13
Apram Pe Lot Te Chachel
1 Ke Apram pe nehei pe reria ure mur lochloch te i hot nge Ekipto pe te lo haka lange Nekep pe Lot la luluch nge iri.
2 Apram lohot ke i non nenge nena ure halang nga huros marana ngana mur pe nena ure sachanchana sinaha ngana mur.
3 Ana non tu nge Nekep pe loloun rara ke la nga kileng hel pule pe la lohot mule nga kileng nenge are tala ia, nga kileng nenge Petel pe Ai tunangaria.
4 Ana non lung heke tele hatanga e nga lamau lo pe la heto heke mule Non Soke ene ia.
5 Pe Lot loloun rara luluch nge Apram pe nena sipsip mur pe meme pe mur pe kolok mur pe nena hehei pe hana mur pule.
6 Ke Apram pe Lot reria urelu mur halang pe ich palaungana ero mana nge iri nai ape ke te are ia.
7 Ol pe hunelinga lohaka. Apram pe Lot reria hana mur te hun hel. Nga etue neu Kenan mur pe Perisae mur te tu nga ich neu kura.
8 Pomalam Apram hele lange Lot ke teke, “Rera hana mur te hunel pe ita nai ita elle mana pe lemera ero nge ta hunel mule nge ita.
9 Ke pomalam ta chach hel. O nau la ich palaungana kou tumana paneu. Nenge teke o la nga pen hoihoi iau e la nga pen tamalmal pe nenge teke o la nga pen tamalmal iau e la nga pen hoihoi.”
10 Iok la ol, Lot nau rara pe esia kileng mos ngana nge Iortan ke lange Soa. Kileng neu ana ech halang ke pomanga Non soke ana ume pe pomanga ich nenge Ekipto. (Nei nga etue nenge Non Soke heporeke tuele tana nenge Sotom pe Komora ero kura).
11 Ke Lot hesilei hote kileng mos ngana lochloch nge Iortan pe lohaka sapele ke la nga chaia haka ngana. Ke hana nai neu te chach hel sapele.
12 Ke Apram are nga ich nge Kenan pe Lot are luluch nga tuele tana papalauna mur nga mos pe lele nena pelpele rochroi lange Sotom.
13 Pe hehei pe hana nenge Sotom te poreke toto. Te popoia poinga nenge poreke toto nga Non Soke matana.
14 Iok Lot lohaka ke la lo pe Non Soke hele lange Apram ke teke, “O mes lamam pe o nau ole la nga kileng lochloch. O nau haka langa kileng ilina hele nenga lut ana pe o nau ole la nga nenge sio pe o nau ole la nga chaia haka ngana pe o nau ole la nga chaia sio ngana.
Apram Lange Hepron
15 “Ich lochloch ngana nenge o naue nem lape e tunge lange iong pe lem tete mur ke lemo ia ol.
16 Pe lape e poia lem tete mur ke te lohot ke iri halang toto ke pomanga maruchrue nenga ich pe mele pele nakuna ero toto nge sisele iri.
17 Iok o lohaka pe o i kela onau nga ich nemur nenge lape e tung lochloche lange iong.”
18 Pomalam Apram lohaka pe la ke are rochroi la nga ae papalau ngana nge Mamre nga kileng nenge Hebron pe lele heke nena pelpele mur. Pe lung heke tunginga ana hatanga e lange Nok Soke nga lamau.