32
Iakop Sahol Mule Tina Esau
1 Pe Iakop pule iri ul nena hana mur te lohaka pe te i ke tela. Te i ke tela pe NeHalang nena hekulkulonga hel te lohot nge i nga kue.
2 Nga etue nenge esia iri lohaka pe hele ke teke, “NeHalang nena asa pai koi tu nga kileng panei.” Pomalam Iakop hetue kileng neu ke ene: Kileng nenge Mahanaim.
3 Ol pe Iakop kulosia nena hana hel ke la te hele toto nge tina Esau nge tu nga tuele kina nenge Itom nga ich nenge Seir.
4 Iakop hele lange iri ke teke, “A la pe a hele lange ak soke Esau ke mai koi: ‘Non soke lem hekuleileinga ana non Iakop hele ke mai koi, Iau e tu luluch nge ra achung Lapan nga halang nike ke at heueu nei.
5 Pe lek pulumakau mur pe tongki mur pe sipsip mur pe meme mur iri halang. Pe lek hekuleileinga ana hehei pe hana iri halang pule. Ak soke, e hekule helenga nei lange iong ke e teke letem urana nge iau.’ ”
6 Iok nga etue nenge hana nemur te at mule, te hele lange Iakop ke te teke, “Mo laia lem helenga nge tim Esau lo. Pe i kou teke at ke saholia iong nga kue pe hana iri ananon kina iri ananon kina elle (400) lape te at luluch nge i.”
7 Iakop longe helenga neu pe matau toto pe letena tuanin rara. Ol pe lasia nena hana mur nenge te tu luluch nge i neu ke aria tuluk iri nai. Pe sipsip mur pe meme mur pe pulumakau mur pe kamel mur ke pomalam pule.
8 Iange Iakop letena tuanin ke teke, “Nenge teke Esau at pe te talune palinga hel nge iri nenga tuluk nenga muka, iri nenga tuluk nenga hoena lape te ua.”
9 Ol pe Iakop hetalaulau ke teke, “O NeHalang, lek te Apraham pe temek Isak te heto hekeke Iong. Iong Non Soke nenge O hele at nge iau ke O teke, ‘O la mule nga lem kileng nge alom mur pe lape e tu luluch nge iong pe e poi ke nek lala nge iong,’
10 Non Soke, iau lem hekuleileinga ana non pe e urana ero pe Iong letem poreke ia iau pe O poi ke nek toto at nge iau. Nga etue nenge e hile lek kileng e lotele nga ech nge Iortan pe e rahit mene lek kula. Lek ute e ero ol. Pe heueu e la mule luluch nge lek hehei pe hana mur pe lek huros mur nge aria tuluk iri nai.
11 Non Soke, e hetalaulau ke O nauele iau ke nek nge tik Esau. E matau iange lape te at pe te hun lapue imem luluch nge lek hehei mur pe tutuk mur pule.
12 Nge nike o hele at nge iau lo ke o teke, ‘Lape e pete iong pe e poia lem tete mur ke iri halang toto ke pomanga peipei nga ruach ilina pe mele pele nakuna ero toto nge sis ele iri.’ ”
13 Iok, Iakop tuia miliko neu nga lamau pe hesilei hote huros hel ke poi tunginga ia lange tina Esau:
14 Hesilei hot ke meme heheina iri ana non kina iri analoch (200) pe tatamanna iri ana non kina elle (20). Pe sipsip heheina iri ananon kina iri analoch (200) pe tatamanna iri ana non kina elle (20).
15 Pe kamel heheina iri ana non kina elle pe analoch (30) luluch nga tuturia mur pe pulumakau iri ana non kina nai (40) pe kolok iri analoch (10). Pe tongki heheina iri ana non elle (20) pe tatamanna iri analoch (10).
16 Iakop talue nena hekuleileinga ana hana mur ke te nauele huros ana lala nemur pe hele lange iri ke teke, “Imo muka nge iau pe a talue kileng koana ngana unne nga huros ana lala elle pe elle.”
17 Pe Iakop hele lange hekuleileinga ana non nenge nauele huros ana tuluk nenga muka ke teke, “Tik Esau lape sahol tele iong pe lape onteia iong ke teke, ‘Non tei nena non iong pe ramam la ke merechrei? Pe itei nenge nena huros nemur nenge iri mukmuka nge iong?’
18 Pe iong o tuacholia ke o teke, ‘Lem hekuleileinga ana non Iakop laka nena huros nemur. Pe i tunge ure nemur ke pomanga tunginga nenge lange iong ak non soke Esau. Pe i kou nanasia imem ke atat kura.’ ”
19 Pe Iakop hele pule lange hekuleileinga ana non nenge nauele huros mur aria tuluk neinga pe nenge naulele tuluk mol ngana pe iri lochloch ngana nenge te nanasia huros mur ke teke, “Imo lochloch ngana nem pule, nga etue nenge a saholia Esau a heleia helenga elle mana nenge pomau lange i.
20 Pe a hele toto lange i ke nek ke a teke, ‘Lem hekuleileing ana non Iakop kou nanasia imem ke atat kura.’ ” Iange Iakop letena tuanin ke teke, “Lape e hemaluche Esau letena nga tunginga nemur nenge iri muka nge iau nei. Pe nga hoena e saholia i pe lape letena urana mule nge iau.”
21 Ke pomalam Iakop kulosia nena hana mur ke iri muka ia nena tunginga mur nenge lange tina pe i tu muleia miliko neu nga nena asa.
Iakop Iri Nai NeHalang Te Palhel
22 Iok nga miliko neu Iakop lohaka pe mene ne hei mur nai neu pe nena hekuleileinga ana hehei mur nai pe tutuna mur nge iri analoch pe elle pe te i ke te lohtele nga ech tana e nge ene Iapok.
23 Te lotele ke tela nga hele ke het pe Iakop lotele la mule ke kulos tele nena ume ana hana mur nga nena ure mur pule.
24 Pe Iakop i toro mana tu ol pe non e lohot taua i pe iri nai te pal hel. Te pal helel nga miliko neu ke la kileng matale sio.
25 Pe non neu amneia ke i lape alker taua Iakop. Pomalam hehelsose Iakop nga ipuna tuatom ngana ke mesohe.
26 Te pal helel pe non neu hele lala nge Iakop ke teke, “O hal taua iau ol iange kileng uach sio lo.”
Pe Iakop tuacholia ke teke, “O pete iau mukam laka e hal taua iong ke o la.”
27 Ol pe non neu onteia Iakop ke teke, “Iong mam em merei?”
Pe Iakop tuacholia ke teke, “Ek laka Iakop.”
28 Ol pe ana non hele ke teke, “Iong o palhel luluch nge NeHalang pe nge non ngana mur pe o hekou susue iri. Pomalam em nenge Iakop lape ero ol. Lape te hetue iong ke Israel ol.”
29 Pe Iakop hele lange i ke teke, “Pe iong em merei? O hetue em at nge iau.”
Pe ana non tuacholia ke teke, “Pomerei nenge o onteia iau nga ek?” Ol pe non neu pete sapele Iakop.
30 Pe Iakop hele ke teke, “Eh! Iau nge e naue NeHalang ramana loi. Pe ngana i e mete ero mai.” Pomalam hetue kileng neu ke ene Peniel. (Peniel luna laka NeHalang ramana).
31 Iok chaia matana haka lo pe Iakop lohaka nge Peniel pe i hetata mana iange ipuna mesohe.
32 Te hehel sose Iakop aepona nenga ipuna tuatom ngana mesohe hot. Pomalam atat ke heueu nei kura, Israel mur te ngaua huros mirana nenga ipuna tuatom ngana ero.