14
Apram Halaua Lot
1 Hana nemur iri naunga-ala ana hana mur; Ne Amrapel nauele kileng Papilon pe ne Arioch nauele kileng Elasa pe ne Ketolama nauele kileng Elam pe ne Tital nauele kileng Koim.
2 Naunga-ala ana hana nemur tela ke te palhel luluch nge naunga-ala ana hana hel pule. Eria mur koi nei; Ne Pera nenge nauele kileng Sotom pe ne Pirsa nenge nauele kileng Komora pe ne Sinap nenge nauele kileng Atma pe ne Semepa nenge nauele kileng Sepoim pe naunga-ala ana non nenge Pela (nenge heueu nei te hetue ke Soa).
3 Naunga-ala ana hana lime nei te mene reria palinga hel ana hana mur pe tela ke te mes ke muria elle nga tottolo nenge Sitim (nga ruach mesmes ngana ana mos).
4 Iange ne Ketolama nauele iri ke hesinga iri analoch pe nai (12) pe nga hesinga analoch pe rahtele mol ngana (13) leteria inin pe te hunel.
5 Ke nga hesinga iri analoch pe rahetele henel ngana (14) ne Ketolama pe pekngana naungaala ana hana mol, te la ke te hekousue hana nenge Repaim nga kileng nenge Asterot Karnaim. Pe te hekou sue Sus mur nga tuele tana nenge Ham pe te hekou sue Em mur nga tuele tana nenge Saue Kirataim.
6 Pe te hekou sue Hor mur nga sasana ana kileng nge Seir ke ramana ole lange El Paran, rochroi la nga ich sana lomona.
7 Ke het pe te mule ke te lange En Mispat (nge Kates) pe te hekou sue tuele kina mur nenge Amelek pe Amor nenge te tutu nge Haseson Tamar.
8 Pe naunga-ala ana non nenge Sotom pe nenge Komora pe nenge Atma pe nenge Sepoim pe nenge Pela (nenge te hetue ke Soa) te lohot ke te has ele reria hunelinga munna nga mos nenge Sitim.
9 Ke naunga-ala ana hana henel te pal hel luluch nge naunga-ala ana hana lime. Te pal hel luluch nge ne Ketolama nenge i naunga-ala ana non nge Elam pe ne Tital nenge i naunga-ala ana non nenge Koim pe ne Amrapel nenge i naunga-ala ana non nenge Sina pe ne Arioch nenge i naunga-ala ana non nenge Elasar.
10 Pe mos nenge Sitim muta ia polo mur nenge te menmene ich muna ngana ia. Ich muna ngana nem ene laka kolta. Pe nga etue nenge naunga-ala ana non nenge Sotom pe Komora teua, reria hana mur hel te losio teu nga polo nemur. Pe naunga-ala ana hana mol pe reria hana mur te ua ke te la nga sasana mur.
11 Naunga-ala ana hana henel neu te kerkereng toto pe te lolochia ure lochloch ngana pe ngaunga mur nge Sotom pe Komora ke te laia iri.
12 Pe te mene Apram tina tuna Lot pe nena ure lochloch ngana pule iange i tutu nge Sotom.
13 Pe non Hipru e ua nga hunelinga neu pe la ke hele toto nge Apram nga ure nenge lohot. Pe Apram kou tula rochroi toto nga ae papalau nge Mamre. Mamre i none nga mata nenge Amor pe titina mur laka Eskol pe Aner. Hana nemur pekngaria toto laka Apram.
14 Nga etue nenge Apram longe nge te laua tina tuna, heukiraua nena hana kerkereng ngana mur nge iri ana non kina analoch pe ana non kina lime pe analoch pe rahtele mol (318). Hana nemur iri ul ke te tutu nike. Te la pe te hekumia naunga-ala ana hana nemur ke la het nga tuele tana nenge Tan.
15 Pe nga miliko Apram chachia nena hana mur ke te pal hel pe te hekou sue naunga-ala nemur reria hana mur pe te lope iri ke ramaria lange Hopa nga kileng Tamaskus ilina hele nenga lut.
16 Pe Apram mene mule ure lochloch ngana pe mene mule tina tuna Lot pe nena ure mur lochloch. Pe mene mule hehei mur pe hana hel pule.
17 Iok Apram hekou sue ne Ketolama pe pekngana naunga-ala ana hana nemur ke het pe la mule sapele. Pe nga mule ngana, naunga-ala ana non nenge Sotom lohot ke saolia i nga mos nge Saue (Saue luna laka; Naunga-ala ana non nena mos).
18 Pe Melkisetek i naunga-ala ana non nga kileng nenge Salem. Ana non mene hote beret pe uain. Pe i NeHalang Nenga Lut Toto nena tunginga ana non ia.
19 Pe pete Apram pe hele ke teke,
“NeHalang Nenga Lut Toto lape poi ke urana toto lange iong.
I ala hote tapa pe ich.
20 Ta heto heke NeHalang Nenga Lut Toto
I laka tung heke lem ngarang mur la nga perim.”
Ol pe Apram tunge ure huna elle lange i. Ure huna elle nem lohot nge ure loloch ngana nenge Apram lolochia nga hunelinga pe hekou sue hana nemur pe takiraua ke huna iri analoch. Pe huna elle laka nenge tunge lange Melkisetek nem.
21 Pe naunga-ala ana non nenge Sotom hele lange Apram ke teke, “O tunge lek hehei pe hana ke nenge o mene mule iri nem, ke te at mule nge iau pe o mene ure lochloch ngana nem ke lem ia.”
22 Pe Apram hele lange naunga-ala ana non nenge Sotom ke teke, “Iau e poia helenga kerkereng ngana e lange NeHalang Nenga Lut Toto nenge ala hote tapa pe ich ke e teke,
23 Iau lape e mene lem ute pele ero toto. Ke ute e nge sachana tuna mana ke manga malus ulina nenge o tautau tako ia pe apem ulina ana rur, nem lape e mene ero pule. Iange lape o hele ke o teke, ‘Iau iam e poia Apram ke nena urelu halang.’
24 Ke pomalam lemek ero toto nge e mene ute. Pe utar nenge lek hana mur te ngaua ke ulolo, nem mana lape e mene. Pe lape e mene neingak mur nenge te at luluch nge iau reria pule. Ngana laka ne Aner pe ne Eskol pe ne Mamre.”