ki sule/ mo be.
14 Wakan mo um pem gun enka/ mo ship̱iṯi/a ŋwac̱a/ mo ’peni mo jin luŋu tomp̱inycon mo. 15 Aha/ ona gwo e um mo me’d ’kwani kun ta gi yuḵ mo. Nyiṯẖi a’di ki is bum mo ma, a’di jin oka/ mo. 16 Aḵubbaaya gi mom’boru mii mo a’di jin ’bora ana a’bor mii mo tani a/a’di diki ta mii jin nyaḵu to bu’th mo goma bas ma Ḵrisṯẖos mo ’taa? Dhali maaŋḵuthu’d jin ’ce’dkina ana mo tani a/a’di diki ta mii jin nyaḵu buŋgwar is ma Ḵrisṯẖos bu’th mo ’taa? 17 Haala guraasa maaŋḵuthu’d ṯal ’de/ mo, ba ana kun tana ris mo tani ana ṯala ’de/ e buŋgwar isa ’de/ mo be. Haali/ ana ’baar mo nyaḵkina guraasa maaŋḵuthu’d yan mo be. 18 Hili mii jin boṯa ’Kwani ma Israyiil mo. ’Kona uni gwansan kun ’ka to jin ’ciṯẖu/ ’kus mo mmomiiya bas mo e shemena gwaṯa/ jin miinuwa bas mowa? 19 Ki gwo jin oka/ ta’da ta saye? Ki tonṯe/ gun thenu tomp̱inycon mo tani ta toŋ kamuwa? Walla ki ji gi ta p̱inycon mo tani ta toŋ kamuwa? 20 Yisa. Gwo jin oka/ mo tani oka/ gom uni gun dar ki ji gi luŋuŋ gana/ mo tani uni ’ciṯẖki to/e ’kus mo mmotheya ruma ’cesh mo, yisa Arumgimis gana/ mo. Aha/ dinaki ŋap̱ um mo mmonyaḵ to mii ka ruma ’cesh mo. 21 Um mini mola ḵubbaaya gi Tap̱a p̱i mo dhali p̱iya ḵubbaaya ma ruma ’cesh ka yiha/ mo. Um moli ’kowa tharabeesa gi Tap̱a mo dhali ’kowa tharabeesa ma ruma ’cesh ka yiha/ mo. 22 A/mina ana rukuny Tap̱a mmoṯa’c bwa mowa? A/ana tana gi ’bi’th mmobol a’di e mowa?
Miiyi Aris To ’Baar mo gom Monyca ma Arumgimis mo
23 Aris to ’baar mo dhala gwoŋḵan aha/ bway mo. Hili, aris to ’baar mo ’koki ta to gun woṯẖina woṯẖ mo. Aris to ’baar mo dhala gwoŋḵan aha/ bway mo. Hili aris to ’baar mo yisa nyaŋi is mo yisa. 24 Wathin ’deŋ kamu/ midi mii dhalku/ ki ŋap̱ tom ’boron gom is piti mo. Hili a’di midi ŋap̱ tom ’boron goma man’dish gu’b is ki a’di mo. 25 Shwayi ma to gunn gun yolu mo e mo ma suug mo ki dar gi ’twaŋ kamu/ jin minu ’de’k mo mmodoṯ gwo mo gom gway gi ’twa/ ma du mo. 26 Haali/ mony’cesh yansan mo tani ta ji gi Tap̱a mo dhala ris to ’baar mo gun ’kon e a’di mo be. 27 Waḵki/ jan ṯal ’deŋ kamu/ ’peni uni gun daran gi gwo jin gamu is mo tani c̱i uma yuḵ mo mmoshwa tonṯe/ mo dhali um ’kona bwa mo mmo/ii mo tani shwayi ma, ma a’diyin jin minu kara bori um mo ki dar gi ’twaŋ kamu/ jin minu ’de’k mo mmodoṯ gwo mo gom gway gi ’twa/ ma du mo be. 28 Hili waḵki/ jan ṯal ’deŋ kamu/ o um gwo mo ki: To yansan mo tani a’di thekunuwa rum mo tani dhalki a’di ki shwa mo. A’di oka/ mo gom gway piti jin ṯorki um a’di mo dhali gom gway gi ’twa/ ma du mo tani 29 ’pemen gwom pem jin oka/ mo gom ’twa/ ma dum piti mo tani diki ta jim bum mo be. Haali/ ata mina mom pem jin dika/ ki ’kus mo ta a’di jin minu waḵ mo ki ’twa/ ma du gi wathiŋ kamu/ mo? 30 Waḵki/ aha/ nyaḵa to bu’th ki mo jin ’boruwa ’bor bwa i is mo tani kataye c̱inu ’twa/ waḵ ap̱o/ aha/ mo gom to c̱aan jin c̱ika/ mo ki mo jin ’boruwa ’bor bwa i is mo?
31 Wakan waḵki/ um ki shwa to mo walla p̱i to mo walla a’diyin jin miina um mo tani miiyi a’di ’baar mo gom monyca ma Arumgimis mo. 32 Dhalku/ ’Kwani Yahuuda/ ki c̱i e mo mmokol mo walla ’Kwaniŋ Griḵi mo walla ’kwaniŋ ḵaniisa ma Arumgimis mo be. 33 Jasi gom miim pem jin palka/ mo mmo’bora ris ’kwani bwa ’baar mo tani e to ’baar mo kun miika/ mo, yisa mmosimmka/ shi/ miim ’boron pem gana/ e mo hili gom ’kwani ka ris mo ki uni minu ta is ki me’d mo be.
* 10:8 ṯalaaṯa wa ishriin alip̱