13
Wa Wabi Witlam Tabatarare
MIZMIZ 13 NOSIK 1-9
1 Able kerkerge ge wader le tabakiauda Iesui detagerda able Pilatode wader Galilayale naresa nade wi zegulu agimuaretlare Agudim.
2 Ege Iesude yabi nakerda, Wa nako dikepwareda, able le wi au witle uridli pe nole mokakalam gair Galilayale uridli ableglam wi asiasi digieda able orwairorwair?
3 Nolekar! Ka wabi detagreda, ese wa nole wabi witlam tabatarare, wa ya gairle baum maike able orwairorwair.
4 A able 18 le ge baumi Siloamge nade ge able meta arapeida yabidoge abi. Wa nako dikepwareda, able eudide merbi detomerteda wige au witle urder nole mokakalam pe wader Ierusalemale uridli?
5 Nolekar! Ka wabi detagreda, ese wa nole wabi witlam tabatarare, wa ya gairle baum maike able orwairorwair.
Mir Abisir Agegkak Lugira
6 Ege Iesude yabi able mir abisir mir daratagerda, “Netat lelut taba gedubge lu irti tabara ageg arwem. E bakiamuda agegem dasmerer able luge ege nole nardarda.
7 Ege eudige akaida tabara geduble ikaida, “Ma asor, ka pako ka tabakiamuda agegem dasmeli able luge neis a netat urut pe irdiredi, ka nole ageg nardarda. Ma abi adem ismi! E no seb detkoli.”
8 Ege able gedub lelut ikailu, “Kerimle, ma ko dikair netat urut; ka yaka abi darbe kemerkemer a lukup apaite.
9 Ese able lu ya ageg obakerare, ei debele waike; ese nolekar, ma umele ya adem ismi.”