11
1 Tayi imanthoḵ aha/ mii mo ma, me’d jin taka/ amanthoḵa Ḵrisṯẖos mii mo be.
Mii jin Mina Up̱i Kum ’Kup̱ ki Burrinye/ mo
2 Aha/ maŋa um mo haali/ um kayaa/ e mo eya ris to ’baar mo dhali mmodhu gwo jin luḵu um mo isi me’d jin c̱ikika/ uni um mo be.
3 Hili aha/ ŋap̱a um mo mmomish gwo ’ban mo ki a’di jin ta’da ’kaŋ’kup̱ gom ’kwani ’baar mo tani ta’da Ḵrisṯẖos mo be. Dhali a’di jin ta’da ’kaŋ’kup̱ goma ’bom mo tani ta wathiŋ gwaṯẖ ma yim mo dhali a’di jin ta’da ’kaŋ’kup̱ goma Ḵrisṯẖos mo tani ta’da Arumgimis mo be.
4 Ma ’kwani gunn kun ’thon mo walla o gwo jin onu is mo ki ’kup̱ buni kumu ki to mo tani uni mii miin ’thalkina/ gom ’kup̱ buni mo be.
5 Hili ma up̱ gunn kun ’thon mo walla o gwo is mo ki ’kup̱ buni ’konuki kum ki to mo tani uni mii miin ’thalkina/ mo – a’di ta mii jin nyaḵa’d si’da/ gi mii jin ’thin ma yima mur mo.
6 Haali/, waḵka ’bom midi diki hi’th to i’kup̱ gom is piti mo tani ayim midi ’taki ’ciṯẖa/ mur’kup̱ piti mo be. Hili waḵki/ a’di ta miin ’thalkina/ mo goma ’bom mo mmo’ciṯẖa/ mur’kup̱ mo walla mmo’thiya mur’kup̱ mo tani dhalka yim hithi burrinyeŋ ’kup̱ mo ma.
7 Haali/ wathiŋ gwaṯẖ ḵa ba/ midi diki kum ’kup̱ piti ki to mo haali/ a’di ta jamas ma Arumgimis mo dhali monycam piti mo be. Hili ayima ’bomi a’di ta monyca gom wathiŋ gwaṯẖ mo be.
8 (Haali/ wathiŋ gwaṯẖ yisa uḵu ’pena ’bom mowa, hili a’bom ’peni wathiŋ gwaṯẖ mo be.
9 Wakan si’da/ wathiŋ gwaṯẖ dinuki uḵ goma ’bom mo, ayima ’bomi gom wathiŋ gwaṯẖ mo be.)
10 Ki a’di gi wakan mo tani a’bom ḵa ba/ midi mii ta gi burrinyeŋ ’kup̱ mo gom gway gi iman’doyu gwo mo.
11 Bahili e Tap̱a mo tani a’bom mol is piti yip̱ mo ki dar gi wathiŋ gwaṯẖ mo dhali wathiŋ gwaṯẖ mol is piti yip̱ mo ki dar ga yima ’bomi mo be.
12 Haali/ me’d jin uḵuwa yima ’bomi mo ’peni wathiŋ gwaṯẖ mo tani wakan si’da/ wathiŋ gwaṯẖ shwane/ dhodhu mo ’pena yima ’bomi mo be. Dhali aris to ’baar mo ’kon mo ’peni Arumgimis mo be.
13 Nyiṯẖi mii ki is bum mo ma. A’di ha me’d mo goma ’bom mo mmo’tho Arumgimis mo ki dar gi ’kup̱ ma yim jin kumu mo ki burrinye/ mo ’taa?
14 Dina to gi mony’cesh ki is piti ki ṯor um gwo mo jin mina wathiŋ gwaṯẖ ḵala mura ’calalga/ e ’kup̱ piti mo tani a’di ta mii jin ’the a’di is mowa?
15 Hili waḵka ’bom ta’d ga mura ’calalga/ mo tani a’di ta to jin min ma yimi kar is ki ca moyi. Haala mur’kup̱ ma yim c̱ikunu a’di mo mmodiḵ ’kup̱ e mo be.
16 Waḵki/ wathin ṯal ’deŋ kamu/ dina gwo mbwa mo mmorukuny mii mo tani ana mina ush ki ’tash mo haali/ miiŋ kamu/ yisa di’da jin boṯkunu mo, walla mii jin miina ’kwaniŋ ḵaniisa ma Arumgimis mo.
Mii jin Miinuwa Tharabeesa gi Tap̱a ki Shi/ mo
17 Hili e gwom pem jin baṯẖ a’di i’ko’d jin miga/ ye’th um sho’k mo tani aha/ dinaki maŋ um mo haali/ ki um tuli is mo mmonṯal ’de/ mo tani a’di yisa gom shi/ miim ’boro’da, hili gom mii jin shi/a um ’teki shi/ mo be.
18 Haali/ gwom pem jin ta jin ṯwa/a/ mo a’dihe/ ba/. Ki um tulki is mo mmonṯal ’de/ mo eya ḵaniisa mo tani aha/ ciḵa gwo ki mo ma ḵwam bwa di’d e bwam um mo be. Dhali aha/ meṯa/ mo me’d mo mmogam a’di is mo be.
19 Haali/ mo ma ḵwam bwa midi mii di mo e bwam um mo, kan ki unin tiya kun ta ’kwaniŋ gana/ mo e bwam um mo tani uni minu nyiṯẖ mo be.
20 Ki um tulki is mo mmonṯal ’de/ mo tani a’di yisa ta tonṯe/ gi Tap̱a jin shwakina um mowa.
21 Haali/ e mo jin shwanu to mo tani kun tiya ka ’deṯe/ ’deṯe/ mo tani shwaki tiya to i e mo jin ta tonṯem buni mo dhali jan ’deŋ kamu/ mo tani ’koshkina ṯe/ mo dhali jaŋ kamu/ mo tani ’koshkin ma su mo be.
22 Aggi. Ki um ’koki ta gi gu’b mo mmoshwayi to nycine/ mo dhali p̱iyi to mowa? Walla ḵaniisa ma Arumgimis ṯẖu’thkina um mii mbwaman kan mo dhali ’the uni gwansan is kun dar gi to mo kana? Ki gwo gi wakatinta mmiga/ i/o gom umi? A/miga/ maŋ um gom gwo gi wakansana? C̱awwo/. Aha/ mina ush ki ’tash mo be.
Mo jin Karu Mii mo goma Tharabeesa gi Tap̱a mo
23 Haali/ aha/ bu’thkina gwo ’peni Tap̱a mo, a’di si’da/ jin c̱ikika/ um mo, ki Tap̱a Yesus ki mon’thiny yan ki a’di ’ciṯẖkunu is ki gwo mo tani a’di bu’thki maaŋḵuthu’d mo
24 dhali ki a’di ’borki’da ’bor bwa i is mo tani a’di ki ’ce’d a’di mo dhali o gwo mo ki: Yansan ta is pem jin ’ce’dki’d gom um mo. Miiyi mii yansan mo ma mmoka aha/ e mo.
25 E mii yan jin nyaḵki’d si’da/ mo tani a’di bu’thki’da ḵubbaaya mo i’ko’di tonṯe/ mo mmo/o gwo mo ki: Aḵubbaaya yan a’di ta gwon this jin gamu me’d goma bas pem mo. Miiyi mii yansan mo ma me’d gunn kun p̱ina um a’di mo tani e mii jin mina umi kayaa/ e mo be.
26 Haala risa cim gunni ’baar mo kun ’kana um maaŋḵuthu’d yan mo dhali kun p̱ina uma ḵubbaaya yan mo tani um ki c̱i mii eya tente/ wu gi Tap̱am bum mo ntaga tee jin mina a’di p̱u’du/ mo be.
Mii jin Budhu To Atharabeesa gi Tap̱a ki Mii kun ’Koki Ha Me’d mo
27 Wakan a’diyin jin midi ’ka maaŋḵuthu’d yan mo walla p̱iya ḵubbaaya gi Tap̱a mo ki mii jin ush me’d mo tani a’di mina mii di m’ba/ mo mmomii buŋgwar is gi Tap̱a ki shi/ kan mo dhala bas piti mo be.
28 Dhalki ’kwani ka ’deṯe/ ’deṯe/ mo nyiṯẖ is buni mo dhali ki mii gi wakan mo dhalki uni ’ka maaŋḵuthu’d mo dhali p̱iya ḵubbaaya mo.
29 Haali/ wathin ’de/ yin jin midi shwa to mo dhali p̱i to mo jin dar gi mo jin nyiṯẖa a’di buŋgwar yan mo tani a’di ki shwa mii mo dhali p̱iya nyor ma Arumgimis jin toru gwon dwall ’twa/ a’cesh ap̱o/ is pitiŋ gana/ mo be.
30 Ba gi mii yansan kan mo tani a’di i’ka’da uma tiya is ka ris mo dhali ’ba’th mo dhali kun tiya wukin mo be.
31 Hili waḵki/ ana nyiṯẖa is banaŋ gana/ mo ka jiŋ gana/ mo tani ana yisa minu ’taki dwall gwo mo yisa.
32 Hili ki ana dwallkina Tap̱a gwo mo tani ana dorkunu mo, wakan ki ana minu ’taki ’koki mii miiwaḵ ap̱o/ mo nyaḵki ’kwaniny’cesh mo be.
33 Wakan iwaḵ pem mo ki um mini tul is mo mmonṯal ’de/ mo mmoshwa to mo tani c̱ori ac̱or ka rem ’kup̱ mo ma.
34 Waḵki/ wathin ṯal ’deŋ kamu/ ’kosha ṯe/ mo tani ba dhalki a’di ishwayi’d ’peni gu’b piti mo, isi ciki/ ki um mini ’koki p̱u’du/ mo dhali tul is mo mmonṯal ’de/ mo gom mo jin minu waḵa waḵ mo. Gwo gom ton tiya mo tani aha/ mina yip̱ um ’ban mo ki gwo mo me’d jin miga/ p̱u’dku/ mo be.