3
Antam Pe Eua Te Longo-ole
Non Soke NeHalang ume hote ur inolo mur lochloch ke urana pe ilimo mana nge letena matana toto nge iri lochloch pe hele lange hei neu ke teke, “NeHalang hele ke teke, ‘A ngaua ae e nganagana nga ume nei ero, ae?’ ”
Pe hei neu hele langa ilimo ke teke, “Mo ngaua ae lochloch ngana ngaria pe ae nenge mes nga ume tuna ngana NeHalang hele ke teke mo ngaua nganangana ero iange lape mo mete.”
Pe ilimo neu hele lange hei neu ke teke, “Ah! A mete ero paiam!” “Iange NeHalang eteia ke letemo matana toto pe a pomange i pe a eteia utar nenge urana pe poreke.”
Hei neu naulele ae neu nganangana nge nakuna urana toto nge ngaunga ia pe letematana ngana ana ia, pomalam mene ke ngaua pe tunge lange ene ke ngau pule. Ol pe iri nai leteria matana pe te eteia ke te lachlach. Pomalam te aonia ae pik ina ke te male hite nge iri.
Pe nga kileng makuk ngana Antam pe nehei te amneia Non Soke Nehalang meena ngana nge i olole nga ume, pe iri nai te talkome ana nga ume letena. Pe Non Soke Nehalang iua Antam ke teke, “Antam ou! Iong ngai?”
10 Pe Antam tuacholia ke teke, “Iau koi e amneia meena ngam nga ume letena pe e talkome iange e lachlach mana?”
11 Pe NeHalang hele, “Ia itei nenge hele lange iong ke teke o lachlach? Nakuna nenge o ngaua ae ngana ngana nenge e hele lange iong ke e teke o ngaua ero iam! Ae?”
12 Pe non neu hele, “Hei nenge o ume hote pe o tunge at nge iau koi nenge tunge ae ngana ngana nei at nge iau ke e ngaua.”
13 Pe Non Soke NeHalang onteia hei neu ke teke, “Pomerei toto nenge o poia poinga poreke ngana nei?”
Pe hei neu hele lange NeHalang ke teke, “Ilimo laka channanga ia iau ke e ngaua ae ngana ngana nem.”
14 Pomalam Non Soke NeHalang hele lange ilimo neu ke teke,
“Iong toro mana lape o mene melmelenga palaungana pe huros mur ero.
Nga etue lochloch ngana nenge o tu nga ich,
lape o amo mana nga sam
pe o ngau manmana maruchrue
iange o channanga ia hei nei.
Pe lape o amnea melmelenga palaungana.
15 Pe lape e poia iong
ke lem ngarang hei nei pe i nena ngarang iong.
Pe tum lape nena ngarang hei nei tuna.
Ke nge he hei nei tuna lape hepapar hite palpalum
pe iong lape o tele apena.”
16 Pe NeHalang hele lange hei neu ke teke,
“Lape o amnea melmelenga palaungana nga etue nenge sam
pe pule nga etue nenge o hoho ia.
Pe mutem tau tote em
pe o nanas mene em nena helenga.”
17 Pe NeHalang hele lange Antam, “Iong o longo taua lem hei ke o ngaua ae nganangana nenge e hetoro sue lange iong ke e teke o ngaua ero.
“Ke lape o amnea melmelenga palaungana nga
o tu ngam nga ich nei iange lape e poia ich nei ke poreke pe am ngaunga haka ke urana ero
pe lape o puo teu tote iong nga ume laka o ngau.
18 Pe kiki nenge matantana pe eilil mur lape te au hite ich,
pe lape o ngaua ure nemur nenge te lohaka nga ich.
19 Pe o ume ke kerkereng toto ke hines sio ia iong,
pomalam lape o ngau.
Pe o pur manmana ume ke pomalam mana ke la het nga
etue nenge o la mule
nga ich, iange
o lohot nga ich.”
20 Antam hetue ne hei ke ene, “Eua” iange i hulua lochloch ngana nenge tetu ke te maulul nga ich nei reette palaungana ia.
21 Non Soke NeHalang umeia Antam pe nehei aria malenga nga huros ulina ke te mele. 22 Pe Non Soke NeHalang hele, “Non nei lohot ke pomange ita ke eteia utar nenge urana pe poreke ke pomalam ta nauele ke ngaua ae nenge tunge maulinga ke koko nem nganangana e ero, iange lape tu ke maulul ke koko.” 23 Ke pomalam Non Soke NeHalang heo ele iri nai nga ume nenge Paratiso, pe te ume mana nga ich nenge Non Soke ala hote iri ia. 24 Iok NeHalang lope hote iri pe talue angkelo solaki ngana e ke nauele ume ilina hele nenga chaia haka ngana. Pe mese chalemlem ngana e nge matana kaliu ala hetaliliu elele ana ae.