24
Isak Pe Repeka
1 Iok Apraham tuauna toto lo pe Non Soke pete i nga ure lochloch.
2 Pe Apraham hele lange nena hekuleileinga mur aria soke nga nena pele, nenge nau elele nena ure mur ke teke, “O talue perim nga haek ene.
3 Pe o hele ke kerkereng toto nga Non Soke NeHalang nenga tapa pe nga ich matana. O hele ke o teke, o heleia tuk nge heie nge Kenan ero, nga kileng nenge e tutuia nei.
4 Pe o la mule nga lek kileng huna nga tuele tana nenge e at ia, nge alok mur pe o mene tuk Isak nehei e nga lamau.”
5 Pe hekuleileinga ana non neu ontei ke teke, “Pe nenge teke hei neu lemene ero nge at luluch nge iau? Lape e mene tum ke lamule nga tuele tana nenge o at ia?”
6 Pe Apraham hele ke teke, “Lemek ero nge o mene mule tuk la lamau.
7 Non Soke NeHalang nga tapa mene hote iau nge iri lochloch ngana nenge tetu ke elle luluch nge temek pe nga lek ich. Pe I hele ke kerkereng toto at nge iau ke teke, ‘Lape E tunge ich nei lange lem tete mur.’ Ana non lape kulosia nena angkelo ke i muka nge iong pe halaua iong ke o mene tuk nehei e nga lamau.
8 Pe nenge teke hei nem lemene ero nge at luluch nge iong, helenga kerkereng ngana nenge e hele lange iong ke poia nem lape poia ure meena ngana e lange iong ero. Pe o mene mule tuk la lamau ero toto.”
9 Ke pomalam hekuleileinga ana non neu talue penna nga ana soke Apraham haena ene pe poia helenga kerkereng ngana nem.
10 Iok la ol hekuleileinga ana non neu mene ke kamel iri analoch nge ana soke Apraham pe lolochia ure urana ngana mur nge i pe i sapele ke ramana lange Aram Naharaim. Nga kileng ilina hele nenga lut nge Mesopotamia pe i ke langa tuele tana nenge Nahor.
11 Pe poia kamel mur ke te tualou sio rochroi langa ech matana e nge tu nge hot nga tuele tana neu. Kileng lala ke ulechlei lo pe hehei aria etue nenge te hot ke la te e ech.
12 Pe ana non hetalaulau ke teke, “Ak soke Apraham ana Non Soke NeHalang, letem metene lem tomunga hel ana helenga nenge o poia lange ak soke Apraham, pe heueu o halaua iau ke e hottaua hei nem.
13 O nau at, iau koi e mesmes nga ech matana nei ilina pe hehei pe hana nga tuele tana neu, tuturia mur kou te hot atat ke te eulul ech.
14 E teke o poia ke nga etue nenge e hele lange hei malolong ngana e ke e teke, ‘Kole o talsue am ech kina ke e in mukam.’ Pe nenge teke hei nem isipona nenge o henonou hote ke Isak nehei ia, lape hele ke teke, ‘O in, pe e heinia lem kamel mur pule.’ Nem lape e eteia ke o poi ke nek toto lange ak soke Apraham.”
15 Non neu hetalaulau ke het ero kura pe esia Repeka nge takisia ana ech kina nga ekena. Repeka temene laka ne Petuel pe Petuel tana laka Milka pe Milka ene laka Nahor pe Nahor tina laka Apraham.
16 Hei neu nakuna urana toto pe none maluluch nge i ero kura. Ana hei sio la nga ech matana ke ea ana ech kina pe lo haka at mule.
17 Pe hekuleileinga ana non neu, ueiuei mana pe la saholia pe hele, “Kole o tunge ak ech unne nga am ech kina.”
18 Pe hei neu hele, “Non soke, o in.” Pe ueiuei mana hekena het sue ech kina langa penna pe tunge lange non neu ke in.
19 Hei neu tunge ech lange non neu ke in ke het pe hele, “Lape e eulia ech pe e tunge lange lem kamel mur pule ke te in ke saria una toto.”
20 Ke ana hei eusiling sue ech nga ana ech kina ke sio langa kaliu pe song la mule nga ech matana ke ea ech hel pule. Pe eulia ke halang toto ke purpure kamel mur.
21 Pe non neu reng mana pe nau mana lala nga hei neu poi nganngana. Pe letena tuanin ke teke, “Lape hei nem mam lom? Nenge teke isipona eh! Non Soke poia lek inga nei nganangana ke lohot lo.”
22 Iok kamel mur te in ech ke het pe non neu mene hote paspas nai nge te ume hote nga um chalemlem ngana nge meena pol pe tunge lange hei neu ke pue iri nga penna. Pe mene hote hei neu ina ana uto ke puo teua nga ina.
23 Ke het pe onteia hei neu ke teke, “Itei tuna iong? O hele at nge iau ke nek, iau pe lek hana mur mo tango rara pele nge mo maia. Pomere mo at ke motu nga temem na pele?”
24 Pe ana hei tuacholia ke teke, “Iau temek laka ne Petuel pe temek tana laka he Milka pe temene laka ne Nahor.
25 Imem lemem huros mur aria ngaunga halang pe muria halang nge te maia pe lemem pele letena halang pule nge a maia nga miliko.”
26 Ol pe non neu tualou sio pe heto heke Non Soke
27 ke teke, “Ta heto heke ak soke Apraham ana Non Soke NeHalang. I rahite nena helenga kerkereng ngana nenge poia lange ak soke pe sau sue ero. Pe nga lek inga nei Non soke poia iau ke e la pengpeng nge ak soke alona mur.”
28 Non neu hetalaulau ke mau pe hei malolong neu song sapele ke la heleia ure nemur lange tana pe iri lochloch ngana nenge tetu luluch nge i.
29 Pe Rebeka liuna e nge ene Lapan. Ana non song hot lange non neu nga ech matana.
30 Lapan song hot la iange naue uto nga liuna ina pe enre chelemlem ngana mur nga penna hele pe hele. Pe longe liuna nge heleia ure nenge non neu heleia lange i. Pomalam lohot ke la pe saholia non neu nge mes luluch nge kamel mur nga ech matana.
31 Pe hele lange non neu ke teke, “Iong Non Soke pete iong nga ure urana ngana mur, o iat luluch nge iau. O mes mana nge hot lamai ke? E tatalo hele pele e lo pe lem kamel mur muria pule.”
32 Iok non neu i teu ke langa pele pe Lapan nena hana mur te unhote ure mur nge kamel mur patangaria pe te tunge aria ngaunga pe te talue iri nga muria nenge lape ta maia. Pe te mene ech ke non neu pe nena hana mur te lome aperia.
33 Ke het pe Lapan loloch ngaunga ke talsue nga non neu pe nena hana mur mataria. Pe non neu hele ke teke, “Lape e hele tele ure nenge e teke e heleia lange iong mukam, ke het pe mo ngau ol.”
Pe Lapan hele, “Iok o heleia at nge imem ol.”
34 Iok la ol, ana non hele sapele ke teke, “Iau Apraham nena hekuleileinga ana non koi iau.
35 Pe Non Soke pete tote ak soke ke nena urelu halang toto. Ke tunge nena sipsip mur pe nena pulumakau mur pe nena um chalemlem ngana mur pe nena um kokoi ngana mur pe nena hehei pe hana nenge te umume nge i pe nena kamel mur pe nena tongki mur.
36 Pe ak soke nehei, ene laka Sara. Pe Sara hoe tuna tamane ngana e nge ak soke nga etue nenge tuauna toto lo. Pe ak soke tunge nena urelu lochloch ngana lange tuna neu ke nena ia.
37 Pe ak soke poia iau ke e poia helenga kerkereng ngana e ke mai koi, ‘O helei ia tuk nge hei e nge Kenan ero, nga kilenge nenge e tutuia nei.
38 O la mule nga tuele tana nenge e atia nge temek alona mur, nga mata nenge iau ke o mene tuk Isak nehei e nga lamau.’
39 “Ol pe e onteia ak soke ke e teke, ‘Pe nenge teke hei neu lemene ero nge at luluch nge iau?’
40 “Pe i hele ke teke, ‘Non Soke nenge e nanas tau tote lemene ngana nge nike ke at heueu nei, lape hekule nena angkelo ke la luluch nge iong pe poia lem inga nem nganangana ke lohot, ke o mene tuk nehei e nge temek alona mur nga mata nenge iau.
41 Pe ure meena ngana e lape lohot nge iong ero nga helenga kerkereng ngana nenge e hele lange iong ke o poia. Ke nenge teke o la nga mata nenge iau pe lemeria ero nge te tunge hei nem lange iong, nga kue nem mana lape ute pele lohot nge iong ero.’
42 “Nga etue nenge e mes nga ech matana heueu nei e hele ke e teke, ‘Ak soke Apraham ana Non Soke NeHalang, nenge teke lemem o poia lek inga nenge e atia nei nganangana ke lohot.
43 O nau at, iau koi e mesmes nga ech matana nei ilina. Pe nenge teke hei malolong ngana e i hot at ke eul ech, iau lape e hele lange i ke e teke, “Kole o longele iau ke e in hot ech unne nga am ech kina.”
44 Pe nenge teke hele at nge iau ke teke, “Iok, o in pe e einia lem kamel mur pule.” Nem lape e eteia ke isipona laka nenge Non Soke henonou hote ke ak soke tuna nehei ia.’
45 “E hetalaulau manmana nga letek kura pe Repeka ure ana ech kina pe i hot at pe sio langa ech matana ke eul ech. Pe e hele lange i ke e teke, ‘E nem, o tunge ech ke e in.’
46 “Pe ueiuei mana ekena het sue ana ech kina la nga penna pe hele ke teke, ‘O in, pe e einia lem kamel mur pule.’ Ke e in pe i la ke einia lek kamel mur pule.
47 “Pe e onteia i ke e teke, ‘Itei tuna iong?’
“Pe i tuacholia ke teke, ‘Iau temek laka ne Petuel pe temek tana laka he Milka pe temene laka ne Nahor.’
“Ol pe e tunge enre mur lange i ke pue nga penna hele pe hele pe puoteua uto ina.
48 Ke het pe e tualou sio pe e heto heke Non Soke ke e teke, ‘E heto heke ak soke Apraham ana Non Soke NeHalang, iange poia iau ke e la pengpeng nge ak soke tina ke e mene tuna nehei nge i.’
49 “Iok la ol, letem ma ke merei nga ak soke nena helenga? Nenge teke letem urana pe o teke o poi ke nek lange i, o hele at nge iau. Pe nenge teke ero, o hele at nge iau ke e la nga kileng e pule.”
50 Pe Lapan iri nai Petuel te tuacholia ke te teke, “Ure lochloch ngana nenge o hele ia nem at nge Non Soke pe lape mo hele ke merei?
51 Imem nai mo ngata ke o mene Rebeka pe imo ul ke ala, ke la lei nge am soke tuna ke pomanga Non Soke letena tuanin hot ngana ia.”
52 Pe Apraham nena hekuleileinga ana non neu longe ke mau pe tualou sio langa ich pe heto heke Non Soke.
53 Ol pe lochloch hote ure chalemlem ngana mur pe um chalemlem ngana nenge koikoi pe hengeron mur pe tunge iri lange Rebeka. Pe pule tunge tunginga mur nenge ururia haka toto lange liuna Lapan pe nge tana.
54 Ke het pe i pe hana nenge te at luluch nge i te ngau pe te in pe te mamani nga miliko lamau.
Pe nga uach uruna toto te lo haka pe ana non hele, “A longele iau ke e la mule nge ak soke ol.”
55 Pe Repeka liuna pe tana te hele ke te teke, “A longala ke atu pol mukam ke he nem tu luluch nge imem ke etue iri analoch ke het pe ala ol.”
56 Pe ana non hele lange iri ke teke, “A poi hulul ia iau ero, Non soke poia lek inga nganangana ke lohot lo. A longele iau ke ela mule nge ak soke ol.”
57 Pe iri te hele ke te teke, “Iok ta iu hote hei malolong ngana nem pe ta onteia lemene ngana.”
58 Iok te iu hote Repeka pe te onteia i ke te teke, “Non nei teke i mulmule lokoi. Pomerei o teke o la lululuch nge i loma?”
Pe ana hei tuacholia ke teke, “Oe! E lala lo i.”
59 Pomalam te longele liuria Repeka ke la luluch nge Apraham nena hekuleileinga ana non neu pe nena hana mur. Pe hei nenge nauelele Repeka nga i kino ngana, la luluch nge iri pule.
60 Pe te pete Repeka ke te teke,
“Opoi! Liumem Repeka la tau. Non Soke pete iong ke o hoho
pe tutum mur lape iri halang nge halang toto;
pe lape lem tete mur te mene tote
reria ngarang mur reria tuele tatana mur.”
61 Ke het pe Relpeka pe nena hekuleileinga ana hehei hel pule te lohaka nga kamel nemur pe te la mule luluch nge non neu. Ke hekuleileinga ana non neu mene i pe te la sapele.
62 Te i ke te la mulmule nge Kenan pe Isak lohaka nga ech matana nenge Pia Lahai Roi ke la tu nge Nekep.
63 Pe nga ulei e ana non la ke i rara nge hot nga ich nenge te tua ngaunga ia. Pe teke ule matana la pe esia kemel mur nge te atat.
64 Pe Repeka pule teke ule matana la pe esia Isak pe sio sapele nga nena kamel patangana.
65 Pe onteia hekuleileinga ana non neu ke teke, “Non tei nenge i nga ich nenge te tua ngaunga ia ke atat nge ita neu mau?”
Pe hekuleileinga ana non neu hele ke teke, “Ak soke Isak laka lom.” Ol pe Repeka mene palpanna ana ruchinga hit pe askou hite palpanna.
66 Ol pe hekuleileinga ana non neu hele ia ure lochloch ngana nenge poia lange Isak.
67 Ke het pe Isak mene teua Repeka la nga tana Sara nena pelpele pe iri nai te lei hel sapele. Ke Repeka lohot ke Isak nehei ia pe Isak mutena taua i. Pe Isak tana mete ngana ana lete memee sio sapele nge i.