8
Adhana Gasiis jin Ca’d ki Gwon This jin Gamu Me’d mo
1 Dhali shushan gwo yan jin ’kona ana mmo/o mo tani ta gwo jin wa cikise/ mo be. Ana tana ka gasiis jin ca’d gi wakan mo, a’di jin ta jan ṯal ’de/ jin c̱a’bki’d ki me’da bim poros ma ḵursi ma maliḵ mo jin ta ji gi a’di jin Eḵa/ Eḵ e momis mo,
2 amanmii to mo e mo jin ḵogu mo dhali e gu’b c̱iŋŋaŋ gana/ mo, a’di jin ṯelu ki me’d gi wathi/ yisa, hili ki Tap̱a mo be.
3 Haali/ iris igasiis kun can uni dhukunu ’pen ka pije/ mo mmoc̱i to gun c̱inu ki me’d mo dhali mmo’ciṯẖ to/e ’kus mo mmomiiya basa ’cesh mo. A’di gara/ iminu mii ŋap̱a ŋap̱ goma gasiis yansan mmomii ta gi toŋ kamu/ si’da/ jin mina a’di mii c̱i mo mmomiiya bas mo be.
4 Dhali waḵki/ a’di midi ’taki di e mony’cesh yan mo tani a’di midi ’taki diki ta agasiis moyi, haali/ igasiis uni ’kokin mo mmoc̱i to gun c̱inu ki me’d mo isi ki gwoŋḵan jin c̱inu mo.
5 Uni bu’thki mii me’d mo mmota ayinyjwa mo dhali a’thintha/ mii mo gom to jin ḵogu mo jin di’di momis mo. Haali/ ka Musa murki’di nyaŋ gu’b burrinye/ mo tani a’di ye’thkunu sho’k ka Arumgimis mo mmo/o gwo mo ki: Hili ki ’bore/ mo ki /e mini nyaŋa ris to ’baar mo isi ki she/mm jin ṯorkunu /e mo ’peni ’kuwosha turga/ mo be.
6 Hili me’d jin wana a’di kan mo tani aḴrisṯẖos a’di bu’thki mo jin miinu to mo, a’di jin ’boro’d ki isi ’bor jin shi/i’d mo mmobol jin dhamo/ e mo, me’d gwo jin gamu me’d mo jin doshkina a’di agalany mo mmomii mo jin bolki’da kamu/ e mo, haali/ a’di ruu’kkunu mo ki gwo kun onu is mo kun bolki tiyan dhamo/ e mo be.
7 Haali/ waḵki/ gwo jin gamu me’d mo jin ta jin ṯwa/a/ mo midi ’taki ta a’di jin dar gi mii ’ba/ mo tani moŋkamu/ midi ’taki di yisa goma kamu/ jiŋ ’ko’d mo.
8 Haali/ a’di gamki mii jin ’ko uni ’ba/ mo ki a’di oki gwo mo ki:
Atee mini p̱u’du/ mo. A’di ta gwo jin ona Tap̱a mo.
Ki aha/ mina ṯel gwo jin gamu me’d jin ta jin this mo nyaḵki kuŋ Gu’b ma Israyiil mo
dhali nyaḵki kuŋ Gu’b ma Yahuuda/ mo tani
9 yisa mmowa e ki gwo jin gamka/ me’d nyaḵki ibabam buni mo
ka tee jin suska/ uni ka pije/ ki me’d pem mo
mmoshuyu/ uni bway ka pije/ ’peni Pam Masir mo,
haali/ uni ’koki ṯikir ’ko mo e gwom pem jin gamu me’d mo,
dhali wakan aha/ dinaki c̱iya hirdheŋ kamu/ e uni mo. A’di ta gwo jin ona Tap̱a mo be.
10 Gwo yansan a’di imiga/ gam me’d ki kuŋ Gu’b ma Israyiil mo
’ko’da tee gwansan mo. A’di ta gwo jin ona Tap̱a mo.
Dhali aha/ mina kar gwoŋḵan pem jin c̱inu mo eya dum buni mo
dhali ’kwar uni eya dum ba’dgam buni mo
dhali aha/ mina ta Arumgimis buni mo,
dhali uni mini ta ’kwanim pem mo be.
11 Dhali uni yisa mini mii ṯor ’kwani gwo ka ’deṯe/ ’deṯe/ mo, uni kun ta cim buni mo,
walla ris ’kwani ’baar ka ’deṯe/ ’deṯe/ mo e ikam buni mo, mmo/o gwo mo ki: Mishi Tap̱a mo ma,
haali/ uni ’baar mo mini mish aha/ mo be,
’peni uni kun p̱isap̱is mo ntagi uni gun ’bap̱a’bap̱ mo be.
12 Haali/ aha/ mina miimii ’kup̱ ki miinthus buni kun miikina uni mo be,
dhali aha/ mina ka miinthus buni e doḵ/e yisa.
13 Mmo/ona a’di gwo mo gom gwo jin gamu me’d mo jin ta jin this mo tani mmoṯu/ulkina a’di mo a’di jin ta jin ṯwa/a/ mo me’d jin dhamo/ jin p̱uu’d mo be. Dhali a’di jin ta jin dhamo/ jin warki’d ki jin p̱uuki’d mo dhali wuwa mashira/ mo tani a’di hila/ midi us ki jog mo be.