31
Iakop Ua Lapan Ana
Nga etue ene Iakop longe Lapan tutuna mur nge te helele ke te teke, “Iakop lolochia temere nena ure lochloch pe lohot ke i non nenge nena urelu mur halang nga poinga nei.” Nga tele ngana Lapan poi ke nek lala nge Iakop pe nei ol Iakop esia ke Lapan nau ke nek lange i ero ol.
Ol pe Non Soke hele lange Iakop ke teke, “O la mule nga temem pe alom mur reria ich pe Iau lape e tu luluch nge iong pe e poi ke nek lala nge iong.”
Pomalam Iakop hekulo Retsel pe Liah aria ke te lange i nga kileng nenge nau elele nena sipsip mur ia. Pe hele lange iri ke teke, “E naue ke nge nike tememo poi ke nek atat nge iau pe nei ero ol. Pe temek ana Soke NeHalang tu luluch nge iau. Imo a eteia ke e ume ke kerkereng toto nge tememo, pe i channanga ia iau hemule es mana ke hetautaua uruk. Pe NeHalang poi hele i ke heporeke iau ero mana. Nga tele ngana Lapan hele ke teke, ‘Urum laka meme nenge singiria tuatuntun.’ Pe meme nemur te hoe tuturia mur nenge singiria tuatuntun lochloch. Pe nga hoena hele ke teke, ‘Urum laka meme nemur nenge singiria lihoho.’ Pe meme nemur te hoe tuturia mur nenge singiria lihio lochloch. Ke pomalam NeHalang mene hote tememo nena huros mur pe tunge iri at nge iau.
10 “Nga etue nenge meme tatamanna mur te haka tautaua meme heheina mur, e maopek ke e esia meme tatamanna mur nenge singiria tuatuntun nge te haka tautaua meme heheina mur. 11 Pe NeHalang nena hekulkulonga hele at nge iau nga opek ke teke, ‘Iakop.’ Pe iau e tuacholia ke e teke, ‘Iau koi.’ 12 Pe hekulkulonga neu hele ke teke, ‘O nau at. Meme tatamanna nenge te haka tautaua meme heiheina nemur singiria tuatuntun pe lihoho. Iau sipok e poia ke lohot ke pomam iange e esia ure lochloch ngana nenge Lapan poia lala nge iong ke ulolo. 13 Iau NeHalang nenge e lohot nge iong nge Petel nge nike. Pe o eusiling heke ae oliua eina nga um nenge hengeilang ana pe o poia helenga kerkereng ngana e at nge iau. Heueu nei o lohaka nga ich nei pe o la mule nga lem ich pengpeng.’ ”
14 Pe Retsel iri nai Liah te tuacholia pe elle nge iri hele ke te teke, “Ke imem nai lape mo mene tememem nena ure hel ero ol 15 iange i naue imem ke pomanga hehei lomonmona ngana mur lo. Tunge imem lange iong pe hesil sio mene urumem nenge o nges imem ia ke het. 16 Pe ure lochloch ngana nenge NeHalang mene hote nge i pe tunge lange iong nem, imem pe tutumem mur laka lemem ia ol. Ke pomalam o nanas mene NeHalang nena helenga ol.”
17 Ol pe Iakop tal heke nehei mur pe tutuna mur nga nena kamel mur 18 pe kulosia iri ke iri muka luluch nga sipsip mur pe meme mur pe huros hel pule nenge mene iri nge Mesapotamia. Pe te lohaka nga kileng neu pe te i ke tela nge temene Isak nga ich nenge Kanan.
19 Nga etue nenge Lapan la ke utute nena sipsip mur singiria pulpulna, Retsel la ke keme hote temene nena ae tapuna mur nga nena pele letena. 20 Pe pule, Iakop lohaka ke ii lo pe hele toto nge Lapan ero. 21 Ol pe lohaka kome mana luluch nga nena ure mur lochloch. I ke la lotele nga ech tana nenge Uprates pe i ke ramana la nga hengene mur nga kileng nenge Kileat.
Lapan Nanas Mule Iakop
22 Iok, etue nai la lo pe nga etue mol ngana, Lapan longe nge te teke Iakop paukou ua ke la lo. 23 Ol pe Lapan mene alona mur ke te nanasia Iakop pe te ii ke etue iri ratele nai pe la te lohot nge Iakop nga hengene nge Kileat. 24 Pe nga miliko Lapan ma opene ia NeHalang nge lohot nge i pe hele lange i ke teke, “O poia ute e lange Iakop ero toto.”
25 Iakop lele nena pelpele nga hengene nenge Kileat pe Lapan saolia i. Pe Lapan iri ul alona mur te lele reria pelpele nga lamau pule. 26 Ol pe Lapan lange Iakop pe hele lange i ke teke, “Pomerei nenge o channanga ia iau pe o heuaia tutuk mur heihei nei nem? O poia iri ke pomalaka nga heihei nenge te ua totoia iri nga hunelinga. 27 Pomerei nenge o channanga ia iau pe o lel kome mana ak? Toinge o hele toto at nge iau lape e poia lem kilanga unne pe lek hana mur ke te ole hote kema pe hario ke te peu ele iong mukam. Ke het pe e kolosia iong ke ola ol. 28 O poia iau ke e lauhit polia lek tete mur pe tutuk mur heiheina nai nem ero pe e eea iri ero mana. Poinga nenge o poia nei poreke toto i. 29 Iau lek kerkerenga palaungana nge e poia ure poreke ngana ke lohot nge iong. Pe nga miliko temem ana Soke NeHalang hele at nge iau ke teke, ‘Nenge teke letem ke o poi ke urana ma poreke lange Iakop o poia ero. O poia ute e lange Iakop ero toto.’ 30 Pe iau e eteia ke iong lemem toto nge o la mule nga temem na kileng. Pe pomerei toto nenge o kemeia lek ae tapuna mur nga lek pele letena?”
31 Pe Iakop tuacholia Lapan ke teke, “Iau e matau iange letek ke e teke lape o ech hote tutum mur heheina nai nem pe o mene mule iri nge iau. 32 Pe nenge teke o hottaua mele nenge mene lem ae tapuna mur o hune i ke mete sapele. Pe nga alora mur mataria, iong sipom o iat ke o nau rere lem ure mur. Nenge teke mo mene lem ute, iok o mene mule.” Pe i manmanna ke Retsel kemeia ae tapuna nemur pe Iakop eteia ero.
33 Iok Lapan i teu la nga Iakop nena pelpele pe i teu la nga Liah nena pe i teu la nga hekuleileinga ana hehei mur nai reria pe hottaua ute e ero. Lapan i hot nge Liah nena pelpele pe i teu la nga Retsel nena pelpele. 34 Pe Retsel mene aetapuna nemur pe tal teua iri nga kamel ana arenga pe kila hite iri ol. Pe Lapan tango rara nga ure lochloch pe hottaua ute e ero toto.
35 Pe Retsel hele lange temene ke teke, “Temek, letem inin taua iau ero. Iau lape e mes haka ero iange e poi imem hehei.” Ke Lapan tango rara pe hottaua ae tapuna nemur ero.
36 Ol pe Iakop letena inin taua Lapan pe heleia i ke teke, “Iau mai e poia poinga poreke ngana e kai? E poi poreke iong ke merei nenge o hekumia iau at ne mai? 37 O tango rere lem pele ana ure mur pe o at ke o chanrere nga lek urelu mur lochloch ke het ta lo. Pe o hottaua lo? Iok o talue lakoi ita lochloch matara ke alom mur pe alok mur te milteu at nge ita nai.
38 “Iau e tu luluch nge iong ke hesinga iri ana non kina elle (20) lo. Pe lem sipsip pe meme mur te hoho ke urana mana pe e mete ero. Pe pule e hune lem sipsip tamane ngana e nga lem huros mur ke e ngaua ero toto. 39 Pe lem sipsip pe meme mur nenge ure inolo ngana mur te tune iri, e mene ke la e heteia lange iong ero. Iau sipok e tuacholia utar nenge erue. Pe utar nenge erue nga sinanga pe nga miliko, o long haka uruna atat nge iau. 40 Kokoes e umume nga sinanga pe chaia sina kolkole iau pe nga miliko e mamani ke nek ero iange singik houou manmana. 41 E tu luluch nge iong pe e ume manmanna nge iong ke hesinga iri ana non kina elle. (20) E ume ke hesinga iri analoch pe henel iange e teke e mene tutum mur heheina nai nem. Pe hesinga iri rahtele elle e ume ke e nauele lem sipsip pe mene mur. Pe o channanga ia iau hemule es mana ke o hetautaua uruk. 42 Iau lek te Apraham ana Soke NeHalang nenge temek Isak heto heke totote, pe I tu luluch nge iau. Pe nenge teke tu luluch nge iau ero, iong lape o kulosia iau ke e patpata mana ke e la. Pe NeHalang esia letek meena ngana pe ume palaungana nenge e poia ke ulolo. Ke ngana laka nenge hele salia iong nga miliko.”
Iakop Pe Lapan Tetal Helenga Ke Tetu Ke Nek Ol
43 Ol pe Lapan tuacholia Iakop ke teke, “Iau tutuk mur koi hehei nai nei pe tuturia mur iau lek tete mur ia iri. Pe iau koi nenge lek sipsip mur pe meme nemur. Ke ure lochloch ngana nei iau toro mana lekia iri. Pe lape e poia tutuk mur heheina nemur pe lek tete nemur ke mere mai ol? 44 O i at ke ita nai ta poia helenga kerkereng ngana e mukam. Pe ta poia ute ke helete metene ita nai nga rera helenga kerkereng ngana nem.”
45 Pomalam Iakop hemes heke um tana e ke heilangia iri nai reria helenga kerkereng ngana neu. 46 Pe hele lange alona mur ke teke, “A lolochia um hel pe a takiraua.” Pomalam te lochloch ia um mur pe te takiraua um huna e. Pe Iakop pe Lapan pe reria hana mur te are sio ke te ngau nga um huna neu ilina. 47 Pe Lapan hetue um huna neu nga helenga Aram ke ene laka Ieka-Sahatuta. Pe Iakop hetue nga helenga Hipru ke ene laka Kalit. (pe helenga nai neu luria elle mana. Luria laka, “hengeilang ana um”).
48 Pe Lapan hele lange Iakop ke teke, “Helenga kerkereng ngana nenge ita nai ta poia nem ana hengeilang koi um huna nei.” Ke ngana laka nenge te hetue ke ene Kalit. 49 Pe ene e pule, te hetue ke ene um tana nenge Mispa. Iange Lapan hele ke teke, “Ita nai lape ta tu ke ta kangkanga hel pe Non Soke lape nachnau nge ita nai nga rera helenga kerkereng ngana nem. Lape ta nanasia ma ero. 50 Letem metene ke NeHalang nachnau nga ita nai rera poinga mur. Nenge teke o poi poreke tutuk mur ma o lei haka mulmule nge hehei hel, NeHalang eteia ke ulolo.” 51 Pe Lapan hele lange Iakop pule ke teke, “O nau at nga um tana nenge e hemes heke pe um huna nenge e lung heke nga ita nai tunangara. 52 Um tana nenge mes nei pe um huna nei te helete metene ita ke, iau lape e lotele ke la e pal nge iong ero. Pe iong pule o lotele ke at o pal nge iau ero. 53 Iau lek te Nahor pe iong lemte Apraham pe reria tete mur te heto hekeke NeHalang i toro. Pe I mana milteu atat nge ita nai nga rera poinga mur.”
Pomalam Iakop poia helenga kerkereng ngana e nga NeHalang ene. NeHalang nenge temene Isak heto hekeke. 54 Pe hune huros e ke poi tunginga ia nga hengene neu, pe hepal nge alona mur ke te ngau luluch nge i. Te ngau ke het pe te tuia miliko neu nga lamau.
55 Iok, nga uach Lapan lau hite na tete mur pe tutuna heheina nai neu pe pete iri. Ke het pe lohaka ke lamule nga na kileng.