9
Eya manyuḵ gway mo isi ki gwo mowu gi ya/m piti mo. Gway ma Dawuu’d.
1 Aha/ mina c̱i mo jin ’boruwa ’bor bwa i is e Tap̱a ka dum pemi ’baar mo.
Dhali aha/ mina ṯora ris to kun miikina /e ki jaro/ jaro/ mo.
2 Aha/ mina bwa ’kuny mo dhali ya i mis gom /e mo.
Dhali aha/ mina yuḵ gway mmomaŋ gway pini mo, ayy /e jin Caa e ki Ca.
3 Ka ris uni kun ta ’kup̱ gi aha/ doḵkin ka nyaŋ’ko’d mo
dhali uni golkinki is mo dhali ’ce’d sho’k ibwambori /e mo.
4 Haali/ /e halki mom pem jin raḵu jin ta jiŋ ḵar/e mo.
/E c̱a’bkina p̱o/ ḵursi ma maliḵ mo mmoc̱i mo ma ḵar/e mo dhali gwon dwall jin toru gwo ’twa/a ’cesh mo.
5 /E ḵucurkina ris kal gi ’kwaniny’cesh mo, /e ’ce’dki uni gun ta thus ki thus sho’k mo,
/e ’koshki gway buni ki sule/ dhali ki sule/ mo.
6 Uni gun ta ’kup̱ mo tani uni torki sho’k ka pupush mo e mo jin mu/u ’twa/a ’ceshi ’baar mo,
aris ’peŋkuman bampam buni mo tani yu’dkina /e mo,
dhali mom buni jin kanu uni e mo tani a’di i’ce’dkunu sho’k mo be.
7 Hili Tap̱a a’di ic̱a’bki’d i mo ma ḵursi ma maliḵ ki sule/ mo.
A’di ṯelki’da ḵursi ma maliḵ piti mo gom gwon dwall jin toru gwo ’twa/a ’cesh mo,
8 dhali a’di dwallki ’kwaniny’cesh gwo ki mii ma ḵar/e mo.
A’di midi dwall ’kwani gwo ki dar gi mii ma gwar ’de/ mo.
9 Tap̱a a’di ’bitha’bi’th me’da cur gom uni gun yap̱kunu mo,
a’di ta’da cur jin ’bitha’bi’th ka tee jin ṯojuwa ṯo’c bwa mo.
10 Dhali uni gwansan kun mishki gway piti mo tani dhuki moŋgam gwo is buni e /e mo,
haali/ gom /e mo tani ayy Tap̱a /e diki dhal uni gwansan ’pen mo gun simmki /e e mo.
11 Yuḵi gway ki maŋi Tap̱a mo a’di jin di’d eya Sihyuun mo.
Ṯori miin tom piti e bwaman ma ris ’kwani mo.
12 Haali/ a’di jin ri’cki’da bas mo tani a’di diki this uni e mo
dhali a’di diki this ko e mo, ko gi a’di jin wo’ckunu is she/ mo.
13 Miiyi mii ma ’the gom aha/ mo ma, ayy Tap̱a.
Hili mo mo ma to jin ’koshi aha/ is ka nyor mo tani a’di ta to ’peni uni gwansan kun shi/ki aha/ i e mo,
Ayy /e jin ’de’kki aha/ mo ’peni ’twaŋkal gi mowu mo,
14 ki aha/ mina rasha ris momaŋ pini e mo,
ki eya ris ’twaŋkal ma goŋ gi ’bwa/ ma Sihyuun mo
ki aha/ mina bwa ’kuny mo e mony’cuḵ pini mo.
15 Aris kal gi ’kwaniny’cesh cic̱kin ’teki jorom mo e jis kun c̱wanykina uni mo,
eya nyoḵ kun bagkina uni mo tani a’di bu’thki uni isho’k buniŋ gana/ mo.
16 Tap̱a dhalki is piti ki a’di minu mish mo, a’di torki gwon dwall ’twa/a ’cesh mo,
uni gun ta thus ki thus mo tani bu’thkin ma gumem buni kun uḵkina uni ki me’d buniŋ gana/ mo.
Higgaion. Doshi ma dhali ’cunycuri yan mo.
17 Uni gun ta thus ki thus mo tani uni mini c̱eker bwa mo eya Haawiya mo,
aris kal gi ’kwaniny’ceshi ’baar mo kun thiskina Arumgimis e mo.
18 Haali/ uni kun mini mii ta gi to mo tani uni minu mii ’koki this e isa yempa/ mo,
dhali mo ma ’teŋ kap̱e/ gi uni gun hatha’ko’d mo tani uni minu ’koki ’ce’d sho’k ki sule/ mo be.
19 Cuyi mis mo, ayy Tap̱a. Dhalku/ ki dhal ’kwani mmop̱i gwo jip̱i/ mo.
Dhalka ris kal gi ’kwaniny’ceshi ’baar mo dwallu gwo mo ibwambori jis/em pini mo.
20 Dhuyi uni ki mo ma ḵo/ is mo, ayy Tap̱a.
Dhalka ris kal gi ’kwaniny’cesh ki mish uni mo ki uni tana ta, uni ta ’kwaniny’cesh mo!
Doshi ma dhali ’cunycuri yan mo.