12
NeHalang Iua Apram
Iok Non Soke hele lange Apram ke teke, “O hile lem kileng pe lem hana mur pe iri lochloch ngana nenge te tu luluch nge temem pe o la nga ich nenge lape e henonou iong ia.
“Pe lape e pete iong pe
e poia lem tete mur ke te lohot ke iri halang toto;
pe lape e poia pingam ke song
pe hulua te naue ke e pete tote iong.
Pe e poi ke urana lange iri nenge te poi ke urana lange iong
pe iri nenge te poi poreke iong lape e poi poreke iri.
Pe lape e poi ke urana lange hulua lochloch nga ich
iange nge huna nge iong mana.”
Ke Apram lohaka nge Harran pe la sapele ke pomanga Non Soke hele ngana ia lange i pe Lot la luluch nge i. Nga etue neu Apram ana hesinga iri ana non kina mol pe analoch pe lime (75). Apram mene ne hei Sarai pe tina tuna Lot pe nena hekuleileinga ana hana mur pe reria urelu mur nenge te mene nge Haran pe tei ke tela te lohot nga ich nenge Kenan.
Pe te i nga ich neu ke la te lohot nge Sekem. Pe ae tapuna ngana e mes nga kileng neu. Ana ae ene laka ae ok nenge More. Nga etue neu Kenan mur te tutu nga ich neu kura. Pe Non Soke lohot nge Apram pe hele lange i ke teke, “Lape e tunge ich nei lange lem tete mur.” Pomalam Apram lung heke hatanga e lange Non Soke nenge lohot nge i.
Ke het pe nga hoena Apram loloun la nga chaia haka ngana nga sasana nge Petel. Pe hemesia nena pelpele nga kileng Petel pe kileng Ai tunangaria, pe lung heke hatanga e lange Non Soke pe heto heke Non Soke ene.
Ke het pe Apram loloun ke ramana lange Nekep.
Apram La Ke Tu Nge Ekipto
10 Iok nga hoena uringa palaungana lohot nga ich nenge te tuia pe Apram sio ke la tu pol nge Ekipto iange uringa neu poreke toto. 11 Pe nga etue nenge te la rochroi nge Ekipto Apram hele lange ne hei Sarai ke teke, “Iau e eteia ke iong nakum urana toto. 12 Pe nga etue nenge Ekipto mur te naue iong lape te hele ke te teke, ‘Non nei nehei koi.’ Pe lape te hune iau pe iong o tu ke o maulul. 13 Urana nge o hele lange iri ke o teke lium koi iau. Pomalam lape te poi ke urana at nge iau. Ke nge iong mana lape e tu ke e maulul.”
14 Iok la ol nga etue nenge Apram la ke lohot nge Ekipto, Ekipto mur te naue Sarai nge nakuna urana toto. 15 Pe ne Parao nena hana papalauna mur te esia ana hei nge nakuna urana pe te mene teua i lange ne Parao nga nena pele palaungana. 16 Ne Parao mene hei neu pe poi ke nek lange Apram ke tunge nena sipsip tatamanna mur pe heheina mur pe pulumakau tatamanna mur pe heheina mur pe tongki tatamanna mur pe heheina mur pe hekuleileinga ana hehei pe hana pe meme mur.
17 Pe Non Soke poia haleles poreke ngana ke lohot nge ne Parao pe nge iri nenge te tu nga nena pele, iange huna nge Parao nge mene Apram nehei Sarai. 18 Pomalam ne Parao hekulo Apram ana pe onteia i ke teke, “Pomerei nenge o poia iau ke pomai? Heungana nge o hele pengpeng at nge iau ke o teke, ‘Hei nei lek hei ia.’ 19 Pe pomere nenge o hele ke o teke, ‘Liuk laka.’ Eh ngana koi! O mene lem hei pe a la ol.” 20 Iok la ol ne Parao hele lange nena hana mur ke te kulos hote Apram. Pomalam te kulosia Apram pe nehei ke te la, pe te la luluch nga reria ure mur lochloch.