28
1 Iok Isak iua Iakop ke pete i pe hele lange i ke teke, “O leia heie nga kileng nenge Kenan ero toto.
2 Heueu mana nei o lohaka pe o lange lem te ne Petuel. Tam temene la ka ne Petuel pe i kou tu nga kileng nenge Patan-Aram nga ich nenge Mesapotamia nga kileng ilinha hele nenga lut. Pe lem achung Lapan tutuna heheina mur halang. O naue e pe o mene i ke lem hei ia.
3 Pe e hetalaulau ke NeHalang Nenge Na Kerkerenga Palaungana Toto poi ke urana lange iong pe poia tutum mur ke iri hulua toto. Pe lape o lohot ke hulua nga ich temeria iong.
4 Pe I lape pete iong pe lem tete mur nga petanga nenge tunge lange Apraham. Pomalam lape o mene ich nenge o tutu ia heueu nem ke pomanga iong non lomona ngna e. Pe ich nem NeHalang tunge lange Apraham nge nike lo.”
5 Iok la ol, Isak kulosia Iakop ke la tu luluch nge Lapan nga kilenge nenge Patan-Aram. Lapan liuna laka Repeka pe temeria laka ne Petuel nena nge Aram. Pe Repeka tutuna mur laka Iakop iri nai Esau.
6 Esau eteia ke temene Isak pete Iakop pe hele lange i ke leia heie nge Kenan ero. Pe pule eteia ke temene kulosia Iakop la ke tangue ne hei e nge Patan Aram.
7 Pomalam Iakop longo taua temene pe tana ke lange Patan Aram.
8 Pe Esau etei tote ol ke temene lemene ero toto ia hehei mur nenge Kenan.
9 Pomalam Esau lohaka ke lange iri mata nenge Ismael pe leia Ismael tuna heingana e nge ene Mahalat pe Mahalat tina laka Nepaiot. Pe Ismael i Apraham tuna ia.
Iakop Maopene Nge Petel
10 Nga etue nenge Iakop lohaka nga kileng nenge Persepa i ke la sapele nga kileng nenge Haran.
11 Ana non ii ke la lohot nga kileng urana ngana e nenge lape maia nga miliko iange chaia matana sio lo. Ol pe mene ume e ke poi ana ulunga ia pe masio ke mamani.
12 Ol pe ma opene ia hakanga e nge mes nga ich pe mokona tua teu nga tapa. Pe hekulkulonga mur te i hakaka pe tei sisio ia.
13 Pe Non Soke mes nga Iakop ilina pe hele ke teke, “Iau Non Soke pe Iau NeHalang nenge Apraham pe Isak te heto hekeke. Ich nenge o maia nem lape e tunge lange iong pe lem tete mur ke lemo ia ol.
14 Pe lem tete mur lape te lohot ke pomanga maruchrue pe te kila ole nga kileng ilina hele nenga lut pe nenge sio pe nenga chaia haka ngana pe nga chaia sio ngana. Ke nge iong pe lem tete mur mana lape e pete hulua lochloch ngana nga ich.
15 Nga kileng lochloch ngana nenge o laia Iau lape E tu luluch nge iong pe E nau ele iong. Pe lape e mene mule iong at nge ich nei. Pe lape e hile iong ero toto iange e teke E poi hote ure lochloch ngana nenge e heleia lange iong.”
16 Ol pe Iakop rura haka pe hele, “Iau nge e teke Non Soke tu lamai ero i, pe I kai tu mai.”
17 Ol pe Iakop matau toto pe hele, “Kileng nei poia iau ke e loiloi i. NeHalang nena pele pe kue matana nenge la nga tapa, ngana koi te tu nei.”
18 Iok nga uach uruna toto Iakop memete pe mene um tana nenge poi ulunga ia pe hemes heke ke heilang ia ure nenge lohot nge i. Pe eusiling heke ae oliua eina nga um neu ona iange um neu NeHalang nena um ia.
19 Pe hetue kileng neu ke ene kileng nenge Petel. Pe tuele tana nenge tu nge nike nga lamau, te hetue ke ene tuele tana nenge Lus.
20 Ol pe Iakop poia helenga kerkereng ngana e ke teke, “Nenge teke NeHalang tu luluch nge iau, lape nauele iau nga lek inga nei pe tunge ak ngaunga ke e ngaua pe lek hengeron ke e heronia.
21 Pe nenge teke o mene mule iau lange temek pe nena hana mur, iong lape ak Soke Iong.
22 Um nenge e hemesia nei heilangia ke lem pele koi tu lamai. Pe ure lochloch ngana nenge o tunge nge iau lape e takiraua ke huna iri analoch. Pe huna elle lape e tung mule lange Iong.”