142
Gway jin yedhuwa Dawuu’d sho’k mo ki a’di diki’d e jurum wosh mo. Mon’tho mo.
Aha/ gwokina ki ’twam pem e Tap̱a mo,
ki ’twam pem mo tani aha/ ’thokina to ka di’b me’di is e Tap̱a mo.
Aha/ gac̱a mom pem jin walka/ a’thup̱uny ’twa/ e bwambori a’di mo.
Aha/ ṯora tom pem kun ṯoci aha/ bwa ibwambori a’di mo.
Ki shi/in pem ’thikina buye/ mo tani
/e mishki bway pem mo.
E bway tur jin yaka/ mo tani
uni bagkina gume/ gom aha/ mo.
Aha/ hilkina mo ki ’bana bim poros mo dhali tim mo mo,
hili jaŋkamu/ yisa di’da jin tor aha/ ki e mo.
Mo jin huru jwa yisa di’d gom aha/ mo.
Wathi/ p̱iyi’d jin hilki’da hil gom aha/ mo.
 
Aha/ gwona ’twa/ e /e mo, ayy Tap̱a.
Aha/ ona gwo mo ki: /E ta jim pem jin hurga/ jwa icine/ mo,
tom pem jin ’tuntulka/ bwa ime’d mo, a’di jin di’d nyaḵki ’kwani kun ’kon ki e e mony’cesh mo.
C̱iyi ahirdhe/ ki gwom pem mo,
haali/ aha/ gunu ka luŋgu’b gana/ mo.
’Cuḵi aha/ mo ’peni imanṯo’c aha/ bwa mo,
haali/ uni ’bitha’bi’th gom aha/ mo mmobol aha/ e mo.
Susi aha/ ka pije/ ’pena sijin mo,
ki aha/ mina ’taki c̱i mo jin ’boruwa ’bor bwa i is ki gway pini mo.
’Kwani kun tana ḵar/e mini ’kam aha/ mo
haali/ /e mini ṯu/ul dhan mo jin isha to ka enthus gom aha/ mo.