4
Mo gi Paluwa Yesus mo
1 Yan’ko’d aYesus a’di urkina Shi/in ka pije/ mo e mombwaasho mo dhali a’di palkina tap̱a ma ruma ’cesh mo be.
2 Dhali a’di ga/ki to mo ka cim ma issu/ montee mo dhali ka cim ma issu/ mon’thiny mo dhali yan’ko’d mo tani a’di ’kosha ṯe/ mo be.
3 Dhali amanpal a’di p̱u’dki’d mo dhali o a’di gwo mo ki: Waḵki/ /e ta Ya/ ma Arumgimis mo tani ḵani wosh gwansan gwo mo ma mmowar ki tonṯe/ mo.
4 Hili a’di thoḵ a’di gwo mo ki: A’di ’kwarkunu mo ki:
Wathi/ midi diki di ki e jasi gom tonṯe/ a’di ’de/ mo
hili ki gwo ’baar mo ka ’deṯe/ ’deṯe/ kun piyin mo ’peni ’twa/ ma Arumgimis mo be.
5 Yan’ko’d tap̱a ma rum a’cesh ki sus a’di mo e ’peŋkuman bampa/ jin ḵogu mo dhali a’di ki kar a’di eya liman gu’b gi mondheleladhelel mo
6 dhali a’di ki o a’di gwo mo ki: Waḵki/ /e ta Ya/ ma Arumgimis mo tani biṯi is pini ka ’cesh mo ma haali/ a’di ’kwarkunu mo ki:
A’di midi c̱i iman’doyu gwom piti mo mmoji /e mo,
dhali,
E me’d buni mo tani uni mini ’de’k /e mo,
isi ciki/ ki /e mina sho’k pini diki ṯorosha p̱o/ wosh mo be.
7 Yesus o a’di gwo mo ki: Doḵ/e gwo ’kwarkunu mo ki: /E mini diki pal Tap̱a Arumgimis pini mo.
8 Doḵ/e tap̱a ma ruma ’cesh ki sus a’di mo e ’kuwosh jin turatur kagahara mo dhali mmoṯor a’di aris bampa/ gi mony’ceshi ’baar mo dhali monycam buni mo be.
9 Dhali a’di ki o a’di gwo mo ki: Aris uni gwansani ’baar mo tani miga/ c̱i /e mo be waḵki/ /e mini biṯa ’cesh mo dhali luŋ aha/ mo be.
10 Yan’ko’d Yesus ki o a’di gwo mo ki: Yaku/ mo ma, Seṯaan, haali/ a’di ’kwarkunu mo ki:
/E mini luŋ Tap̱a Arumgimis pini mo,
dhali a’di ’de/ mo tani mmina /e mii to mo be.
11 Yan’ko’d tap̱a ma ruma ’cesh ki dhal a’di ’pen mo dhali hili, iman’doyu gwo p̱u’dkin mo dhali mii a’di to mo be.
Yesus Ṯelki Mii ma Ṯu’c Piti ’Pen mo
12 Dhali ki a’di ciḵki gwo ka Yohaan karkunu eya sijin mo tani a’di p̱u’dki’d mo e Pany Jaliil mo be.
13 Dhali a’di dhalki Pa Naasira ’pen mo dhali ya mo dhali c̱a’b mo e Paŋ Kap̱ranahuum mo e shemen yi’de/ gi bampa/ gi Pan Sabuluun mo dhali Pan Nap̱taali mo be.
14 A’di ta gwo jin okunu ka manc̱i gwo ma Arumgimis kadhamo/ mo jin ta’da Ishaya, a’di jin minu thim mo ki:
15 E Pan Sabuluun mo dhali e Pan Nap̱taali mo tani
’kup̱ ki shemena gap̱ jin ’ciṯẖu/ Yi’deŋ Ḵumma/ Uurdun mo,
e Pany Jaliil gi ’kwani kun ’koki ta ’Kwani Yahuuda/ mo tani
16 ’kwani kun ’kokin mo e bwaman mondhurumi’d mo tani
uni p̱arki dhan moŋkush e mo,
dhali e uni gwansan kun ’kokin mo e bampa/ mo dhali eya la wu mo tani
moŋkush ’twaḵkunu mo mo be.
17 ’Pena tee c̱aan mo tani Yesus ṯelki gwo ’pen mo mmoc̱i gwo mo mmo/o gwo mo ki: Rici adu is mo ma haali/ Bampa/ gi Momis a’di p̱u’dki’d mo be.
Yesus Yuḵki Imanciḵ A’di Gwo Iṯwa/a/ mo
18 Me’d jin yakina a’di e shemena gap̱ ma al ma Jaliil mo tani a’di p̱arki ’kwanin tiya e isu/ mo kun tana kam mo, Simaan jin yuḵu gway ka Buṯerus mo dhala Andaraawus jin ta’da kam piti mo mmobiṯkina uni a’thi/ a/al mo, haali/ uni ta imancesh to yi’de/ mo be.
19 Dhali a’di ki o uni gwo mo ki: Baṯẖi aha/ nsho’k mo ma dhali aha/ mina dhu um ki imanbu’th ’kwani ki gwo mo be.
20 Dhali ki jahanne/ uni dhalkina ’thim buni ’pen mo dhali baṯẖ a’di isho’k mo be.
21 Dhali ki a’di yaki’d mo ’peni mun mo tani a’di p̱arki ’kwani su/ e mo kun ta ikam mo si’da/, Yakuub jin ta ya/ ma Sabadi dhala Yohaan jin ta’da kam piti mo e bwam ma ḵur buni nyaḵ ka Sabadi jin ta’da ababam buni mo mmoshowa ’thim buni mo, dhali a’di ki yuḵ uni mo.
22 Dhali ki jahanne/ uni dhalkina ḵur buni ’pen mo dhali ababam buni mo, dhali baṯẖ a’di nsho’k mo be.
Yesus C̱iki Gwo mo dhali Wac̱a/ Wac̱ mo
23 Dhali a’di yaki’d mo e Pany Jaliili ’baar mo tani a’di ṯorki gwo mo e gu’b gi montul is buni mo dhali mmoc̱i gwom ’borga/ gom Bampa/ mo dhali mmowac̱a ris ’bathi ’baar mo dhali aris isa nyor kun ’koshi ’kwani mo be.
24 Wakan gwo gom a’di yaki’d ki lala’th ki tur mo e Pan Suriyya mo dhali uni suskina ris ’kwani e a’di kun ’bathan mo, uni gwansan kun doru ki isa nyor mo dhali ki isa nyor kun woci is she/ mo dhali kun bu’th ma rum thus mo dhali aris uni kun wu gamp̱aŋ mo dhali aris uni kun muṯṯa/ is mo dhali a’di ki wac̱ uni mo be.
25 Dhali awaambuhany ’kwani caaca ’peni Pany Jaliil baṯẖki a’di m’pen mo dhali ’peni Pan Deḵap̱olis mo dhali ’peni Pa Urushaliim mo dhali ’peni Pa Yahuudiyya mo dhali ’peni bwamp̱o/ Yi’deŋ Ḵumma/ Uurdun mo be.