15
Able Mamoe Badmirikda
MIZMIZ 15 NOSIK 1-32
1 Nerut kerkerge gair bakir-atkimedle a witwitle taba etamida Iesui dairumareta ko abi wasorda.
2 Ege Parisayo a Aotale abi mudmir damilare, “Able le e witwit lege imiredi, a yabidoge ko lewer eroli!
3 Ege Iesude yabi mir abisir mir daratagerda:
4 “Ese wabialam netatle wadawer abra 100 mamoe waurder ei netat obadmirik sumesem obau, ei nalu waikai? E no wader 99 mamoe wadarakairtare e obakiamu able admirikadmirik mamoeem wadasmer mena e wairdar.
5-6 Nade ya e wairdar, ei waikai taba gilidge watidikmerik a watigered gedim. Keubu e ya tabara tebud buaikem okakise wadarabgerare, a yabi wadaratagrare, `Mi okakise sererge nabaprekrare ableglam ka koka kara able mamoe erdari ge badmirikda.'
7 Ka wabi datagrare, able orwairorwair nale penoko kotorge turidli ya au sererge otabaprekrare able netat witleem pe Agudim ko takomeda nole mokakalam 99 barkak le ge wi nole Agudi dikaireta.”
Able Zoromzorom Bakir Badmirikda
8 A ese able koskirira 10 zoromzorom bakir wadaragri, ei netat odidmirikda, ei nalu waikai? E bakiamudari lampa dirsirikda, meta tabara udirpi a abi deraimri mena e erdari.
9 Nade ga e erdari, e ya tabara tebud buaikem okakise wadarabgerare, a yabi wadaratagrare, `Mi okokise sererge nabaprekrare ableglam ka koka kara able zoromzorom bakir erdari ge badmirikda.'
10 Ka wabi datagrare, able orwairorwair Agudira angela sererge tabaprekreda able netat witle pe Agudim ko takomeda.”
Able Werem Badmirikda
11 Iesude yabi ko daratagerda, “Able kimiar dawer abra neis werem daralei.
12 Ege keimer werem akailu abi ikaida, “Pe irdi ma kari kara lu naiswer keubu ya ma eumi. Ege able kimiaret tabara gair debelu derapeiri a ikeri tabara neis werem neisweri.
13 Able kepkep gerger barukdarda, ege keimer wermet tabara gair lu okakise itkimdi a aisi bakiamuda aumuriz gedim, ge nade e dikrier tabara bakir gair adudluge.
14 E tabara gair bakir dikri. Able kerkerge le able gedira asiasi odigieda ableglam lewer no kebile wanagri, a able kebilera au werer obarukli.
15 Ege eudi ge akailu memegle bailu able gedlera. Abi kerimlelut emariklu eosmelu bakiamuda abi gedubge puaka wanaseserdeda.
16 E akailu au wererwerer baida e laglag puipi wairwi ge nalu puakagize erolare, ableglam abi nole netat lelut lewer ikwari.
17 Ege eudi ga barkak dikepwari, “Kari babira penoko gair memegle uridli yaba mitkar lewer penoko daragriwerteda arwem, a wader ko kayer barieda. Ka pe peka nali able gedge wererge ekeli ableglam nole lewer arokak.
18 Ka geka nakweilu a nabakiamulu kari babem a abi datagre, “Bab, kaka wit ikaida Agudi opem a mari opem.
19 Ka nole abkorep koka nali mara werem: ma kari ko nakai mara memegle nabailu mokakalam pema wader uridli.'”
20 Ege eudige tekweilu a ko takomeda taba babem. E mena ge murizge tikasereder ege abi babet erdari a ege abra au omar taba diketida. E korider emrida taba wermem tabara tag igardi abi gasu erpeida a uma dikaida.
21 Able wermet eudige abi ikailu, “Bab, kaka wit ikaida Agudi opem a mari opem. Kaka nole abkorep koka nali mara werem.”
22 Ege abi babide tabara memegle darabgerda, “Wa dudumge! Wa bakiaware debe wali taisare a abidoge amiare. A tag amilu tikadarare abra tag pimge damiare a tetergab tarakdarare abi teterge daramiare.
23-24 A ga bakiaware au derged-derged werem kau tipitare mi lewer akelare, ableglam kara werem maike weumida a epe idid mena dali; ege badmirikda a abi pe ko bardarda.” Wige lewer ikerda.
25 Able kerkerge narbit werem ge adge gedubge dawer. Nade e tabakiamuda maike metage e umele wasri warupira mut a le kab barier.
26 Ege narbit wermet memegle dabgeri a abi itmeri, “Nalu pe ikereda?”
27 Ege eudige memeglelut abi ikailu, “Mara barada ko takomeda, a mari babet au derged-derged werem kau ipiti ableglam abra werem ko tadakomeda sikak nole gimkak.”
28 Ege eudi abi au baradara au weku barki a nole lagkak dawer obakiamuda metaem obada. Ege abra bab kei adem teosmeda taba abi igarder obakiamuda muiem obada.
29 Ege eudim tabara bab ikailu, “Ma karim girip irdi; gair urut ge barukdarda kaka marim dorge waikeli mokakalam memegle a ka no mari wanasoli. Ma nole kari nakwari able nani ko lewer obakerda kerbi tebud lekem.
30 Ege mari nerut wermet no mara debelu adem dikri gabneurge. Nade e takomeda gedim mage derged-derged kau werem abim ipiti.”
31 Ege abra bab akaida abi ikailu, “Kara werem, ma pema wanawer karidoge. Kara gairlu pe nagriwerteda mara.
32 Epe debele dikeredi wi lewer ikereda a sererge uridli, ableglam mara barada maike weumida a epe idid mena dali; ege badmirikda epe abi ko pe bardarda.”