10
Mii ma Buulus jin ’Ce’dkina A’di Gwo She/ mo gom Mii jin Miina A’di To mo
1 Aha/ Buulus ki is pem lalkina um sho’k ki gwo mo ki mii ma ’thup̱ e mo dhali mii ma du jin ’thup̱ki’d eya Ḵrisṯẖos mo – Aha/ jin kara is ki gwa’d mo ki ana ’kona ka ḵarambor mo, hili aha/ dara gi monyju/ mo ki aha/ p̱ikina ’peni um mo –
2 Aha/ ’thokina um ki aha/ dikina e buŋ’kus bum mo ki aha/ mina ’taki diki ṯor mom pem jin dika/ ki ju/ mo gom miiny jwa jin wunu i is mo me’d jin miga/ ṯora p̱o/ kun tiya mo kun ’bapaski aman is ki mii mo kun ’dap̱i e ki buŋgwar is ga ’cesh mo.
3 Haali/ ba aman ’kona e mony’cesh mo tani aman yisa ḵalkina mo/as gi mony’cesh mo.
4 Haali/ to gi mo/as bana ’koki ta mo ma mee gi mony’cesh jin asa ana mo, hili uni ta ku gi mom’bi’th jin piyi’d ’peni Arumgimis mo mmo’ce’da cur gi mo jin ṯenu mom’bi’th sho’k mo be.
5 Ana ’ce’dkina gwo jin garu ’kusi ’twa/ sho’k mo dhala ris mo jin dhunu is ki ca mo mmo’tasha ’tash ’twa/ mo gom mo jin minu nyiṯẖa Arumgimis mo dhali budha ris gwo kun kulumkina ana i bwa mo mmodhu mo mmoha gwo ma Ḵrisṯẖos e mo be.
6 Mmonyoŋ is mo mmorica ris gwo gun ushu ha e mo ki gwom bum gun hakina um e kun thimkunu mo be.
7 Hili a’di jin di’d e bwambori jis/em bum mo. Waḵki/ jan ṯal ’deŋ kamu/ wu’da wuny jwa i is mo ki a’di ta jim ma Ḵrisṯẖos mo tani dhalki a’di ka is piti e mo ki a’di ta ji ma Ḵrisṯẖos mo be. Wakani am si’da/ mo be.
8 Haali/ isi kan waḵki/ aha/ kara ’ba/ ki ca mo ’teki shi/ ari nyanye/ mo gom moshirr bam mo jin c̱ikina Tap̱a am mo gom mo jin nyaŋu um is mo dhali yisa gom mmo’ce’d um sho’k mo tani aha/ yisa minu kar ki mo ma ’the is mo.
9 Aha/ mina ’taki diki su’k uma du ka war moyi ki gwom pem jin ’kwarkika/ um mo be.
10 Haali/ uni o gwo mo ki: Gwom piti kun ’kwarkina a’di mo tani diṯadiṯ mo dhali ’bitha’bi’th mo, hili mo jin dina a’di e buŋ’kus is mo tani ’ka’da’ka’d mo dhali gwom piti jin ona a’di mo tani waḵu mo be.
11 Dhalki ’kwani gi wakan mish gwo ’ban mo ki gwo gun ona aman e gwo kun ’kwaru mo me’d jin p̱ina aman mo tani aman miikina a’di me’d jin ’kokina aman mo be.
12 Yisa mmomiina aman ka gugundhi/ mmodhu is bam ka p̱ar nyaḵki unin tiya gwansan kun dhuki is buni ki ku gun ha me’d mo. Hili ki uni barki is buniŋ gana/ ki tiyan tiya mo tani dhali dhu is buni ka p̱ar mo ka rem ’kup̱ mo tani uni dar gi gwo jin mishu ’ban mo be.
13 Hili aman mina ’koki dhu is ki ca mo mmo’ce’d gwayu/ mii ap̱o/ mo, hili aman mina dhu gwayu/ ma Arumgimis mo a’di jin dherkina a’di aman mo mmojidhir mo isi kan e umi.
14 Haali/ aman ki is bam yisa ’ce’dkina agagala/ mo, ma me’d jin dina aman ki jithirku/ i um mo. Aman takina uni kun ṯwa/a/ mo kun p̱u’dkin ’peni bway jin si’dasi’d e um mo gom gwom ’borga/ ma Ḵrisṯẖos mo be.
15 Aman ’konaki dhu ’bam bam ki ca mo mmo’ce’d gwayu/ mii ap̱o/ mo e mii jin miina ’kwanin tiya to mo. Hili mo ma ’teŋ kap̱em bam a’dan be. Ki moŋgam gwo is bum minu eḵ mo tani bwam mondhe’d bam e bwam um mo minu galal ki galal jin caaca mo be.
16 Wakan ki am mina ’taki c̱i gwom ’borga/ eya ris bampa/ ’baar mo mmo’ce’d uma p̱o/ mo ki dar gi mii jin dhunu ’ba/ ki ca mo gom mii jin iskin hila/ mo e bwam mondhe’d gi cin tiya mo be.
17 Dhalki a’di jin kar ’ba/ ki ca mo tani kar ’ba/ ki ca mo e Tap̱a mo be.
18 Haali/ a’di yisa ta wathi/ jin midi kar is piti ki ji gi ha me’d mo jin minu bu’th mo, hili wathi/ a’di imina Tap̱a kar ki ji gi ha me’d mo be.