34
Sekem Lau Sue Taina
1 Taina temene laka Iakop pe tana laka he Lia. Ana hei i hot ke teke la ke nau tote hehei mur nga kileng neu.
2 Pe non Hiuaet e nge nauele ich neu, ene laka Hamor pe tuna ene laka Sekem. Sekem esia Taina pe mene i ke lau sue i.
3 Sekem mutena tau tote Taina pe poia helenga urana ngana mur ke teke Taina mutena taua i pule.
4 Pe Sekem hele lange temene Hamor ke teke, “O mene he nei at ke lek hei ia.”
5 Nga etue nenge Iakop longe Sekem nge poi poreke tuna Taina, poia helenga e ero. Kulele tutuna tatamanna mur ke te at mule nga pele mukam. Iri kou te nauelele reria ume nenge te nauelele reria huros mur kura.
6 Ol pe Sekem temene Hamor la ke la hele luluch nge Iakop.
7 Iri nai te helele pe Iakop tutuna mur te lohot ume ana ke te at. Pe nga etue nenge te longe poinga nenge lohot nge liuria, te rura pe leteria inin toto. Iange poinga nenge Sekem poia neu, poreke toto nga Israel mur te nau ngaria pe te heoele tote poinga neu nge lohot nge iri.
8 Pe Hamor hele lange Iakop pe tutuna mur ke teke, “Iau tuk Sekem mutene tau tote tumo pe liumo nem. Pe e teke a tunge lange i ke nehei ia.
9 Ta ngata hel ke imem mo leia lemo heheina mur pe imo a leia lemem heheina mur.
10 Pomalam lape a tu luluch nge imem nga ich nei. Pe a tu pe a ol hot lemo ich pe a umeia lemo umtutuna ana ume mur nga lememo ngamo.”
11 Ol pe Sekem hele lange Taina temene pe liliuna mur ke teke, “E teke letemo urana mule nge iau pe nenge teke a onteia iau nga utar, lape e tunge lange imo.
12 A heto hote ure urana ngana mur nenge a teke e tunge lange imo pe a talue uru nga hei nei ana ngesinga. Umtutuna ia nenge talue, iau lape te tunge lange imo pe a tunge hei nem at ke lek hei ia.”
13 Pe Iakop tutuna mur leteria la mule nga poinga nenge Sekem poia lange liuria, pomalam te channangaia Sekem iri nai temene Hamor.
14 Pe te hele lange iri ke teke, “Iong te riria singim ero pomalam mo longele liumem ke lei nge iong ero. Nenge teke mo longele i ke lei nge iong, meinga palaungana lape mene imem.
15 Pe nenge teke a riria lemo hana mur lochloch singiria ke pomange imem, lape mo ngata nga lem helenga nem.
16 Pe lape a leia lemem heiheina mur pe imem mo leia lemo heheina mur. Pe lape mo tu luluch nge imo pe ta lohot ke ita elle mana.
17 Pe nenge teke lememo ero nge a riria singimo lape mo mene liumem pe mo i ke mo la.”
18 Hamor iri nai tuna Sekem te longe helenga neu pe leteria urana ia.
19 Pomalam Sekem kulala ero ol. La ke ueiuei mana ke te riria singinga iange i mutena tau tote Iakop tuna hei ngana neu. Pe iri lochloch ngana nenge aria mata elle te tal heke i iange aria soke ia pule.
20 Pomalam Hamor iri nai tuna Sekem te la nga tuele tana neu ana kue matana pe te hele lange hana mur nga tuele tana neu ke te teke,
21 “Hana nemur, hana urana ngana mur ia iri koi.” Pe te hele lange iri ke te teke, “Anau at, ita rera ich palaungana pe ta long teua iri ke te are nga rera ich pe te i pe te umeia reria ume mur nga lemeria ngaria. Pe ita lape ta leia tuturia mur nenge heheina pe iri lape te leia tutura mur nenge heheina pule.
22 Pe iri te longala ke ta tu ke ita hana elle mana nga nenge te teke; ta riria rera hana mur lochloch singiria ke pomange iri.
23 Nenge teke ta longotau ke ta nanasia reria helenga, iri lape te tu luluch nge ita pe reria sipsip mur pe pulumakau mur, ita rera ia pule.”
24 Ol pe hana lochloch ngana nga tuele kina neu te ngata nga Hamor iri nai tuna Sekem reria helenga. Pomalam te riria hana lochloch ngana nga tuele kina neu singiria.
25 Iok etue mol nga hoena, hana lochloch ngana te maia aria melmelenga kura. Pe Iakop tutuna mur, Simion pe Liuai te mene reria kakop sasase ngana mur pe te lelkome teu mana nga tuele tana neu pe te hune hana lochloch. Hana nai Taina liliuna mur ia iri.
26 Pe te hune Hamor pe tuna Sekem pule nga reria kakop sasase ngana pe te mene hote Taina nga Sekem nena pele pe te ua ke te la mule nga reria te tu ngaria.
27 Iok Iakop tutuna mur hel pule te sahot pe te naue hana koluria nge tema parai. Ol pe te kemeia ure urana ngana mur lochloch nga tuele tana neu ke liuria ia uruna pe aria meinga ana ia.
28 Pe te laua sipsip mur pe pulumakau mur pe tongki mur. Pe te mene ure lochloch ngana nenge tu teu nga tuele tana neu pe nenge te tu nge hot pule.
29 Pe te lolochia urelu mur nenge ururia haka toto pe te meme hehei mur pe tuturia mur pe te eu hote ure lochloch ngana nga reria pele letena mur.
30 Ol pe Iakop hele lange Simion pe Liuai ke teke, “Imo nai a poia pingak ke song ke Kenan mur pe Peres mur nenge te tutu nga ich nei te longe pe te teke iau non poreke ngana. Ita halang ero mana koi, pe nenge teke hana mata nemur te heuel ke te pal luluch nge ita, lape te hun lapue ita ke ta het.”
31 Pe iri nai te tuacholia ke te teke, “Iri te teke te poia liumem ke pomanga hei salaunga kina e. Pe imem lememem ero toto nge mo nausio mene i ke lohot ke i hei nenge pomam.”