11
ABuulus dhali ku gi Ta Thus ki Thus mo kun Dhunu ki She/ mo
1 Aha/ onayi ki um mini dhal aha/ ari bway mo mmo/o ari gwom p̱us mo. ’Kuc̱i bwa mo ma ki ’kari’th gom aha/ mo.
2 Aha/ sura i mon’thoṯẖ bwa gom um mo jin piyi’d ’peni Arumgimis mo haali/ aha/ doshkina um eya Ḵrisṯẖos mo mmoc̱i um me’d nyaranyaŋa’b this jin dheleladhelel mo goma kaṯẖ ma yim mo be.
3 Hili aha/ ḵo/kina is mo, me’d mii jin miina tasha/ mo mmoheka Hawwa e mo ka maḵ piti mo tani ki gwom bum kun kulumkina umi bwa mo tani mini sus um mmoper mo ’peni mii gun daru gi washila/ mo dhali miin dhelelga/ kun ta mii ma gayiin eya Ḵrisṯẖos mo be.
4 Haali/ waḵki/ jan ṯal ’deŋ kamu/ midi p̱u’dku/ mo dhali c̱i gwo goma Yesusa kamu/ mo jin diki ta a’din ’de/ jin c̱ina aman um gwo mo tani walla waḵki/ um bu’th shi/in kun ’ko ki she/ mo ’peni a’din ’de/ jin butha um mo walla waḵki/ um bu’th gwom ’borga/ jin di ki she/ mo ’peni a’di jin bu’thkina um mo tani um komki ’peni a’di ki jahanne/ mo be.
5 Aha/ ṯosha ki aha/ dinaki kar ari sheŋ kamu/ mo gom uni gwansan kun dhunu ki she/ mo kun bolona bol e mo be.
6 Isi kani waḵki/ aha/ dina ’twam pem ki ta gwocon mmoṯor gwo mo tani aha/ dara gi mo jin nyiṯẖuwa nyiṯẖ mo yisa. Hili eya ris bwayi ’baar mo ki ’twaŋkal kuku/ mo tani aman ṯorkina um a’di yansan eya tente/ eya ris to ’baar mo be.
7 A/ki aha/ miikina miinthus mo mmokarka/ is pem ki gwa’d wakana ki um minu ’taki dhu ki ca mo haali/ aha/ c̱ikina um gwo ma Arumgimis jin ta gwom ’borga/ mo ki dar gi mii jin ’thonu to ’peni um mo be.
8 Aha/ ’tulkina to ’pena ḵaniisan tiya mo mmobu’thkika/ to gun c̱inu ’peni uni mo goma thip̱ jin miinuwa thip̱ mo, ki mii gi wakan mo mmomii um to mo be.
9 Dhali ki aha/ nyaḵa di ki um mo dhali aha/ hara to mo tani aha/ dinaki kar jan ṯal ’deŋ kamu/ ton diṯi’d ibwa mo haali/ tom pem jin taka/ mo tani ’kokunu mo mmothip̱ aha/ ’pena waḵ mo uni gun p̱u’dkin mo ’peni Pam Makiduniyya mo be. Wakan aha/ tuḵkina is mo dhali aha/ mina isi tuḵ mo ’peni mo si’da/ jin ’konu ki ton diṯin ibwa mo e um mo eya ris ’twaŋkal kuku/ mo.
10 Me’d gwoŋ gana/ ma Ḵrisṯẖos jin diki’d e aha/ mo tani ’bam pem jin karka/ ki ca mo tani aha/ mina ’twa/ diki ’dap̱ mo e bampa/ gi Pa Aḵaa/iya mo be.
11 Dhali kataye? Haali/ aha/ dinaki en uma? Arumgimis mishki’d ki aha/ ena um mo be.
12 Dhali a’di jin miikika/ mo tani aha/ mina ṯikir a’di mii mo jin miga/ non uni gwansan kun se gwo i is mo, uni gun dhuki ’bam buni ki ca mo gom gwo jin hashu uni mo ki uni gun mini ’taki se gwo i is mo mmo/o ki uni i miiki mii mo ki mii ma garrne/ mo me’d aman mo be.
13 Haali/ ’kwani gi wakan ta uni gun dhunu ki she/ mo gun ta thus mo dhali imanmiiya ṯu’c gun he’kkina he’k e mo, kun warki is buniŋ gana/ ki uni ma Ḵrisṯẖos kun dhunu ki she/ mo.
14 Dhali mo jin meru di’da? Haali/ isi kani aSeṯaan warki is pitiŋ gana/ ka man’doyu gwo gi moŋkush mo be.
15 Wakan a’di yisa ta to jin meru waḵki/ c̱iŋkinam piti si’da/ warki is buni me’d is gi c̱iŋkina/ gi mo ma ḵar/e mo be. Hili ’pemen buni mini ’ko isi ki miim buni gun miikina uni mo be.
Mo jin ’Kosh ma Buulus Is ka Nyor mo Me’d jin Tana A’di Amankaru ki She/ mo
16 Aha/ rasha gwo e mo ba/. Dhalki wathin ṯal ’deŋ kamu/ midi mii diki ṯosh ki aha/ tana p̱us mo. Hili isi kani waḵki/ um ṯoshkin kan mo tani budhi aha/ mo ma me’d wathim p̱us mo, wakan ki aha/ gara/ mina ’taki kar ari ’ba/ ki ca mo.
17 (A’di jin oka/ mo tani a’di oka/ mo yisa ki moshirr gi Tap̱a mo, hili me’d wathim p̱us mo mmokarkika/ ’ba/ ki ca mo mmowuwa wuny jwa i is mo be.
18 Me’d jin tana ’kwani aris ka ris kun dhu ’ba/ ki ca mo gom to ga ’cesh mo tani aha/ gara/ mina kar ’ba/ ki ca mo be.)
19 Haali/ um ’kunykina bwa mo mmo’kuc̱ bwa mo gom uni gun ta p̱us mo me’d jin yuḵa um ki yuḵ ki is bum mo.
20 Haali/ um ’kuc̱ki bwa mo waḵki/ wathi/ dhu um ki c̱iŋkinam piti mo, walla ’kwar um ka gwap̱i/ mo, walla bu’th shi/ miim ’boron bum mo, walla ’theḵ thini mis mo, walla dor um e jis/em bum mo.
21 E mon’the is pem mo tani aha/ mina mii o gwo mo ki am ’kokina mo ki is jin ’ka’da’ka’d kagahara mo gom mii jan mo be.
Hili ma a’diyin jin mina jan ṯal ’de/ ibu’th ki moŋkar ’ba/ nycine/ mo tani – aha/ okina gwo me’d wathim p̱us mo – aha/ si’da/ bu’thkina mo mmokar ’ba/ ki ca mo ki a’di jan mo be.
22 A/uni ta ’Kwani Ibraniyiina? Wakan aha/ garayi. A/uni ta ’Kwani ma Israyiila? Wakan aha/ garayi. A/uni ta emen ma Ibrahiima? Wakan aha/ garayi.
23 A/uni ta c̱iŋkina/ ma Ḵrisṯẖosa? Aha/ tana jan ’de/ jin ’boro’di. – Aha/ ona gwo mo me’d wathi/ jin gusi’da du mo. Aha/ tana a’di jin ’boro’d ki ’bor gana/ kagahara goma ṯu’c jin caaca kagahara mo dhali gom mmodi eya sijin kagahara mo dhali gom mondor jin molu deŋ e mo dhali gom mmo’dish ’twa/ isa yempa/ mmowu mo.
24 Me’di mudhe’d mo aha/ bu’thkina mondor ’peni me’d gi ’Kwani Yahuuda/ mo ki mondor jin ’kona issu/ i/aṯẖ ’de/ mo.
25 Me’di kwara mo aha/ dorkunu mo ki cwa mo. Ki eŋ kamu/ mo tani aha/ ’koshkunu ki wosh mo. Me’di kwara mo tani aha/ dikina e bwam ma ḵur yi’de/ jin pwaṯẖki bwa mo. Ki mon’thiny ilu/ mo dhali ki montee ilu/ mo tani aha/ hashkina e ’kuḵumma/ yi’de/ mo be.
26 E ya jin yaka/ me’d ka ris mo, aha/ ’dap̱a ’kup̱ e mo jin ṯagu wu mo ’peni yi’de/ kun son mo, e mo jin ṯagu wu mo ’peni imandil to mo, e mo jin ṯagu wu mo ’peni ’kwanim pem mo, e mo jin ṯagu wu mo ’peni ’kwani gun ’koki ta ’Kwani Yahuuda/ mo, e mo jin ṯagu wu mo e ’peŋkuman bampa/ mo, e mo jin ṯagu wu mo e mombwaasho mo, e mo jin ṯagu wu mo e ḵumma/ yi’de/ mo, e mo jin ṯagu wu mo ’peni iwaḵ pem gun ta thus ki thus mo,
27 e mii ma ṯu’c jin ’batha’ba’th mo, e miiny c̱iŋkina/ jin shwa’da nyor ki thiṯẖ mo, e mon’thiny ka ris ki dar gi e ki ish mo, e ṯe/ jin ’kosho’da ’kosh mo dhali e yi’de/ jin bu’thki’da bu’th mo, me’d ka ris ki dar gi tonṯe/ mo, dhali e mon’thup̱ga/ mo dhali ki is gana/ ’te/ mo.
28 Dhali ki dar gi mii gwansani ’baar mo ka p̱o/ mo tani to di’d jin yap̱ aha/ mo isa yempa/ mo, a’di jin ta mo/anan is pem goma risa ḵaniisa ’baar mo be.
29 Kaja a’di ’ka’da ise idhali aha/ idina is ki ’ka’d mo? Kaja a’di jin karu mmobiṯ moye idhali aha/ idin ma nyor ki deḵ mo?
30 Waḵki/ aha/ mina mii kar ’ba/ ki ca mo tani aha/ mina kar ’ba/ ki ca mo gom to gun ṯoru aha/ e moŋ’ka’d is pem mo be.
31 Arumgimis dhali Ababa gi Tap̱a Yesus mo tani a’di jin ’boru mii mo gom mii ma sule/ mo tani a’di mishki’d ki aha/ dinaki ta ṯor mo be.
32 E Pan Dimashk mo tani amudhiir jin diki’d e bwaŋ’kwariny ma Maliḵ jin ta’da Areta mo, jin jiki ’peŋkuman Bampa/ gi Pan Dimashk mo jin mina a’di bu’th aha/ mo be.
33 Hili aha/ thulkunu ka ’cesh mo e bwam ma nura/ mo gi eŋ ’kup̱ gi embul shu’d ma goŋ mo dhali ye ’peni me’d piti mo be.