22
NeHalang Olleke Apraham
1 Pe nga etue hel nga hoena NeHalang olleke Apraham pe hele, “Apraham ou!”
Pe Apraham tuacholia, “Iau koi.”
2 Pe NeHalang hele ke teke, “O mene tum tamane ngana elle nem nenge mutem tau tote - Isak pe o la nga kileng nenge Morea. Pe o makia i lamau ke pomanga lem tunginga, nga hengene e nenge lape e henonoua lange iong.”
3 Iok laol nga uach uruna toto Apraham lohaka ke rechia ae nenge lape mak tunginga ia pe tatach heke nga nena tongki. Pe mene tuna Isak luluch nge nena hekuleileinga nai pe te la sapele nga hengene nenge NeHalang heleia lange i.
4 Pe nga etue mol ngana Apraham nau toto la pe esia hengene neu.
5 Pe hele lange nena hekuleileinga ana hana mur ke teke, “Imo nai a tu luluch nga tongki la koloi pe imem nai kol nei mo langa lamau ke mo heto heke Non Soke. Ke het pe mo at mule nge imo.”
6 Iok la ol Apraham inheke ae putana nenge lape mak tunginga ia pe tal heke lange tuna Isak ke takisia. Pe isipona mene oan pe kakop ke iri nai te i luluch ke tela.
7 Pe Isak hele haka pe onteia temene Apraham ke teke, “Temek!”
Pe Apraham tuacholia, “Oe, kolek o hele.”
Pe Isak hele ke teke, “Ae mur pe oan koloi - pe sipsip nenge ta mak ke tunginga ia, ngana ngai?”
8 Pe Apraham tuacholia ke teke, “Kolek, NeHalang isipona lape tunge sipsip nenge lape ta mak ke tunginga ana ia.” Pe iri nai te i luluch ke tela.
9 Iok tela te sauhot lamau nga kileng nenge NeHalang heleia lange i pe Apraham lung heke sapele hatanga pe tatach heke ae mur nga ona. Ke het pe kale hite tuna Isak pe tal heke i la nga ae ona nga hatanga neu.
10 Ke het pe Apraham mene heke kakop ke teke hune tuna.
11 Pe Non Soke nena angkelo nga lut nga tapa alngana sio lange i ke teke, “Apraham, Apraham!”
Pe Apraham tuacholia ke teke, “Iau koi.”
12 Pe angkelo neu hele, “O hune tum ero. Pe o poia ute e lange i ero. Heueu nei e eteia ol ke iong o longotau tote NeHalang. Iange o hunele tum elle nenge mutem tautote nem nge iau ero.”
13 Iok Apraham teke naula pe esia sipsip tamane ngana e nge ana sangkar chauchau teu nga tapulpul unne. Ol pe la ke laua ke mene Isak munna ke mak heke ke poi tunginga ia.
14 Ke Apraham hetue kileng neu ene ke Non Soke tunge. Ke nga etue neu ke at heueu nei te hetue ke, “Nga hengene nenge Non Soke tunge.”
15 Pe Non Soke nena angkelo nga tapa alngana henai ngana lange Apraham
16 ke teke, “Non Soke isipona hele hot ke teke, ‘Iong tum elle mana pe mutem tau tote pe o hunele i ero.
17 Pomalam lape e pete iong pe e poia lem tete mur ke iri halang toto ke pomanga itoch mur nga tapa sana pe peipei nga ruach ilina. Pe lape te mene tuele kina mur pe reria ngarang mur ke reria ia.
18 Iong o longo tau tote Iau ke nge lem tete mur mana lape e pete hulua lochloch ngana nga ich.’ ”
19 Iok la ol Apraham pe Isak te i sio la mule nge nena hekuleileinga ana hana mur pe iri lochloch tela mule nge Pesepa nga Apraham tu nganngana.
Nahor Nena Tete Mur
20 Iok etue hel nga hoena Apraham longe nge te teke, “Tim Nahor pe ne hei Milkah te hoe tuturia mur rahtele mol nge iri tatamanna.
21 Ke tuna tengene ana ene laka Us pe tina e ene Pus. Pe tiria e pule ene Kemuel (nenge Aram temene).
22 Pe tiria e pule ene Keset pe e ene Haso pe e ene Piltas pe e ene Sitlap pe e ene Petuel.”
23 Pe Petuel lohot ke Repeka temene ia. Ke Milka hoe tutuna mur ratele mol nge Apraham tina Nahor.
24 Pe Nahor nehei e pule ene Reuma pe tutuna mur henel: Tepa pe Kaham pe Tahas pe Maaka.