143
Gway ma Dawuu’d.
Ciḵi mon’thom pem mo, ayy Tap̱a.
Dhali c̱iyi ’cem pini ki tom pem kun ’thoka/ ka di’b me’di is mo.
E mii ma isiŋ ganam pini mo tani thoḵi aha/ ’twa/ mo, e mo ma ḵar/em pini mo.
Dhalku/ ki cic̱ mo e mo jin dwallu gwo nyaḵki c̱iŋkinam pini mo
haali/ wathiŋ kamu/ yisa di’da jin di’d ki e jin ta’da ḵar/e ibwambori /e mo.
Haali/ wathi/ jin ta ’kup̱ mo tani a’di urki aha/ isho’k mo.
A’di yap̱ki mondiki/em pem ki sho’k itaga ’cesh mo.
A’di ki kar aha/ mmoc̱a’b e mondhurumi’d mo me’d uni gwansan kun wukin ki wuŋ gana/ mo.
Gom gwo gi wakan mo tani shi/in pem ’thikina buye/ e isi aha/ mo,
dhali adum pem e isi aha/ mo tani a’di tintira/ tintir mo.
 
Aha/ kakina teen dhamo/ gunn e mo.
Aha/ kulumkina gwo ibwa goma ris to kun miikina /e mo.
Dhali aha/ ṯikirk ina gwo kulumi bwa gom miin to ki me’d pini kun wagaskina /e mo.
Aha/ he’thkina me’d pem gom /e mo.
Aḵashiram pem ḵu’thkina ’kus guŋkuru/ mo me’d mo ma burṯa/ o’d mo.
Doshi ma dhali ’cunycuri yan mo.
 
Huru/ ki jahanne/ mo dhali thoḵ aha/ ’twa/ mo, ayy Tap̱a.
Shi/in pem ushi me’d mo.
Dhalku/ ki bag jis/em pini ’peni aha/ mo,
isi ciki/ ki aha/ mina e wa ki uni gwansan kun iikin ka luŋgu’b e jisa ’kulga/ mo.
Dhalki aha/ ciḵa gwo mon’thamo/ gom mo/en pini jin ṯelu sho’k mo,
haali/ e /e mo tani aha/ kara mom pem jin gamka/ gwo is mo.
Ṯori aha/ bway jin miga/ ’taki ya mo,
haali/ e /e mo tani aha/ ’de’kkina aḵashiram pem ’kup̱ ki mis mo.
 
’Cuḵi aha/ mo, ayy Tap̱a, ’peni aris ’kwani kun ta ’kup̱ ki aha/ mo.
Aha/ guskina mmohur jwa e /e mo.
10 Ṯori aha/ gwo mmomii bwam pini mo,
haali/ /e tana Arumgimis pem mo.
Dhalki shi/in pini jin ’boro’d shu aha/ bway mo
e bway jin ba’daba’d mo.
 
11 Gom gway gi gway pini mo tani, ayy Tap̱a, ’tashi mondiki/em pem ’twa/ mo.
E mii ma ḵar/em pini mo tani susi aha/ ka pije/ ’peni monṯo’c bwa mo.
12 Dhali e mo/en pini jin ṯelu sho’k mo tani ’ciṯẖi/ ’kwani kun ta ’kup̱ ki aha/ ’twa/ mo
dhali ’ce’d uni kun ta ’kup̱ ki aha/ shoki ’baar mo
haali/ aha/ tana c̱iŋkinam pini mo.