7
Igasiis Thuḵki Mii ma Malkisaadag mo
1 Haala Malkisaadag yan jin ta’da maliḵ gi Pan Saliim mo dhali a’di si’da/ ta’da gasiis gi a’di jin Cayaa/ e ki Ca mo jin ta’da Arumgimis mo tani a’di gamki’da Ibrahiim ’kup̱ mo mmodoḵkina a’di ka nyaŋ’ko’d mo ’peni mo jin ’koshkina a’di imaliḵ mo dhali ’bor a’di mii mo be.
2 Dhali e a’di mo tani a/Ibrahiim ki ḵwa/ a’di to bwa mo jin ’dap̱ki’da ’dap̱ ’twa/ ka ’kume’d mo ’peni aris to ’baar mo. A’di ta a’di jin ṯwa/a/ mo ki mo jin luḵu gway piti mo jin ta’da maliḵ jin ta’da ḵar/e mo dhali a’di si’da/ ta’da maliḵ gi Pan Saliim mo, a’di jin onu ki, amaliḵ gi mo ma ḵu’th is mo be.
3 A’di di’d ki dar gi com mo, walla kum si’da/ mo, walla dar gi gwo jin beledhu gom emen piti mo, dhali a’di si’da/ dara’d gi mo ’pena tee ga muŋ’kup̱ mo walla ’pemen gi mondiki/em piti mo, hili a’di wana e ki Ya/ ma Arumgimis mo mmoṯikirkina a’di di mo mmota agasiis ki sule/ sule/ mo be.
4 Bahili ma. Cam piti wa’da/. A/Ibrahiim jin ta’da dhana baba gi ’Kwani ma Israyiil mo c̱iki a’di to jin ’dap̱ki’da ’dap̱ ’twa/ ka ’kume’d mo ’peni to kun dilunu mo.
5 Dhali uni gwansan kun ta emen gi ’Kwani Lawi mo kun bu’thki mo jin tanuwa gasiis mo tani uni ta gi gwoŋḵan jin ’kwarkunu mo e gwoŋḵan jin c̱inu mo mmobu’th to kun ’dap̱ ’twa/ ka ’kume’d ’peni ’kwani mo, uni gun ta ikam buni mo, ba uni gwansan si’da/ ita emen ’pena Ibrahiim mo be.
6 Hili wathi/ yansan jin dara’d gi gwo jin beledhu ’peni emen buni mo tani bu’thki to jin ’dap̱ ’twa/ ka ’kume’d ’pena Ibrahiim mo dhali ’bor a’di mii mo, a’di jin ta gi gwo jin onu is mo be.
7 A’di ta gwo jin ’ce’dki’da gagala/ isi nnii mo ki gwo jin sugu ki a’di jin gwa’da’d mo tani ’borkunu mii ki a’di jin ṯelki gantha/ mo be.
8 Mmahan mo tani to kun ’dap̱ ’twa/ ka ’kume’d mo bu’thkunu mo ki ’kwani kun mishi wu mo. Mmun mo tani ki jan ṯal ’de/ mo jin ṯeskunu gwo mo ki a’di di’d ki e mo be.
9 Jan ṯal ’deŋ kamu/ midi ’taki o isi gwo ka Lawi ki is piti jin bu’thki to jin ’dap̱ ’twa/ ka ’kume’d mo tani c̱iki to kun ’dap̱ ’twa/ ka ’kume’d ka Ibrahiim mo,
10 haali/ a’di diki’d naskina/ e ’penṯẖi’th gi com mo ka Malkisaadag gamki a’di ’kup̱ mo be.
11 Waḵki/ mo jin tanu gu ki ’boron ki isi ’bor gana/ mo mishu jidhir mo ki mii gi ’Kwani Lawi ki mo jin tanuwa gasiis mo tani (Haali/ e bwaŋ’kwariny a’di mo tani ’kwani bu’thki gwoŋḵan jin c̱inu mo) gwo ki wakata iminu doḵ/e mii ta mo mmodoḵ sho’k mo goma gasiisa kamu/ mo mmocu mis mo mmothuḵ mii ma Malkisaadag i’ko’d mo, mmodhal jan ’deŋ kamu/ gway piti e i is mo, mmothuḵ mii ma Haruun i’ko’d mo?
12 Haali/ waḵki/ mo di’d mo mmo/aḵ mo jin tanuwa gasiis e mo tani a’di midi mii ta mii jin ŋap̱uwa ŋap̱ mo jin minu mii aḵa/ aḵ e mo e gwoŋḵan jin c̱inu mo si’da/.
13 Haali/ a’din ’de/ yin jin okunu gwo gwansan mo tani a’di cila mo jin tana a’di ja waḵa kamu/ mo, ’peni a’di jin dina a’din ’deŋ kamu/ ki mii to mo eya gwaṯa/ jin miinu to goma basa ’cesh ki sule/ sule/ mo.
14 Haali/ a’di mishu eya tente/ ki Tap̱am bana a’di ta emen ’pena Yahuuda/ mo dhala Musa si’da/ diki o gwoŋ ḵamkina kamu/ goma waḵ yansan gom mo jin tanu igasiis mo.
15 Gwo yansan a’di warki’d ki isi gwo jin mishu eya tente/ ki mish gana/ mo ka gasiisa kamu/ midi cuyi mis jin mina e waka Malkisaadag mo be,
16 a’di jin warki’d ka gasiis mo, yisa ki isi gwo jin ’theḵkina gwoŋḵana ’theḵ mo isi gwo gom buŋgwar is mo ’peni emen kun tanu mo, hili ki mom’bi’th gi mondiki/e jin molu dhi’th sho’k mo.
17 Haali/ gwo onu mo gom a’di mo ki:
/E tana gasiis ki sule/ sule/ mo,
mmothuḵ mii ma Malkisaadag i’ko’d mo be.
18 Dhali ki me’da kamu/ mo tani gwoŋḵana dhamo/ jin ’kwarkunu mo a’di p̱uunu/ mo haali/ a’di ’ka’dkina is ki ’ka’d mo dhali a’di ta dholgwon mo be.
19 (Haali/ gwoŋḵan jin c̱inu mo tani yisa piyi miiŋ kamu/ jin ’boro’d ki ’bor gana/ ’kup̱ ka pije/ yisa.) Dhali ki me’da kamu/ doḵ/e mo tani mo ma ’teŋ kap̱em ’borga/ mo tani a’di waru/ is mo, a’di jin ’dishkina ana Arumgimis is ki a’di mo be.
20 Dhali a’di si’da/ diki di mo ki dar gi gwo jin thulu me’da p̱o/ mo.
21 Haali/ unin dhamo/ gwansan kun warkin ki igasiis mo tani uni bu’thki mom buni kun tana uni igasiis mo ki dar gi gwo kun thula uni me’da p̱o/ mo. Dhali hili jan ṯal ’de/ yansan mo tani a’di bahu gwo mo ki gwo jin thulu me’da p̱o/ mo ki:
Tap̱a a’di thulki gwo me’da p̱o/ mo
dhali a’di midi diki aḵ bwam piti e ki sule/ mo.
/E tana gasiis ki sule/ sule/ mo be.
22 Mii yansan a’di ki c̱iya Yesus mo mmota to jin ’tashu ’twa/ mo gom gwom ’borga/ jin gamu me’d mo jin bolo’da kamu/ e mo.
23 Haali/ igasiisa dhamo/ tana ris ka ris ki em buni kun deŋu uni mo, haali/ uni dilu isa bora ’cesh ki wu mo ’peni miim buni jin ṯikirkina uni mii ma gasiis mo.
24 Hili a’di bu’thki mii, mii jin tana a’di agasiis mo mmoṯel ki sule/ mo, haali/ a’di ṯikirki di mo ki sule/ sule/ ya ye ’ba/ mo be.
25 Gom ’kup̱ gwo yan mo tani a’di mishki mii mo isa yempa/ mo mmota uni gwansan is ki me’d mo, uni kun ’dishkina Arumgimis is mo ki a’di mo, haali/ a’di isa yempa/ diki’d mo mmota amanwoṯẖ gwo is gom uni mo be.
26 Haali/ a’di ha me’d ki haŋ gana/ mo ki ana mina ’taki ta ga gasiis jin ca’d gi wakan mo, a’di jin ḵogu mo dhali a’di jin dar gi mii ’ba/ mo dhali a’di jin dar gi mo jin nyo/o’d mo, dhali a’di jin ḵwa/i is mo ’peni imanmii miinthus mo, dhali a’di jin karu ki ca mo ap̱o/ momisi ’baar mo.
27 A’di midi mii diki ta gi jamu/ mo me’d igasiis gwahan kun cakin mo mmo’ciṯẖ to/e ’kus mo goma bas jin miinuwa ’cesh isa yempa/ mo, mmo’ciṯẖi ṯwa/a/ mo gom miinthus pitiŋ gana/ mo dhali yan’ko’d gom miinthus gi ’kwani gwansan mo. A’di miiki mii yansan me’d ’de/ ki sule/ mo ki a’di c̱iki is pitiŋ gana/ mo.
28 Ka jiŋ gana/ gwoŋḵan jin c̱inu mo dhuki ’kwani ’pen ka pije/ mo e moŋ’ka’d is buni mo mmota igasiis kun can mo, hili gwo jin thulu me’da p̱o/ mo jin p̱u’dki’di ’ko’d mo ’ko’di gwoŋḵan jin c̱inu mo tani, a’di karki Ya/ ka pije/ mo, a’di jin karu mmota a’di jin ’boro’d ki ’bor gana/ ki sule/ sule/ ya ye ’ba/ mo.