23
Sara Mete Ngana
1 Sara tu ke ana hesinga iri ana non kina rahtele elle pe rahtele nai (127),
2 pe mete nge Kiriat Arpa (nenge ene e pule Hepron) nga ich nenge Kanan. Pe Apraham la ke tangia Sara pe are ia ana lete.
3 Ol pe lohaka pe hele lange ne Hitae tutuna mur pe na tete mur ke teke,
4 “Iau ngie koke iau ke at e tu luluch nge imo. A tung hote ich unne ke e alo hite lek hei pe e olia lange imo.”
5 Pe ne Hitae tutuna mur pe nena tete mur te tuacholia lange i ke teke,
6 “Kole o longo at nge imem. Nga lamai mo naue iong ke iong non kerkereng ngana. Iong sipom o nau pe o hesilei hote ich unne ke o alo hite lem hei. Mele pele lape unhele ich nge iong ero.”
7 Ol pe Apraham lohaka pe tualou suo lange iri ich tokoninga Hitae mur.
8 Pe hele lange iri ke teke, “Nenge teke a longele iau ke e alohite lek hei, iok a longo at nge iau. A mene lek helenga pe ala ke a hele lange Epron nenge ne Soar tuna
9 ke tunge nena ich unne nge Makpela at nge iau. Ana ich tu nga ich nei het ala ngana. A onteia i ke tunge at nge iau pe e olia uruna lochloch ke meena lange i, ke lek metenga ana kileng ia ol.”
10 Iri te are nga tuele tana neu ana kue matana ke te helele pe Epron kou kila luluch nge iri. Pe ana non tuacholia Apraham
11 ke teke, “Ero, non soke o longo at nge iau, nga lek hana mur mataria lape etung mene ich nem pe polo nenge tu nga ich nem lange iong ke o alohit lem hei ia.”
12 Pe Apraham tualou sio mule lange ich tokoninga mur nga mataria.
13 Apraham longe Epron nge hele ke mau pe hele, “Nenge teke lemem lape e olia ich nem lange iong. O ngata ke o mene ich uruna nge iau pe e alohite lek hei lamau.”
14 Pe Epron tuacholia lange Apraham ke teke,
15 “Non soke o longo at nge iau, ich nem uruna laka umtutuna iri ana non kina iri ana non kina elle (400). Pe letemia nem ero. Nge ita nai ute pele nga nem ero, o la ke o alo hite lem hei nga ich nem.”
16 Apraham ngata nga Epron nena helenga pe sisala hot ke umtutuna iri ana non kina iri ana non kina elle (400) ke pomanga Epron heto ngana pe tunge lange i. Umtutuna ana hana mur te olol ich nga umtutuna nenge pomau pule.
17 Ke Apraham olia Epron nena ich nge Makpela luluch nga metenga ana kileng pe ae lochloch ngana nenge temes nga ich neu. Kileng Makpela tu rochroi lange Mamre.
18 Ke hana lochloch ngana nenge te heukirau nga tuele tana neu ana kue matana te eteia ke ich neu, Apraham nena ia ol.
19 Apraham olia ich neu ke het pe alohit sapele nehei Sara nga polo nga ich nenge Makpela. Kileng neu tu rochroi nge Mamre (nenge ene e pule Hepron) nga ich nenge Kenan.
20 Ke Hitae mur reria ich neu te tunge lange Apraham pe nena hana mur ke reria metenga ana kileng ia ol.