8
Eya manyuḵ gway, isi ki gway jin yuḵu ka jattiyya mo. Gway ma Dawuu’d.
1 Ayy Tap̱a, jin ta Tap̱am bam, gway pini wa’di eḵa/ e mony’ceshi ’baar mo!
/E jin ta gi monyca ap̱o/ momisi ’baar mo jin nani’da nana/ mo.
2 Ki ’twa/ gi usha ŋa/ mo dhali uni gun tana ’pereny mo tani
/e ṯelkina cur sho’k mo haali/ gom uni gun ta ’kup̱ gi /e mo,
mmodosh a’di jin ta ’kup̱ gi /e mo dhali a’di jin ri’cki’da ri’c mo.
3 Ki aha/ p̱arkina momis pini e mo, jin ta’da ṯu’c gi me’d pini mo tani
mmop̱ara ppe e mo dhala risa cul kun ṯelkina /e sho’k mo,
4 wathi/ gi wakata mo, jin mina /e i/o bwa ki a’di mo,
walla ya/ gi wathi/ mo ki /e mini hil a’di i e mo?
5 Naskin /e ki kar a’di mmota ari jin gwa’da’d ka Arumgimis mo
dhali shum a’di ki monyca mo dhali mii montaḵ mo.
6 /E c̱iki a’di mo jin tanu tap̱a ap̱owa risa ṯu’c gi me’d pini mo
dhali /e dhukina ris to ’baar mo e bwaŋ’kwariny sho’k piti mo
7 aris ḵa’bal dhala morbip̱ mo,
dhali si’da/ aris tombwaasho mo,
8 dhali aris ’dii kun p̱eni mis mo, dhala ris wa’c e bwaŋ ḵumma/ yi’de/ mo
dhala ris to gunn kun dhu bway e bwaŋ ḵumma/ yi’de/ mo.
9 Ayy Tap̱a, jin ta Tap̱am bam mo,
gway pini wa’di eḵa/ e mony’ceshi ’baar mo!