30
Retsel Letena Inin Taua Liah
Retsel hoe tuna e nge Iakop ero, pomalam letena inin taua Liah. Pe hele lange Iakop ke teke, “O poia iau ke sak ke e hoe tutuk mur hel nge iong. Nenge teke ero lape e mete!”
Pe Iakop letena inin taua Retsel pe hele lange ke teke, “O heleia iau ke mam ia, iau NeHalang kai? NeHalang laka poi hele iong ke o ho-o ero nem.”
Ol pe Retsel hele lange Iakop ke teke, “Lape e tunge lek hekuleileinga ana hei nenge ene Pila, lange iong ke o ma luluch nge i ke hoe tutuk mur hel.”
Iok la ol Retsel tunge nena hekuleileinga ana hei neu lange Iakop ke pomanga ne hei ia. Pe Iakop ma luluch nge i ke sana pe hoe Iakop tuna tamane ngana e. Ol pe Retsel hele ke teke, “NeHalang milteu at nge iau nga poinga nenge e poia nei pe longala ke tunge tuk tamane ngana e.” Pomalam Retsel hetue tuna neu ke ene laka Tan.
Iok e Pila sana henai ngana pe hoe Iakop tuna tamane ngana e mule. Ol pe Retsel hele ke teke, “E ume ke kerkereng toto luluch nge tik ke ho-o lo.” Pomalam Retsel hetue kol neu ke ene Naptali.
Iok Lia nau pe ho-o ero ol mene nena hekuleileinga ana hei nenge ene Silpa ke tunge lange Iakop ke pomanga ne hei ia. 10 Ol pe Silpa hoe Iakop tuna tamane ngana e. 11 Pe hetue ke ene Kat. Pe Lia hele ke teke, “Iau nge lape e iech toto pai.”
12 Iok Silpa hoho mule Iakop tuna nai ngana e nge i tamane pule. 13 Pe hetue kol neu ke ene Asa. Pe Liah hele, “Heueu nei e iech toto ol! Pe lape hehei lochloch ngana te hetue iau ke hei nenge iech manmana.”
14 Iok nga etue nenge uit mera, lulunga ana etue at sapele. Pe Rupen la nga ume pe hottaua ae e nge ene menrek pe mene hel lange tana Lia. Ol pe Retsel hele lange Lia ke teke, “Kole, o tunge ae menrek nem hel at nge iau, nenge tum mene iri nem.”
15 Pe Liah hele lange i ke teke, “Ah! O leia ek ke ulolo pe heueu nei o teke o mene tuk nena ae menrek pullo?”
Pe Retsel tuacholia ke teke, “Nenge teke o tunge tum nena ae menrek hel at nge iau, lape o maluluch nge Iakop nga miliko.”
16 Iok nga ulei Iakop hot ume ana pe Liah la ke i ele i pe hele lange i ke teke, “Heueu nga miliko lape o ma luluch nge iau iange e olia iong nga tuk nena ae menrek lo.” Pomalam Iakop ma luluch nge ana hei nga miliko neu.
17 Iok, NeHalang longe Lia nena hetalaulaunga ke Lia sana mule pe hoe Iakop tuna lime ngana e nge i tamane. 18 Pe Lia hele, “Iau e tunge lek hekuleileinga ana hei lange ek pe NeHalang tunge uruk nei.” Ke Liah hetue tuna ke ene laka Isaka.
19 Iok Lia sana mule pe hoe Iakop tuna ratele elle ngana nge i tamane. 20 Pe hele ke teke, “NeHalang tunge lek tunginga nge urana toto. Ke heueu nei ek lape tal heke tote iau iange e hoe tutuna mur tatamanna nge iri ratele elle.” Pomalam hetue tuna neu ke ene Sepulun.
21 Iok nga hoena Lia hoe tuna heingana e pe hetue ke ene Taina.
22 Pe NeHalang letena ia Retsel pe longe nena hetalaulaunga pe poia i ke ho-o mule. 23 Retsel sana pe hoe tuna tamane ngana e pe hele ke teke, “NeHalang halaua iau ke e meia iau ero ol.” 24 Pe hetue tuna neu ke ene Iosep. Pe hele mule ke teke, “Nga letek toto e teke Non Soke tung mule tuk tamane ngana e pule.”
Iakop Nena Huros Halang
25 Nga etue nenge Retsel hoe Iosep ke het, Iakop hele lange Lapan ke teke, “O kulosia iau ke e la mule nga lek kileng una ol. 26 Pe o tunge lek hehei mur pe tutuk mur at nge iau pe mo la ol. Iong o eteia ke e umeia lem ume mur ke nek toto iange e teke e mene laka iri.”
27 Pe Lapan hele lange Iakop ke teke, “O longo at, e heteia ke Non Soke pete iau ke lek ure halang toto iange o tu luluch nge iau. Ke nenge teke e poi ke urana lange iong lo, iok o tu mukam.” 28 Pe Lapan hele pule ke teke, “O heleia urum ia at nge iau pe e olia lange iong.” 29 Pe Iakop tuacholia lange i ke teke, “Iong sipom o eteia ke iau e ume sakilil nge iong lo pe e nau ele lem sipsip mur ke iri halang toto. 30 Nga tele ngana lem sipsip mur iri unne sune mana mukam pe heueu nei iri halang toto ol. Iange Non Soke halalaulaua iau pe pete iong nga lek ume lochloch ngana nenge e popoia. Pe heueu nei e teke e ume ke e nauele lek hehei mur pe tutuk mur pe iri nenge tetu luluch nge iau.”
31 Pe Lapan onteia i ke teke, “Ke lape e tunge lem utar?”
Pe Iakop tuacholia ke teke, “Lemek ero nge o tunge ute at nge iau. E teke o longele iau ke e nauele mule lem sipsip mur mukam: 32 Ke heueu lape e la ke e nau ke nek toto nga lem sipsip mur pe meme mur. Pe lape e hesilei hote sisip muna ngana mur pe nenge singiria tuatuntun luluch nga meme mur nenge singiria lihoho ke lek ia. Ke uruk laka lom ure nemur lo. 33 E teke e poia poinga nge manmanna iange poinga nem lape hele hot ak nga hoena kura. Ke nge he, nenge teke o esia sipsip hel nge singiria muna ero pe meme hel nge singiria lihoho ero nge te tu luluch nga lek, lape o etei mellehe mene ke e kemeia iri.”
34 Pe Lapan tuacholia ke teke, “Iok, urana! Lape ta laia ke pomalaka nga o hele ngam.” 35 Pe nga etue neu Lapan mene sipsip mur lochloch ngana nenge singiria muna pe meme tatamanna pe heheina mur nenge singiria lihoho pe hele lange tutuna mur nenge tatamanna ke te nauele iri. 36 Iok Lapan pe tutuna mur te heii ia sipsip pe meme nemur ke etue mol la lo pe te tu kangkanga toto nge Iakop. Pe Iakop nauelele Lapan nena sipsip mur hel pule.
37 Ol pe Iakop chatoa ae pumpu perperna mur pe sochia uliria pe poia chorochi ia ke utona hussu ngana nenge teu hota hot. 38 Ol pe hemes teua iri nga ech ana kaliu mur. Pe nga etue nenge sipsip pe meme mur singiria milang, te at ke te in ech pe ure neu nge mes nga mataria pengpeng. 39 Pe te ep hel nga ae nemur te mes ngaria pe te hoe tuturia mur nenge singiria lihoho. 40 Iakop poia Lapan nena sipsip tatamanna mur ke te epia sipsip heheina mur nga meme nemur nenge singiria lihoho mataria. Ke nga poinga nei Iakop mene hot kelia nena sipsip mur pe meme mur nga Lapan nena sipsip pe meme mur. 41 Pe nga etue nenge sipsip lum ngana mur te teke te ep, Iakop tal teua chorochi nemur nga kaliu, rochroi la nga te ep ngaria. 42 Pe huros nemur nenge te makuk leilei Iakop talue iri la nga lamau ero. Ke huros nemur nenge te makuk leilei te lala nge Lapan pe nenge te kerkereng te lala nge Iakop. 43 Ke pomalam Iakop nena urelu mur te lohot ke iri halang toto. Nena sipsip pe meme mur pe kamel mur pe tongki mur pe nena hekuleileinga ana heihei pe hana iri halang toto pule.