33
Iakop Saholia Tina Esau
1 Nga etue nenge Iakop tei ke te lala, teke naula pe esia Esau nge atat. Pe nena hana mur nge iri ana non kina iri ana non kina elle (400) te at luluch nge i. Ol pe Iakop lasia tutuna mur ke hel te lange Liah pe hel te lange Retsel pe hel te lange hekuleileinga ana hehei nai neu.
2 Pe talue hekuleileinga ana hehei nemur pe tuturia mur ke te i nga muka pe Lia pe tutuna mur te nanas pe Retsel pe Iosep iri nga hoena.
3 Pe Iakop i muka ia iri ke lange tina. I ke lala nge tina pe tualou sisio pe puo susue palpanna lala nga ich ke ratele henai.
4 Ol pe Esau song la ke saolia Iakop pe lau hite i pe iri nai te tang sapele.
5 Pe Esau nau la pe esia hehei nemur pe aina kinkino ngana nemur pe ontei ke teke, “Itei hel nenge te koko nge iong nemai?”
Pe Iakop tuacholia ke teke, “NeHalang poi ke urana toto at nge iau lem hekuleileinga ana non. Pomalam tunge aina kinkino ngana nemur at nge iau.”
6 Iok hekuleileinga ana hei nai neu pe tuturia mur te at pe te tualou sio pe te puosue palparia la nga Esau matana.
7 Ke het pe Lia pe tutuna mur. Ke het pe Retsel pe Iosep. Iri lochloch te at pe te tualou sio pe te puo sue palpalria la nga Esau matana.
8 Pe Esau ontei ke teke, “E i at pe e saholia hana mur nge te heii ia huros mur ke te lala. Pomere nenge o teke o tunge ure nemur at nge iau?”
Pe Iakop tuacholia ke teke, “E teke e poia iong ke letem urana mule nge iau.”
9 Pe Esau hele ke teke, “Kole tik, e teke o rahit mule ure nemur ke lemia iri iange iau lek halang lo.”
10 Pe Iakop tuacholia ke teke, “Ero kole tik! Iong letem urana mule nge iau lo, pomalam o longele tunginga nemur nenge e tunge lala nge iong nei. E naue ramam pe letem urana pe o poi ke nek at nge iau ke pomalaka nga e naue NeHalang ramana.
11 Ke kole tik, lemek toto ke e teke longele tunginga nemur nenge e tunge lala nge iong nei. Iange NeHalang poi ke urana toto at nge iau ke tunge lek urelu mur nge halang toto.” Ol pe Esau longala ke mene tunginga nemur iange Iakop ech tote i.
12 Ke het pe Esau hele ke teke, “Iok ta la ol; Iau lape e koko nge imo.”
13 Pe Iakop hele lange Esau ke teke, “Ak soke, iong o eteia ke aina kinkino ngana nei te rahtoto ero kura. Pe pule sipsip heheina mur pe pulumakau heheina te hesiusiua tuturia mur kura. Pe nenge teke ta hetarunge iri ke te i ke ueiuei mana nga etue elle, huros lochloch ngana nemur lape te mete.
14 Ke ak soke, iong lem hekuleileinga ana non koi iau. Pe o i ke iong muka pe iau e hei ia huros mur pe aina kinkino ngana ke neknek nga hoena. Pe ak soke, lape la e sahol mule iong nga ich nenge Seir.”
15 Ol pe Esau hele teke, “Pomalam, lape e henonou hote lek hana hel te tu luluch nge imo pe imo ul ke a at nga hoena ol.”
Pe Iakop tuacholia ke teke, “Urana, pe lemek ero poinga nem. Iange e teke e etei tote ke ak soke letena urana mule nge iau lo.”
16 Ke nga etue neu Esau i ke la mule nge Seir.
17 Pe Iakop pe nena hana mur te i ke ramaria la nga kileng nenge ene Sukot. Pe nga lamau Iakop lele nena pele pe lele nena huros mur reria pele pule. Pomalam te hetue kileng neu ke ene kileng nenge Sukot.
18 Pe nga etue nenge Iakop te lohaka nga kileng nenge Patan Aram, te i ke la te lohot ke urana mana nga tuele tana nenge Sekem nga ich nenge Kenan. Pe te tele reria pelpele mur nga tuele tana neu ilina nge hot.
19 Pe ich unne nenge Iakop hemes haka pele ia neu, Iakop ol hote lange iri mata nenge Hamor nga umtutuna iri ana non kina lime (K100.00). Hamor i Sekem temene ia.
20 Pe Iakop lung heke hatanga e nga lamau pe hetue ke ene laka El-Elohe-Israel. (Luna mai koi; Israel mur aria Soke NeHalang nenge kikina toto).