3
Girii Jisas wa tubobu beng sini' abo'ga'
O naktangka aming kuyane midi umpang ka i yoksamarik ya umpang ka tim yoksamguk wara'ning fama' ning nua'bu yotik. Ka umpang ka tim yokuk wara'guk ka inga' yoksamarik yara'guk wa ki kubaniksa' ka Anutuning midi kareng ka tim kuma' saninga naking waraga' nua'bu sangnatamarik. Ning tinga wari sidining kabaksi' u sifimarakinga midi ka waraga' tubobu suknatama sasuk didimeng kareng guk iik waraga' sura yoksamarik. Ka midi ka sidi suktangkanga iikning wa tim Anutuning midi tokadofi aming profet wari toging wang. Abanga indining amine aposel fam wari anga girini' Kasira Aming Jisas ka tubobu manggaknip aming adining midi kigineng u kuma' saninga naking.
Ka midi girii nua'ni ka naga sangnatamotik wa ning, kama ka i ikem ya napa'napa' wari bisasu'na wara'ning kama wari kabi'sini' kadofota'. Ka wara'ganang wa aming ka anasining kabaksi'ning sasuk ka napa'napa' kamaganangni u titiga'sa' nakiting wari ifikadainga ikiting wari kabi'sini' kadofinting. Kadofinga sidita' mamareng samonga midi ning sangkigeni'ga', ai sidining girisi' wa tubobu abubu ga' togu' wa magayam abara' wa, mokngang unda'. Sidi mandaga' figikning, kama ya napa'ni guk mo' tinga kayam. Kama ya tim Anutu wari munumung kuma' tanga kamigu'ganang ababanga indining papase' wari ira abiging ganang undu' ningsa' ira ababanga kami yara'ganang undu' kuma' ikita' ningsa' ita' idi, girigik nua'bu guk mo' tara'. Ka indi u kanga ning tontam, girisi' wa tubobu guk mo' abo', abanga napa' fam wa inga'ni nua'bu guk mo' kadofani'. Adi midi tokige ka ning u fating de ka adi napa' girii ka Anutuning kigineng wara'guk mo' nakedanga fatoing. Kama munim wari kadofigu' wara'guk mo' fasuking. Wa Anutu warisa' tuguinga kunim wari kadofinga a kama undu' adisa' tuguinga gwang wari tubobu kidagang tinga kama wari gwang bining ganang kadofigu'. Ka inga' aming kamaganangni wari kadagang girii tiging waraga' tanga undu' Anutu anasa' gwang u aniinga gwang wari bera aming u dipmasasu'negu'. Wara' ning nakedantam, kama kunim ya fikifiki kuma' unda' ita' ningsa' ira auning mo', mokngang, kami yara'ganang wa Anutu anasa' yangsefinga iking. Ka inga' girii wari tubobu abuinga aming kadagasi ka Anutuga' bibi' nakngamiting u midiganang manggara kukyapma mamareng imo' wara'ganang wa Anutu anasa' tuguinga kudip wari kuma' danga bisasu'no'ga'.
O naktangka aming kuyane karesi sidi girii wari urap mo' abara' u kanga wa waraga' kabaksi' mamareng mo' nakanting, mokngang, sidi ning nakanting, Anutu adi gurak usap ka wan tausen ning wa adi kama pumpurumsa' ka sidii kubaniksa' ning kata'. Abanga Anutu adi napa'ni titiga' midi totangkanga kabita' wa inga' nakube guk mo' tita', mokngang, titisa' tita'. Ka aming fam adi ning fatuguting, a Anutu adi aming didimesi yotangkayapma aming kadagasi didipmi titiga' togu' wa dari dipmo'ga'. Ka mokngang, Anutu adi aming ka ni kadaga titiga' mo' nakita', mokngang. Adi aming dabiksa' wari adisining kadagang waraga' manda ukngama adiganang au waraga'sa' nakita' wara' adi kama paramu' ko indibinga ikem.
Kama a kunim wa kuma' biwa'.
10 Ka kama ka girii wari tubobu abubu wara'ning wa indi wara'guk mo' nakem. Ka adi kadapmang ka kubu aming wari aming nua'ni'ning mambong manggaknonga kaga' urapsa' urang kadofiting ningda'ning tanga urapsa' kadofinimo'ga'. Kama ka wara'ganang wa kama wari bibi' titining ari' wara' napa' gigi girii wari kadofinga napa' tangkunasi ka kunimganang iking wari kudip danga bisasu'nani'ga'. Ning tanga kama guk ka napa' kamaganang i iking undu' kudip danga wadigi' kuma' bisasu'no'ga'. 11 Ka napa'napa' wa kadapmang ka u torik wara'ganang ning tanga bisasu'no'ga', ka sidi waraga' sura kadapmang kadagang fam u kabisasu'nanga Anutuning kadapmang kareng waraga'sa' sura ikanting. 12 Ning tanga sidi kadapmang didimengsa' tanga kabaksi'ganang u sangangsa' ira Anutuning kama girii ka wari urapsa' kadofisam waraga'sa' sukanting. Beng sini' kama ka girii wari abo' wara'ganang wa napa' kabasi' mo' kadofo', mokngang, napa' girii sini' ka napa' kunimganang ikiting mayam mayap a bam wadigi' danga bisasu'nani'ga'. 13 Ka Anutu adi kama kunim timini i wadigi' tipmirisasu'nanga inga'ni sa' nua'bu titi waraga' kuma' totangkagu', wara' Anutu adi kama kunim inga'ni kuma' tipkadofo'ga'. Ka kama kunim inga'ni ka wa aming wari wara'ganang ira Anutuning kadapmang didimengsa' titi wara'ning ning iro'ga'. Ka naktangka aming indi yong ka wara'ganang iik waraga'sa' sura ikem.
Naktangka aming indi iikni' tipdidimanga girii wari tubobu abubu u kapmekantam
14 O kuyane sidi kama girii ka wari kagadofi wara'ning sasuk guk iking wara' sidi Anutuning de ganang wa didimeng karengsa' ira adigok kabakni' kubaniksa' ira kugurang gi' iik waraga' sura kane tangkunang tanga nasi' kadagang kabi' ka ko tanga iking u wadigi' sini' kabisasu'nanga didimengsa' ikanting. 15 Ka sidi girii wari kadapmang kugurang tanga kama kunim urap mo' tipmirira' u kanga ning sukanting, o beng sini' adi u tara' wa indi sasuk bema adita' kabakni' tipfaranga inga' kadaga guk mo' titi waraga' tinimara'. Ka indining kuyani' kareng Pol adindu' Anutu wari sasuk amiinga sidi yotangkasap waraga' iiksi' tipdidima wara'ning midi ka i yoksamarik ningyara' undu' kuma'sa' yoksamgu'. 16 Beng sini' umpang dabik ka Pol wari yora yareta' wara'ganang wa midi ki kubanik ka iiksi' tipdidima ning u torik waraga' undu' kuma'sa' tuguta'. Ka umpang ka Pol wari fiokiamita' wara'ning midi fam wa kini mang sini' ka aming wari siasa' nakeda ning guk mokngang, wara' aming fam ka sasuksi' didimeng guk mokngang wari midi wara'ning kiga' nafek tanga tipfara tanga didimeng mo' yanggekiting. Ka adi kadapmang ka ningwara' wa Pol ning midi unggungsa' mo' titing, mokngang. Adi Anutuning midi kareng ka aming fam wari tim yoking undu' ningsa' tipkadanga fiareting wara' adi kadapmang ka u fating warisa' tanga wa kadaga tini'ga'.
17 Ka kuyane na aming ka wara'sining kadapmang mandaga' waraga' wa kuma' sangnataminga naking wara' sidi sasuk guk ira aming ka u yapkeda ning tangkunang guk ikanting. Ka inga' aming Anutuning midi kapmik mo' iikisi ka ningwari sidiganang kadofinga sanggekinga wa sidi kadapmang kareng gi' iikning u kabinga kadaga guk mo' tini'. 18 Ka sidi girini' Kasira Aming Jisas manggaknip aming adining ai'dap wari sifitangkanga adining kadapmang kareng waraga' sasuk samota'. Ning tinga adining kigineng wari sidiganang u girii girauta'. Jisas adi girii tim iyak sini' wara' aming a napa'napa' indi adining wapsa' bema areinga adining wap a kigineng girii wari kami a inga' undu' fikifiki ningsa' ira arota', beng.