3
Gwo jin C̱in ma Yohaan jin Ta’da Manmiiya Mii ki Yi’de/ mo
1 Dhali ka tee gwansan Yohaan jin ta’da manmii ki yi’de/ p̱u’dki’d mo mmoc̱i gwo mo e bwaasho gi Pa Yahuudiyya mo mmo/o gwo mo ki:
2 Rici adu is mo ma haali/ Bampa/ gi Momis midi p̱u’d ki ’dishe/ mo be.
3 Haali/ a’di yansan ta a’di jin okunu ka manc̱i gwo ma Arumgimis kadhamo/ mo jin ta’da Ishaya ki a’di o gwo mo ki:
’Twa/ gi jan ’de/ mmocuu gwo em bwaasho ki:
Thosoni bway gi Tap̱a mo ma.
Kari bway piti ka ḵar/e mo.
4 Dhala Yohaan a’di hi’thki’da mur kalman mo dhali wac̱kan mo e empa’d piti mo, dhali tonṯem piti jin shwana a’di mo tani ta’da kuuyu/ dhala dham eya ḵur mo be.
5 Yan’ko’d aris ’kwani ’baar mo iikin ka pije/ mo e a’di mo ’peni Pa Urushaliim mo dhali ’peni bampa/ Yahuudiyya ’baar mo dhali e bampa/ ’baar mo kun ’kon ka kukul is mo e Yi’deŋ Ḵumma/ Uurdun mo be.
6 Dhali uni ’kokunu mo mmomii ki yi’de/ ki a’di mo e Yi’deŋ Ḵumma/ Uurdun mo mmopikina uni gwo gom miinthus buni mo be.
7 Hili ki a’di p̱arki ’Kwani P̱arisiyiin e mo dhali ’Kwani Sadukiyiin p̱u’dkin mo e mo gi miinuwa mii ki yi’de/ mo tani a’di ki o uni gwo mo ki: Um uc̱in tasha/. Aja rum um ki gwo mo mmoso mo ’pena nyor jin midi p̱u’du/ mo?
8 Ḵali maman gana/ adho’th mo ma jin midi ha me’d ki mo jin rijuwa du is mo
9 dhali dhalku/ ki ṯel gwo ’pen mo mmo/o gwo mo e is bum ki: Ana tana ga Ibrahiim jin ta’da ababam bana mo. Haali/ aha/ ṯora um gwo mo ka Arumgimis mishi war wosh gwansan mmo’de’k uni mmota uc̱i ma Ibrahiim mo be.
10 Hili shwane/ athurmany a’di ’thikunu mo eya birman cwa mo. Wakan mo tani aris cwa ’baar mo ka ’deṯe/ ’deṯe/ kun ’koki dho’th maman mo tani uni jep̱kunu ka ’cesh mo dhali minu ṯaki o’d mo be.
11 Aha/ miikina um ki yi’de/ gom mo gi minu rica du is mo, hili a’di jin midi yayu/ i’ko’di aha/ mo tani a’di ca’d ki aha/ mo dhala p̱p̱am piti mo tani aha/ dinaki ha me’d mo mmoḵal uni mo. Hili a’di midi mii um ki Shi/in Dheleladhelel mo dhali ki o’d mo be.
12 Dhali toŋḵar shem piti mmo’dash to mo tani di’di me’d piti mo dhali a’di midi dhelel ja’dam piti mo dhali a’di midi tul emen pos is mo e bwan themes mo, hila ’pi’b mina a’di c̱i’th ki o’d jin midi mol us mo be.
Mo jin Miinuwa Yesus ki Yi’de/ mo
13 Yan’ko’d Yesus p̱u’dki’d mo ’peni Pany Jaliil e Yi’deŋ Ḵumma/ Uurdun eya Yohaan mo ki a’di minu mii ki yi’de/ ki a’di mo be.
14 Yohaan a’di ur a’di gwo mo mmo/o gwo mo ki: Aha/ mina mii ta gi mo gi miinuwa mii ki yi’de/ ki /e mo dhali /e p̱u’dkini aha/ kan mo ’taa?
15 Hila Yesus thoḵ a’di gwo mo ki: Dhalki a’di miinu mo wakan shwane/ haali/ a’di wakan jin midi ha me’d mo gom ana mmothima ris mo ma ḵar/e mo. Dhali yan’ko’d a’di gamki gwo me’d mo be.
16 Dhali ka Yesus miikunu ki yi’de/ mo tani a’di cuki mis ki jahanne/ ’peni yi’de/ mo dhali hili, momis ḵa’dkunu mo dhali a’di p̱arki Shi/in ma Arumgimis e mo mmothulu/ me’d gurko/ mo mmoc̱a’ba p̱o/ a’di mo be.
17 Dhali hili, ’twa/ ’peni momis o gwo mo ki: Yansan ta Ya/m pem jin enka/ mo dhali e a’di mo tani aha/ ’bora bwa mo be.