29
Iakop La Ke Lohot Nge Patan Aram
1 Iok Iakop i kela lohot nga hehei pe hana nenge te tu nge chaia haka ngana reria kileng.
2 Pe teke naula pe esia ech matana e pe sipsip mur aria tuluk iri mol nge tema ke te eliliu hite ech matana neu. Iange sipsip nemur nga lamau te inin ech nga ech matana neu pule. Pe te piu ele ech matana neu nga um palaungana e.
3 Nga etue nenge sipsip mur tela ke te heukirau nga lamau, sipsip aria naunga ala mur te hesere kelia um nenge ma hele ech matana neu pe te einia sipsip mur. Ke het pe te tal hele mule ech matana anna um neu.
4 Ol pe Iakop onteia sipsip ana naunga ala nemur ke teke, “Sinanga hana! Lemo nge ngai malam?”
Pe iri te tuacholia ke te teke, “Lemem nge Haran.”
5 Pe Iakop onteia iri ke teke, “Iok, a eteia none nge ene Lapan pule? Lapan nenge Nahor.”
Pe iri te tuacholia ke te teke, “Oe, mo eteia i la.”
6 Pe Iakop ontei mule ke teke, “A nau lange i, tu ke urana kau?”
Pe iri te tuacholia, “Oe, tu ke urana mana iau. Pe o naula, tuna Retsel kou mene nena sipsip mur ke te atat neu.”
7 Pe Iakop hele lange iri ke teke, “Chaia matana i mes nga lut kura. A heinia sipsip nemur pe a mene iri ke la te ngau mule heilil nga mukam.”
8 Pe iri te tuacholia ke te teke, “Ero iam, Mo hein tangai ia sipsip mur ero. Mo kulele iri lochloch ngana ke te at ke mataria purpur mukam. Ke het pe mo hesasaul kelkelia um nga ech matana pe mo heinia iri ol.”
9 Nga etue nenge Iakop hele lululuch nge hana nemur, Retsel at luluch nga temene nena sipsip mur iange i nauelele iri.
10 Ke Iakop na achung laka Lapan pe Lanpan tuna laka Retsel. Pe nga etue nenge Iakop esia na Retsel nge mene temene nena sipsip mur at, la ke hesere kelia um nenge ma hele ech matana pe hein sapele na achung nena sipsip mur.
11 Ke het pe lau hite Retsel pe tang ke soke toto.
12 Pe Iakop hele lange Retsel ke teke, “Iau alok laka temem pe e tak laka e Repeka.” Ol pe Retsel song sapele ke heleia lange temene.
13 Iok, nga etue nenge Lapan longe na achung Iakop pingana, song hot lange i pe lau haka nge i pe mene teua i la nga nena pele. Pe Iakop nene ure lochloch ngana nenge lohot nge i lange Lapan.
14 Ol pe Lapan hele lange Iakop ke teke, “Lek achung toto laka iong. Ita nai rette elle.” Pe Iakop tu luluch nge Lapan ke teio elle.
Iakop Ume Nge Lapan
15 Iok, Lapan hele lange Iakop ke teke, “Iau alok toto laka iong. O ume nge iau pe o ume sio mana ero. O teke e olia iong ke pomere?”
16 Nga etue neu Lapan tutuna mur heheina iri nai. Nenge soke ene Lia pe nenge kino ene Retsel.
17 Lia nakuna urana pe nakuna unun manmana pe Retsel nakuna urana toto nge Lia pe singinga urana toto pule.
18 Pe Iakop mutena tau tote Retsel, pomalam hele ke teke, “Iau lape e ume nge iong ke hesinga iri ratele nai (7) ke het pe o tunge Retsel at nge iau ke e leia.”
19 Pe Lapan tuacholia ke teke, “O tu la koloi. Hei nei e tunge lange none ero pe urana nge e tunge I lange iong ke pomalam o tu luluch nge iau.”
20 Iok la ol Iakop ume ke ana hesinga iri ratele nai iange teke leia Retsel. Pe hesinga nemur, Iakop amneia ke choro mana ke pomanga etue hel mana iange i mutena tau tote Retsel.
21 Ol pe Iakop hele lange Lapan ke teke, “E heulo hot hesinga rahtele nai nem ke het lo. O tunge lek hei at ke e leia i ol.”
22 Ol pe Lapan poia ngaunga matana palaungana e pe hepal nge heihei pe hana mur ke at te ngau.
23 Pe nga miliko Lapan mene tuna Lia la nga Iakop na pele ke ma luluch nge i.
24 Pe pule Lapan tunge Lia nena hekuleileinga ana heie nge ene Silpa ke la luluch.
25 Pe nga uach Iakop eteia ke ma luluch nge Lia. Ol pe hele lange Lapan ke teke, “Pomerei nenge o poia poinga nei at nge iau? Iau e ume nge iong iange e teke e leia Retsel. Pomerei nenge o channanga ia iau ke pomai mai?”
26 Pe Lapan tuacholia ke teke, “Nga kileng nei mo nanasia poinga nenge tutumem heheina tengene ana mur te lei tatala. Pe nenge kinkino te lei nga hoena ol.
27 Iok o kulala ke wik elle het mukam pe ngaunga nenga leinga nei ana etue het mukam. Ke het pe mo tunge Retsel lange iong ol. Pe lape o ume ke hesinge iri rahtele nai mule.”
28 Iok la ol Iakop nanas mene te hele ngaria ke tu luluch nge Lia. Pe nga etue nenge ngaunga neu ana etue het Lapan tunge tuna Retsel lange i ke nehei ia.
29 Pe pule Lapan tunge hekuleileinga ana hei e nge ene Pila lange Retsel ke halaulaua i.
30 Ke Iakop ma luluch nge Retsel pe mutena taua tote i nge Liah. Pe ume mule nge Lapan ke hesinga iri ratele nai.
Iakop Pe Tutuna Mur
31 Non Soke eteia ke Iakop mutena tau tote Retsel nge Liah. Pomalam poia Liah ke ho-o pe Retsel ho-o ero.
32 Iok, Liah sana pe hoe tuna tamane ngana e pe hetue ke ene Rupen. Pe hele ke teke, “Non Soke esia letek meena ngana ke pomalam poinga iau ke iau e hoho ke ek mutena taua iau pule Retsel.”
33 Iok Liah sana pe ho-o mule tuna tamane ngana e pe hetue ke ene Simion. Pe hele ke teke, “Non Soke longe nge ek mutena taua iau ero pomalam tung mule tuk nei.”
34 Iok Liah sana pe ho-o mule tuna tamane ngana e pe hetue ke ene Liuai. Pe hele ke teke, “Nei ol ek lape at ke tu hite iau ol iange e ho-o ke tutuna mur mol lo.”
35 Iok, Liah sana mule pe hele ke teke, “Nei ol e heto heke Non Soke.” Pomalam hoe tuna tamane ngana neu pe hetue ke ene Iuta pe ho-o ero sapele.